點心推介2025 | 香港被譽為美食天堂，每次提到香港有咩特色食物，一定係有多年歷史嘅點心文化。除咗傳統中式茶樓嘅一盅兩件，好多酒店同中餐館都推陳出新，為點心注人創意，令點心種類更豐富。本文整理咗13間點心餐廳，有傳統點心車、新派料理至高級精緻點心都有，總有一間滿足到咁多位點心控。
圖片來源：Openrice@siusiuhea、gourmet_postbox、Iveso950603、pancyy、Wishiwolly Bo、KeLyXu、Maktze、良善熊熊、Epicurean Explorer、cheery516、小貓law、跟妮飲食 | 撰文：Cynthia
點心推介 | 1. 周記點心
相信大家都聽過周記點心元祖首創嘅流心西多同自家製芝麻蝦多士，真係唔簡單。位於西營盤水街，地理位置優越，仲好近港大。奶黃流心西多士兩塊炸方包超脆口，一切流沙餡湧出黎。芝麻蝦多士都係必叫名物，香蝦膠非常厚身 。
【INFO】 《周記點心》 地址: 西環西營盤水街1C-1K號東利大廈地下H1號舖 營業時間: 星期一 全日休息 星期二至五 10:00 - 21:00 星期六至日 09:00 - 21:00
點心推介 | 2. 逸東軒
米芝蓮一星餐廳係有點料子，食過一定會回頭。主打傳統手工粵菜，裝潢充滿舊上海氛圍，有青花瓷茶具點綴，睇得又食得。大推筍尖鮮蝦餃，蝦餃皮煙靭有咬口，正宗皮薄餡靚。
【INFO】 《逸東軒》 地址: 佐敦彌敦道380號香港逸東酒店B2樓 營業時間: 星期一至五 11:00 - 16:00 18:00 - 22:30 星期六至日 10:00 - 16:00 18:00 - 22:30
點心推介 | 3. 蓮香樓
蓮香樓有近百年歷史，翻新後注入新活力，加入燒味區同手搖茶，同時亦保留傳統點心。魚翅花膠灌湯餃金黃清透，味道卻非常濃郁，花膠融入雞湯好滋潤。特色鮑汁鷄腳掛汁，鷄腳炆得軟滑，入口即化，滿滿骨膠原非常入味。
【INFO】 《蓮香樓》 地址: 中環威靈頓街160-164號地舖 營業時間: 星期一至日 06:00 - 16:00 18:00 - 22:30
點心推介 | 4. 龍點心
提到創意點心，一定唔可以唔提龍點心。點心大搞fusion，當中必叫龍記陸寶燒賣拼盤，包括蜆蚧魚肉、星加坡黑胡椒蟹、香辣雞軟骨、黑松露珍香、十年陳皮同經典懷舊多款口味，一定可以滿足各位燒賣控。
【INFO】 《龍點心》 地址: 銅鑼灣波斯富街24-30號寶漢大廈2樓 營業時間: 星期一至日 08:00 - 00:00
點心推介2025 | 5. 得閒飲茶
放假冇野做，不如得閒飲茶，將傳統點心注入創意，即叫即蒸好新鮮。佢地有蝦餃之王嘅美譽，皮薄大大粒蝦肉。另外紫薯流沙煎堆仔，濃濃紫薯蓉，入面有爆漿流沙奶黃。
【INFO】 《得閒飲茶》 地址: 深水埗福榮街116-118號地舖 營業時間: 星期一至日 07:00 - 23:00
點心推介 | 6. 農
去開科學園，諗唔到食咩都可以飲茶，仲可以帶埋寵物到訪。黑毛豬叉燒色澤鮮艷，用麥芽糖炭烤好香甜，配白飯一流。名為螞蟻上樹嘅係肉碎炒粉絲，灑上櫻花蝦增加口感，香氣四溢，粉絲煮得啱啱好。
【INFO】 《農》 地址: 沙田白石角香港科學園第二期科技大道西10號浚湖樓地下S041A號舖 營業時間: 星期一至日 11:30 - 15:00 17:30 - 21:00
