韓國辣炒年糕店青年大邦 （Young Dabang）首間香港分店登陸沙田新城市廣場！店內佔地超過2,000平方呎，主打35cm超長年糕，仲有各式各樣嘅韓國料理，即睇內文睇下有咩好食喇！
圖片來源：官方圖片｜撰文：Sharon
韓國人氣辣炒年糕店Young Dabang殺入香港！首間分店選址沙田新城市廣場，超過2,000平方呎，能容納98位客人，店內裝修以1980年代流行嘅韓國咖啡店為題，仲加入唔少復古傢俬及掛滿懷舊海報！
必試招牌菜式年糕鍋，以煙韌彈牙嘅35cm超長年糕為主打，當中放滿魚糕、鵪鶉蛋、炸餃子、拉麵同蔬菜等配料，份量十足！餐廳更提供六款獨特醬汁作為湯底，當中包括經典香辣嘅「Y DB招牌醬」、香滑濃郁嘅韓式玫瑰醬，仲有粟米忌廉醬及卡邦尼醬，客人可額外追加配料，例如魚糕、拉麵、拉絲芝士、五花腩、炸雞等。
除咗招牌年糕鍋，仲有其他菜式都值得一試！包括青年大邦香雞，每日新鮮手切，經慢煮處理再焗，以鎖住大量肉汁，再配上手切薯片，非常惹味！香雞包括六款經典口味，包括蜜糖蒜香雞、煙燻黑椒香雞同香橙辣香雞等。另外，仲有韓式釜飯如韓醬五花肉釜飯、經典韓式熱狗以及吞拿魚沙律醬。
飲品方面，除咗有「優麴生」韓式米酒、帶有淡淡香甜同堅果味嘅栗子韓式米酒，仲有YDB Ade系列氣泡飲品，啱晒飲唔到酒嘅你，包括青提味、濟州蜜柑味同熱帶水果味。有興趣嘅朋友記得試試喇～
【INFO】 《青年大邦（香港）》 地址： 沙田正街18號新城市廣場一期1樓103A號舖 營業時間： 12:00 - 22:00 電話：2110 8801
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
