【 麵包店推介 】近年有好多前酒店餅師自立門戶，帶住五星級嘅經驗同技術，開設個人烘焙品牌。今次編輯就為各位麵包迷介紹6大前酒店餅師主理烘焙店，包括AW Patisserie、James BonBon Bakery、Doughman、KOL Bakery、ABC Bakery、Sour Dough，等大家以更相宜嘅價錢品嚐大師級水準，即睇以下地址同詳細介紹啦！
圖片來源：IG@aw_patisserie、IG@james_bonbon_bakery、IG@doughmanhk、Openrice@迷你小兵、Openrice@CarinaB、Facebook@Sour Dough、ABC Bakery｜撰文：Icy
麵包店推介1. AW Patisserie
泡芙店AW Patisserie一直都係以網店形式營業，而近日終於係中環開設第一間實體店喇！店舖嘅主理師傅畢業於法國巴黎藍帶廚藝學院，曾經係本港五星級酒店工作，以法式手法重新演繹港式味道。
（圖片來源：Instagram @aw_patisserie）
AW Patisserie主打流心麻糬泡芙，並推出多款特別口味，例如黑芝麻湯圓、沖繩黑糖珍珠奶茶、腐竹薏米、糖不甩等等，巧妙地將港式風味融入西式甜品當中。尤其係糖不甩泡芙，裏面有粒粒香脆花生同煙韌麻糬，加上流心花生醬，外脆內軟，味道豐富多層次！
（圖片來源：Instagram @aw_patisserie）
AW Patisserie亦會推出精美蛋糕，特別推介珍珠奶茶海鹽奶蓋流心蛋糕，面層鋪滿粒粒黑糖珍珠，香軟嘅海綿蛋糕配上海鹽奶蓋流心，淨係聽到都流口水喇！
蛋糕款式新穎又好味，珍珠奶茶控唔可以錯過！（圖片來源：Instagram @aw_patisserie）
【INFO】
《AW Patisserie》
地址：中環皇后大道中93號中環街市1樓Shop 122-123 Kiosk 5
時間：星期一至五 12:00-19:00 / 星期六、日及公眾假期 12:00-18:00
價錢：https://bit.ly/3Ql2IAY
麵包店推介2. James BonBon Bakery
相信好多人都唔會對James BonBon Bakery陌生，店舖由前四季酒店西餅師傅主理，主打多款口味嘅麻糬波波，每日出爐時間為中午12點半，經常吸引一大班客人排隊捧場。
（圖片來源：Instagram @james_bonbon_bakery）
James BonBon Bakery嘅菠蘿皮麻糬波波採用無添加嘅日本麵粉同天然酵母製作，外脆內軟口感煙韌，有多款口味選擇，例如伯爵茶、焦糖、抹茶、榛子醬、朱古力、芝士，仲有現時推出嘅新品斑斕椰絲味等等。
（圖片來源：Instagram @james_bonbon_bakery）
店主於年初於銅鑼灣原有麵包店嘅附近開設ames BonBon Cafe，供應超過100款甜品，例如係暖笠笠嘅麻糬泡芙裏面加入冰凍雪糕，或者斑蘭蛋糕配火焰雪糕，款式好新穎！
大家可以係cafe裏面坐低慢慢享受甜品！（圖片來源：Instagram @james_bonbon_bakery）
【INFO】
《James BonBon Bakery》
地址：銅鑼灣邊寧頓街9-11號登龍閣地下C1鋪
時間：星期一至日 07:30-22:30
麵包店推介3. Doughman Bakery & Coffee
Doughman Bakery & Coffee於2022年尾開業，三位店主大有來頭，曾經係香格里拉酒店擔任餅師，擁有20多年經驗。餅店主打多款西式精美糕餅以及咖啡飲料，以後大家就可以更方便地品嚐到大師級出品！
（圖片來源：Instagram @doughmanhk）
店內麵包選用法國牛油同日本麵粉製成，保持水準。最吸引莫過於酥皮類麵包，牛角包外層金黃，蜂巢內層鬆脆。