點心推介 | 7. 點心到
茶餐廳風格，價錢親民，係食下午茶嘅不二之選。卡通流心芋蓉包造型可愛，濃厚芋蓉味，一口咬落軟綿綿。另外金錢肚醃得入味，份量足料，蘿蔔入口即溶。
【INFO】 《點心到 (廟街)》 地址: 佐敦廟街286-298號華志大廈地下6-8號舖 營業時間: 星期一至日 07:30 - 21:30
點心推介 | 8. 上陽樓
環境裝修高雅利落，燈光柔和，坐落好舒服。上陽樓嘅梅菜扣肉做得非常正宗，油脂同醬汁層層滲透，百味交融。彩虹鮮蝦餃顏色繽紛好啱打卡，以金箔點綴，精緻之餘味道鮮甜爽彈。
【INFO】 《上陽樓》 地址: 大圍車公廟路18號圍方3樓329號舖 營業時間: 星期一至日 10:00 - 22:30
點心推介 | 9. 名都酒樓
自1990年開業，屹立金鐘多年，歷史悠久無人不曉。係香港少數仍然有點心車傳統文化嘅酒樓，係上一輩香港人嘅回憶。燒賣外觀飽滿，包住滿滿嘅豬肉餡。 鯪魚球充滿鮮味，口感爽滑。附近返工人士不妨到訪，重拾香港傳統用餐方式。
【INFO】 《名都酒樓》 地址: 地址金鐘金鐘道95號統一中心4樓 營業時間: 星期一至日 08:00 - 15:30 17:30 - 22:00
點心推介 | 10. 唐閣
人均唔洗一千蚊食到米芝連三星中菜，真係好少有，相當抵食。唐閣片皮雞係鎮店之寶，雞皮香口薄脆，散發陣陣雞油香。仲一定要試焗蟹蓋，加入大量新鮮蟹肉，足料程度好震撼。
【INFO】 《唐閣》 地址: 尖沙咀北京道8號香港朗廷酒店1樓及2樓 營業時間: 星期一至五 12:00 - 15:00 18:00 - 23:00 星期六至日 11:00 - 15:00 18:00 - 23:00
點心推介 | 11. 留園雅敘
想食上海點心，留園雅敘幫到你。餐廳設有卡位，空間感十足，坐低傾計好舒服。招牌小籠包皮薄餡靚，湯汁飽滿鮮甜，肉餡份量足夠。生煎包底部甘香香脆，一咬會爆汁，食完一口接一口，難以抵抗。
【INFO】 《留園雅敘》 地址: 灣仔駱克道54-62號博匯大廈3樓 營業時間: 星期一至日 12:00 - 15:00 18:00 - 23:00
點心推介 | 12. 明閣
酒店飲茶質素不嬲有保證，又一間米芝蓮星級餐廳！環境古色古香，地方寬敞有氣派。明閣叉燒蜜汁清甜香淡，烹調不溫不火。拍青瓜花雕凍鮑魚肉質柔軟，花雕味平均清香，非常開胃。
【INFO】 《明閣》 地址: 旺角上海街555號香港康得思酒店6樓 營業時間: 星期一至五 11:00 - 14:30 18:00 - 22:30 星期六至日 10:30 - 15:30 18:00 - 22:30
點心推介 | 13. 樂意點心
裝潢以深綠色暗花為主軸，傳統得來又不失時尚，正正展現香港點心文化嘅新舊交融。招牌三色小籠包超吸睛，包括原味，川辣同松露，全部都熱烘烘，湯汁飽滿。川辣味滲入小籠包，加入刺激感同時味道又好合拍。蟹籽燒賣爽口彈牙，係傳統嘅風味。
【INFO】 《樂意點心》 地址: 尖沙咀漢口道19-21號漢宜大廈地下C號舖 營業時間: 星期一至日 08:15 - 23:45
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
