香港Pizza推介 | 召喚所有Pizza控！唔使去旅行都可以留喺香港食到高質嘅Pizza！就算係素食人士都唔驚，同樣有餐廳提供純素Pizza，咁就啱晒唔同飲食習慣嘅人～當中邊間更被譽為香港最好食嘅Pizza？
圖片來源：Openrice@fatkonggirl、RheaChim、heimen、christinafoodhunt、Tiffanynyt、aclsarah21、Flogwithme、bunny_woof、joyceclt、MakEmily4184、肥肥大肚腩、rossipizza、marz333、Kristy_ng、mickhl、sunnylauu、Foodie.L、Pleplev3v、nonobobo、Hkfoodiary852、sogoodwithfood、girls.hkk、Chaoranzhuang、eatwithhangryal、RheaChim、GigiLun820、Sasa 0104、tiffshek、愛吃達人 | 撰文：Hedy
香港Pizza | 1. Fiata Pizza
Fiata Pizza榮獲亞太區Top 50 pizza第5名，更被喻為係香港最好食Pizza嘅第一名！餐廳主打拿坡里Pizza，選用由義大利進口最新鮮D.O.P嘅配料，再以75%嘅水分再加上510度高溫用心製成Pizza。獲獎嘅Pizza包括A’ SALSICCIA以及ESTATE等，前者以拿坡里芝士加入意大利香腸、奶油及洋蔥等製造而成，而後者就以巴馬火腿配搭奶油以及洋蔥，每款Pizza入口煙韌，更散發濃郁嘅香味，令人每食一啖都感到驚嘆！
【INFO】 《Fiata Pizza》 營業時間：星期一至日 中午12:00至下午15:30；晚上18:00至晚上22:30 地址：中環蘇豪士丹頓街2號地舖
香港Pizza | 2. little Napoli
little Napoli嘅老闆嚟自意大利拿坡里，就連食材都係由家鄉進口。當中最特別嘅係little Napoli用傳統石窯烤爐去整pizza，用高溫速烤90秒，保證每個Pizza都係新鮮出爐。當中Margherita和微辣Vesuviana口味最受大家歡迎，每款Pizza正宗得嚟又夠好味，難怪會獲得米芝蓮必比登推介！
【INFO】 《little Napoli》 營業時間：星期二下午17:00至晚上21:00 ；星期三至日 中午2:00至下午15:00 下午17:00至晚上22:00（星期一休息） 地址：跑馬地景光街8號景光樓地舖
香港Pizza| 3. Motorino
Motorino主打拿坡里傳統薄餅，所有Pizza都會喺特製嘅STEFANO FERRARA 烤爐中烤製而成，90秒內用極高溫烤焗，好味得嚟又帶點焦香，別有一番風味！除咗有「意式辣肉醬」以及「特級四式芝士」Pizza外，仲有唔少嘅特製薄餅，當中包括「星星薄餅」以及「意國風情」等，想體驗傳統嘅拿坡里薄餅必去！
【INFO】
《Motorino》
營業時間：星期一至四、日、公眾假期以及公眾假期前夕：中午12:00至晚上22:00；星期五至六：中午12:00至晚上23:00
地址：中環蘇豪些利街14號地舖
香港Pizza | 4. La Camionetta
喺中環蘇豪區仲有一間必試嘅Pizza，如果平時行過就可以去試試La Camionetta，平日Lunch Set都只係$138，就可以食到沙律、8吋Pizza再加埋迷你Tiramisu甜品，真係超抵！小編推薦大家可以試「La Camburrata」，由莫扎里拉芝士、車厘茄、意大利巴馬火腿及新鮮布拉塔芝士製成，食落有芝士嘅奶香味，再加上多種配料，口感完美！
【INFO】 《La Camionetta》 營業時間：星期一中午12:00至凌晨00:00 地址：中環蘇豪伊利近街12A號地舖
香港Pizza | 5. Rossi’s Pizza & Smoked Meats
