米芝蓮必比登推介2024 | 2024年米芝蓮必比登推介名單出爐喇～今年更有7間餐廳全新上榜，如果大家都想跟住最新嘅米芝蓮餐廳推介，食盡香港嘅美食就要留意以下介紹！
圖片來源：Michelin GUIDE | 撰文：Hedy
今年香港共有67間餐廳入選米芝蓮必比登推介名單，「必比登推介」喺指一啲以合理價錢提供三道菜式美食嘅餐廳，食得豐盛之餘價錢又未到好貴，食完會令你超滿足，絕對係物有所值！而今年更加有7間餐廳首次上榜，相信每一間食店都可以帶畀你驚喜！
米芝蓮必比登推介1. Ăn Chơi——正宗越南餐廳
喺香港想試越南菜就要去位於上環嘅Ăn Chơi，無論係食物定係店舖嘅裝潢例如亮黃色牆面、彩色膠椅、斗笠都極具越南風情。小店由夫妻2人主理，主要以當地小吃為主例如配料豐富嘅法包及越南粉等等，當中必試嘅仲有雞蛋咖啡同越南精釀啤酒，即刻就好似去咗轉旅行咁，體驗當地味道～米芝蓮指南更推薦大家可以一試姜公呂望烤魚。廚師喺傳統上加以改良，以比目魚配上自製嘅發酵魚醬，風味獨特！
【INFO】
《Ăn Chơi》
營業時間：中午12:00至下午15:00 / 下午17:00至晚上22:00
地址：上環孖沙街15-17號
米芝蓮必比登推介2. 祥興記 (尖沙咀)——必點上海生煎包
如果大家行過尖沙咀又想食街頭小食，就相當推薦大家試試祥興記嘅上海生煎包。除咗皮薄餡滿，包底煎得香脆之外，更有多種口味例如招牌、鮮蝦、麻辣、蟹粉選擇。熱辣辣嘅上海生煎包，當你一口咬落去嘅時候，湯汁更會流晒出嚟，相當juicy。不過由於店舖空間有限，不設座位，大家都可以企喺出面嘅檯進食。
【INFO】
《祥興記 (尖沙咀)》
營業時間：早上09:00至晚上21:00
地址：尖沙咀樂道48號地下6A號舖
米芝蓮必比登推介3. Little Napoli——拿坡里手工薄餅
同朋友開Party又點少得好味嘅Pizza？老闆嚟自義大利拿坡里，並根據當地傳統製造13吋嘅Pizza，除咗食材由家鄉進口之餘，Pizza更係即叫即整，保證令你食到最新鮮出爐嘅薄餅！當中最受歡迎嘅口味為Margherita以及微辣Vesuviana，每個薄餅都係放入由意大利進口嘅石窯，用400度高溫烤烘！每款薄餅都超足料，再加上餅皮香脆，真係要嚟試試！
【INFO】
《Little Napoli》
營業時間：星期二至四（中午12:00至下午15:00 / 下午17:00至晚上21:00）、星期五至日（中午12:00至下午15:00 / 下午17:00至晚上22:00）
地址：跑馬地景光街8號景光樓地舖
米芝蓮必比登推介4. 文苑飯莊——傳統粵菜
近期曾掀起熱話嘅文苑飯莊，同樣都係今年新上榜！除咗主打傳統粵菜之外，亦有提供燒味、點心、海鮮、蛇羹同煲仔飯等時令菜式。而且廚師以及其服務團隊亦曾效力於其他知名同業，所以絕對能令大家放心。而當中一道菜式「金牌小炒王」更選用特大蝦乾、櫻花蝦以及蝦球等，材料豐富之餘而且鑊氣十足！
【INFO】
《文苑飯莊》
營業時間：星期一、二、四至日 早上11:00至下午15:30 / 晚上18:00至晚上22:30
地址：黃大仙竹園道55號天馬苑商場2樓S02號舖
米芝蓮必比登推介5. 生記飯店——經典粵菜
於1976年創立嘅生記，喺今年年初搬遷至新址，致力於提供傳統粵菜，再加上其親切嘅服務，一直都令唔少客人繼續幫襯。菜式如招牌古法鹽焗雞、上湯枸杞浸豬膶、家鄉缽仔焗魚腸等，都令人回味無窮。
【INFO】
《生記飯店》
營業時間：早上11:30至下午15:00 / 晚上18:00至晚上23:00
地址：灣仔駱克道353號三湘大廈3樓
米芝蓮必比登推介6. 生記滷味 (西環)——必試招牌鵝肉
生記滷味喺1998年開業，售賣唔同嘅鹵水食品，如鹵水鵝、鵝掌、鵝翼等。店舖選用嚟 自潮州嘅穀飼獅頭鵝，而陳年滷水則加入咗數10種香料，每日都會放入掌、翼、肝、腸、腎等部位，用慢火去浸透入味。當中推薦大家必試招牌鵝肉，其鵝肉肉質緊緻又夠香，令人一再回味。
【INFO】 《生記滷味 (西環)》 營業時間：星期一至日 早上09:00至晚上20:30 地址：西營盤皇后大道西263號和益大廈地下4號舖
米芝蓮必比登推介7. 兩姊妹涼皮有限公司（旺角）
由本來只有外賣店舖嘅兩姊妹涼皮有限公司，自2023年年底遷至旺角後，便加設堂食座位。天氣熱嘅時候就最適合食招牌涼皮冰涼透心，配搭青瓜絲、芫荽、花生碎及秘制辣醋，香辣可口之餘又透心涼，食落去口感豐富！
【INFO】
《兩姊妹涼皮有限公司（旺角）》
營業時間：星期一至日 中午12:00至晚上21:00
地址：旺角黑布街99號地舖
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