（圖片來源：Instagram @doughmanhk）
而貝果亦係賣點之一，脹卜卜嘅外型包住香甜餡料，例如黑芝麻同抹茶紅豆麻糬，煙煙韌韌好有嚼勁㗎！
（圖片來源：Instagram @doughmanhk）
【INFO】
《Doughman Bakery & Coffee》
地址：荔枝角長義街10號昌隆工業大廈地下
時間：星期一至五 07:30-20:00 / 星期六、日及公眾假期 08:30-20:30
麵包店推介4. KOL Bakery
位於葵興區嘅KOL Bakery由出身酒店餅房嘅兩兄弟主理，店主為咗製作更多打破傳統框架嘅糕餅，因此自立門戶一手一腳打理店舖。
（圖片來源：Openrice @迷你小兵）
店內最出名就係拉絲麻糬包（$18），包身以湯種發酵，而唔係跟一般做法咁將酵母打入麵糰，所以口感更實淨。另外店主係製作麻糬時會加入更多水份，務求令麻糬更軟滑更有拉絲效果。
（圖片來源：Openrice @CarinaB）
麻糬包會係每日早上7點以及11點出爐，共有5款口味，包括宇治綠茶、芋香、爆漿朱古力，仲有好特別嘅泡菜同糖不甩口味。糖不甩麻糬包加入滿滿嘅花生醬、花生碎及椰絲等餡料，口感好豐富！
（圖片來源：Openrice @CarinaB）
【INFO】
《KOL Bakery》
地址：葵涌葵安道1號KCC2地舖
時間：星期一至五 07:00-19:30
麵包店推介5. ABC Bakery
ABC Bakery由前半島酒店師傅主理，一直大受歡迎，至今已經開設共六間分店。為咗製作出健康又新鮮嘅糕餅，全店產品均無添加防腐劑，使用法國T45麵粉混合自家配方，令客人食得安心。
（圖片來源：ABC Bakery）
店舖主打糕餅有芝士麻糬波波、酥脆牛角包、香甜嘅日式哈密瓜包、可麗露、鮮果撻等等。店主更將英式下午茶必備嘅招牌英式鬆餅帶到麵包店中，入口濕潤，充滿牛油香，配上英國製Clotted Cream或果醬，大家毋須去酒店都可以品嚐到星級味道！
（圖片來源：ABC Bakery）
【INFO】
《ABC Bakery》
地址：元朗安寧路41-45號安定樓地下A號舖
時間：星期一至日 08:00-20:00
地址：上水上水廣場2樓206號舖
時間：星期一至日 08:00-19:30
地址：屯門海皇路23號御海灣地下21號舖
時間：星期一至日 07:30-20:00
地址 : 將軍澳唐俊街28號海天晉滙地下G18-19號舖
時間 : 星期一至日 11:00-19:30
地址：將軍澳坑口重華路8號東港城2樓259B號舖
時間：星期一至日 11:00-20:00
地址：南昌站V·Walk商場2樓70號舖
時間：星期一至日 08:00-21:00
麵包店推介6. Sour Dough
位於金鐘嘅Sour Dough由瑞士知名糕點師Gérard Dubois創立，店內所有糕餅都以酸種製作方式天然發酵而成，比起傳統麵包更容易被消化同有營養。湖水綠色嘅店面充滿歐陸風格，提供半露天座位，感覺休閒舒適。
湖水綠色嘅店面充滿歐陸風格，最適合假日同朋友係度嘆下午茶！（圖片來源：Facebook @Sour Dough）
大玻璃櫃展示琳瑯滿目嘅麵包，例如鮮果撻、法式焦糖酥餅、煙燻牛肉酸種包、烤雞芝士包等等。另有亦供應沙律、甜品杯同飲品，特別推薦焙茶latte，口感香醇幼滑，充滿奶香！
（圖片來源：Facebook @Sour Dough）
另外店舖會推出比較特別嘅款式，例如酸種版本嘅肉桂核桃車輪包，上面嘅醬汁仲有流心瀑布效果，又好味又打卡able！
（圖片來源：Facebook @Sour Dough）
【INFO】
《Sour Dough》
地址：灣仔皇后大道東80號堅雄商業大廈地下2-3號舖
時間：星期一至五 08:30-20:30
