利是封回收2024 | 農曆新年就快過，屋企仲有多嘅賀年食品、利是封同年花想回收？即刻睇睇屋企附近有咩地方可以回收，咁就唔怕浪費！

圖片來源：Facebook@綠領行動 Greeners Action、MUJI Hong Kong & Macao、香港天仁茗茶、食德好 Food Grace 、鳳園蝴蝶保育區 | 撰文：Hedy

利是封回收2024 | 1. 綠領行動 利是封回收

綠領行動推出「利是封回收重用大行動2024」，由即日起至3月17日，喺全港超過400多個地點，包括商場、個人護理產品店、屋苑、商鋪及食肆等，為市民回收利是封。為方便日後市民能重用利是封，唔接受有姓氏、有生肖或年份、寫咗文字、有摺痕或破損、有釘或有釘孔以及自動黏貼口嘅利是封。經篩選及處理後，來年將會變成「新生利是封」畀市民重用，能達到減廢之餘又可延續祝福，實在太有意思！

利是封回收都有要求！（圖片來源：Facebook@綠領行動 Greeners Action ）
【INFO】
《綠領行動 利是封回收重用大行動2024》
回收日期：即日起至3月17日
回收地點：https://bit.ly/48Gf10t

利是封回收2024 | 2. 無印良品 利是封回收

無印良品今年同Mil Mill喵坊合作，由即日起至3月10日，各店舖增設利是封回收箱（無印良品利舞臺、MUJI to GO 香港站及青衣站、澳門威尼斯人店舖除外）。利是封將會交由Mil Mill喵坊打成紙漿再製成有用物品，賦予利是封新生命。

無印良品店舖都可以回收利是封（圖片來源：Facebook@MUJI Hong Kong & Macao）
【INFO】
《無印良品 x Mil Mill喵坊利是封回收》
回收日期：即日起至3月10日
回收地點：https://bit.ly/3UPoBea （無印良品利舞臺、MUJI to GO 香港站及青衣站、澳門威尼斯人店舖除外）

利是封回收2024 | 3. 天仁茗茶 利是封回收

由即日起至2月25日，只要保留完整無缺嘅利是封，就可以去任何一間天仁茗茶分店，享受全單購買茶飲減$3嘅優惠。回收利是封將會轉交至綠領行動處理及進行分類。除咗可以享有限時優惠之外，12間分店包括秀茂坪、九龍灣淘大 、黃大仙、馬鞍山、太和、天水圍頌富、上水、觀塘一田、將軍澳Popcorn、元朗廣場、銅鑼灣東南大廈、牛頭角綠景NEO，由即日起至3月17日都會繼續擺放回收箱進行利是封回收。

憑完整利是封，可全單減$3（圖片來源：Facebook@香港天仁茗茶 ）
【INFO】
《天仁茗茶 利是封回收》
回收日期：即日起至2月25日（全單購買茶飲減$3）、即日起至3月17日（分店擺放回收箱）
回收地點：天仁茗茶分店

利是封回收2024 | 4. 食德好 賀年禮盒食物回收

農曆新年期間大家都會互相送禮，但如果屋企嘅賀年禮品多到堆積如山嘅時候，就可以將賀年禮盒同埋食品，由即日起至2月29日，捐贈到食德好嘅公眾回收點。回收之後就會將呢啲賀年禮品送到基層手上，幫助有需要嘅人。當中可以回收嘅種類包括：完整且未開封嘅賀年食物、禮盒、乾貨、糧油、現金禮券，其最佳食用期或品質期必須為2024年3月31日之後。

回收賀年食物、禮盒、乾貨、糧油、現金禮券（圖片來源：Facebook@食德好 Food Grace）
【INFO】
《食德好 賀年禮盒食物回收》
回收日期：即日起至2月29日
回收地點：https://bit.ly/3wx4yXs

利是封回收2024 | 5. 共享食物基金 賀年食品回收

只要係全新未開封嘅食物，而且未過最近食用日期，就可以透過捐贈賀年食品畀共享食物基金以及其合作伙伴，將食物捐贈畀有需要嘅人，分享愛心同新年氣氛，惜食積福。捐贈之前都可以致電你想捐贈嘅機構了解安排詳情。

未開封嘅食物就可以回收（圖片來源：Facebook@共享食物基金）
【INFO】
《共享食物基金 賀年食品回收》
回收日期：即日起
回收地點：https://bit.ly/4bJlPgq

利是封回收2024 | 6. 環境保護署 桃花回收

環境保護署透過承辦商，喺港九新界開設咗超過50個地區收集站，為市民回收桃花，並會將當中合適嘅桃花循環再造成再生產品，轉廢為材。回收桃花前，記得要將上面嘅揮春、裝飾物以及膠帶等物品拆除。

桃花回收（圖片來源：環境保護署）
【INFO】
《環境保護署 桃花回收》
回收日期：即日起至2月25日
回收地點：https://bit.ly/3wj8xa4

利是封回收2024 | 7. 環保協進會鳳園蝴蝶保育區 年桔轉贈

唔少商場及寫字樓都會添置年桔應節，佳節過後就會被送到堆填區棄置。但原來桔樹係唔少鳳蝶幼蟲嘅寄主植物，環保協進會舉辦「年桔轉贈配對網絡」計劃，透過配對方法，令捐贈機構或者公司直接將年桔送到有需要嘅地方，當中包括學校蝴蝶園及農場等等，令年桔再生！若然有興趣參與捐贈甚或接受年桔，都可以喺2月29日之前填妥網上參加表格，並透過電郵（info@fungyuen.org） 、傳真2690-3438或寄往「大埔汀角路鳳園村150號鳳園自然及文化教育中心」至環保協進會，結果將會於3月6日透過電郵發布。

年桔轉贈（圖片來源：鳳園蝴蝶保育區）
【INFO】
《環保協進會 鳳園蝴蝶保育區年桔轉贈》
報名日期：2月29日或之前
申請表格：接收年桔表格: https://bit.ly/49sCiUD；捐贈年桔表格: https://bit.ly/3ORKnKu

利是封回收2024 | 8. 環保協進會鳳園蝴蝶保育區 蘭花轉贈

農曆新年過後，唔少市民都會將蘭花拋棄。為鼓勵市民轉贈有用嘅資源，只要由即日起至3月25日，大家都可以將蘭花送到鳳園蝴蝶保育區教育中心，處理後會將蘭花轉贈畀由需要嘅慈善團體，以延續植物嘅生物。任何蘭花嘅品種都可以捐贈，不適用於唔可以重新種植嘅年花例如芍藥、水仙、菊花、桃花等。

捐贈蘭花（圖片來源：鳳園蝴蝶保育區）
【INFO】
《環保協進會鳳園蝴蝶保育區 蘭花轉贈》
收集日期：即日起至3月25日
收集時間：上午10:00至下午16:00
地址：香港新界大埔汀角路鳳園村150號

——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk