黑白大廚食譜 | 最近Netflix大熱劇集《黑白大廚:料理階級大戰》掀起話題，節目搵嚟100位大廚進行對決，每位技術都相當高超，實在令人都睇到流晒口水。當中小編就好想試栗子tiramisu，仲有超彈牙嘅香蒜意粉，想喺屋企試吓親身整嘅，不妨參考以下5大食譜！
圖片來源：Netflix截圖、YouTube@백종원 PAIK JONG WON | 撰文：Hedy
黑白大廚搵嚟100位大廚進行對決，當中80位係隱藏喺民間嘅廚師，佢哋被稱為黑湯匙，同時大家都只能以頭銜稱呼，無法得知全名。而另外20位就係為人熟悉，喺業界亦攞過唔少獎嘅主廚，被稱為白湯匙，地位相對上較高而且姓名亦喺節目中公開。第一輪嘅對決由80位廚師對決，由評判有韓國「廚神」之稱嘅白種元以及韓國唯一米芝蓮三星餐廳Mosu主廚安成宰，從中選出20人，落敗人士只可以攞住自己嘅姓名牌離開。最後被選中嘅20位黑湯匙先可以同白湯匙進行團體賽以及個人賽對決。
黑白大廚食譜公開 | 1. 橄欖油香蒜意粉
用最簡單嘅食材製作美食其實相對上超考驗廚師嘅技巧！不過節目入面竟然有一位主廚，煮出睇落平平無奇嘅橄欖油香蒜意粉，就連超挑剔嘅安成宰都讚不絕口？相信大家睇節目嘅時候，都希望可以從中學習到唔少新穎嘅煮法，而當中最簡單可以跟住煮嘅係由「隱藏天才」所製作嘅橄欖油香蒜意粉！大家平時煮意粉都可能會煮到全熟，但其實只需要用扁意粉煮3分鐘，再將意粉盛起放上鋁盤，加上橄欖油，再用另一個鋁盤蓋好，利用餘溫令意粉慢慢煮熟，再加上唔同嘅調味就可以食到超級彈牙嘅意粉！
黑白大廚食譜公開 | 2. 栗子tiramisu
喺《黑白大廚》入面，其中喺敗部復活賽，選手需以便利店食材嚟製作食物，而當中拿坡里黑手黨就整咗栗子Tiramisu，成功晉級，更被譽為係酒店級數嘅甜品～之後大家旅行去CU便利商店亦都有機會食到呢款甜品，正開發中。唔想等嘅大家就可以自己親自落手整：
材料：栗子零食1袋、牛奶500ml、奶油乳酪250g、全麥餅乾4塊、太妃堅果拿鐵、鮮奶油400ml、朱古力、燕麥脆片
步驟：
1. 將栗子零食同牛奶以中細火加熱，其後再用攪拌機磨成栗子泥
2. 栗子泥加入奶油乳酪混合後再放入雪櫃冷凍30分鐘，冷卻後再加入鮮奶油攪拌成栗子奶油
3. 將4塊全麥餅乾與太妃堅果拿鐵，混合製作成底料，再與栗子奶油堆疊成3層
4. 用微冷凍嘅朱古力磨成碎，再鋪灑喺表面
5. 將炒至酥脆嘅燕麥脆片放喺表層中間就完成
黑白大廚食譜公開 | 3. 泰式炒即食麵
本身私下超鐘意食公仔麵嘅「料理狂人」，以自己平時飲酒後煮嘅宵夜融合埋泰國美食，製作出超惹味嘅即食麵！
材料： 雞胸肉80g、蟹棒100g、螺肉80g、洋蔥100g、蒜頭3至4粒、芽菜80g、植物油、蠔油2茶匙、公仔麵2包、公仔麵調味粉1.5茶匙、糖1茶匙、老抽1.5茶匙、檸檬汁、雞蛋1個
步驟：
1. 將即食麵、芽菜放入熱水烚，之後再放入冰水中冷卻，再去除水分
2. 將洋蔥、蒜頭切片
3. 以植物油炒洋蔥及蒜頭，再加入老抽快速翻炒
4. 將即食麵調味粉加入一齊炒至融化
5. 加入雞胸肉、蟹肉棒、螺肉炒勻，再放入麵同芽菜一齊炒
6. 灑上糖以及檸檬汁
7. 再加上一個荷包蛋就完成
黑白大廚食譜公開 | 4. 油潑麵
被譽為港式點心女王嘅鄭智善，就直接將即食麵製作成哈爾濱特色菜油潑麵，並以青陽辣椒取代辣椒粉，香氣十足！
材料：辣椒6個、蒜頭3個、醬油20g、糖20g、熟餃子餡50g、粟米2湯匙、洋蔥 1個、即食麵1包、即食麵調味半包、食用油
步驟：
1. 將青陽辣椒乾煎至焦香
2. 將辣椒以及蒜頭切碎，與醬油、糖和熟餃子餡混合，整成調味醬
3. 將即食麵煮熟並瀝乾水分，放喺碗入面
4. 放入粟米、洋蔥、半包調味料以及已製成嘅調味醬
5. 最後將熱油淋喺麵條上
黑白大廚食譜公開 | 5. 大蒜即食麵
除咗以上食譜公開之外，評判之一嘅安成宰亦都喺YouTube公開咗一個方法可以直接令即食麵味道昇華！只要喺煮即食麵之前，先準備好兩至三粒蒜頭，跟住以下步驟做就可以將湯底變得更濃郁！
步驟：
1. 將蒜頭切走蒂頭，直接放入焗爐直至表面微焦
2. 將微焦嘅蒜頭放入冷水入面煮，煮軟後將其撈出並壓碎
3. 加入即食麵嘅調味後再煮
4. 放入即食麵再將蒜皮取出，再等待即食麵煮軟後完成
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