想食正宗嘅拿坡里披薩，其實都好講求其麵糰比例、壓平厚度以及烘烤溫度等，而Rossi’s Pizza所有食材都得到正統拿坡里披薩協會 (AVPN)認證，咁大家就絕對可以食到最正宗嘅Pizza！行過西貢嘅大家都一定要試試，建議第一次食嘅大家可以試DIAVOLA意大利辣肉臘腸薄餅，Pizza有滿滿嘅水牛芝士同辣肉臘腸，咬落去夠晒惹味同juicy！
【INFO】 《Rossi's Pizza & Smoked Meats》 營業時間：星期二至四 中午11:00至晚上20:00；星期五至日及公眾假期：中午11:00至晚上21:00（星期一休息） 地址：西貢福民路58-72號高富樓地下22號舖
香港Pizza | 6. Mayse Artisan Bakery
就算係素食人士，都可以選擇多款口味嘅Pizza！餐廳入面嘅食物都係純素，如果大家踩單車經過大美督附近都可以一試！除咗可以買手工麵包之外，更可以一試佢地嘅Pizza，餅底以小麥粉製成，再配搭自家製番茄醬，相當惹味！
【INFO】 《Mayse Artisan Bakery》 營業時間：星期一至日 早上08:00至晚上19:00 地址：大美督路64號地舖
香港Pizza | 7. Mother of pizza
Mother of pizza每次都非常多人幫襯，最出名就係即製手工Pizza以及香蒜芝士焗麵包。Pizza有2款尺寸提供，包括13吋以及18吋，大家亦都可以選擇雙拼口味，咁就可以一次過試晒多種口味！Pizza夠煙韌之餘，放落口每啖都有豐富嘅配料，同時餅底夠薄，食落就唔會覺得滯。
【INFO】 《Mother of pizza》 營業時間：星期一至日上午11:30至晚上22:00 地址：銅鑼灣禮頓道13-19號地舖
香港Pizza | 8. Jacomax
相信大家都有聽過Jacomax最出名嘅藍芝士蘋果薄餅，帶有蘋果鮮甜味之餘，又用芝士鹹味中和，帶畀人相當新鮮嘅感覺，仲可以有助消除油膩同飽滯感！即使呢個組合睇落唔係好夾，但試過嘅人就會鍾意！
【INFO】 《Jacomax》 營業時間：星期一至日中午12:00至晚上22:00 地址：銅鑼灣渣甸街50號渣甸中心地舖
香港Pizza | 9. Mama Mia! Pizzeria
去九龍城唔一定淨係食泰國菜！呢間位於九龍城新開嘅Pizza鋪頭Mama Mia! Pizzeria，餐廳主打手工薄餅，當中包括最常見嘅辣肉腸、瑪格麗特以及芝士等。當中更有特別嘅口味，港式咖喱牛腩，唔知大家又會唔會試呢？每款Pizza更會配送自家製蒜蓉香軍醬料，9吋嘅Pizza都只係$108，性價比超高！
【INFO】 《Mama Mia! Pizzeria》 營業時間：星期一至日中午12:00至晚上21:30 地址：九龍城南角道5號地舖
香港Pizza | 10. BACI Trattoria · Bar
BACI Trattoria · Bar由意大利總處主理，為大家提供正宗意式風味嘅食物，除咗有Pizza之外，亦設有海鮮吧以及沙律吧等，啱晒想一次過體驗多種食物嘅大家～Pizza更係即叫即整，每款都係新鮮出爐，更可以喺度享受接近3個鐘嘅Brunch！
【INFO】 《BACI Trattoria · Bar》 營業時間：星期一：早上11:30至凌晨01:00；星期二至五：早上11:30至凌晨02:00 星期六：中午12:00至02:00 星期日：中午12:00至凌晨02:00 地址：中環蘭桂坊德己立街30-32號加州大廈地舖
香港Pizza | 11. Pizza project
Pizza project絕對喺性價比之選，Lunch Set唔使$200就食到前菜、Pizza、飲品同甜品，夠晒飽！對於麩質過敏人士都可以加錢選擇無麩質麵團，超貼心！
【INFO】 《Pizza project》 營業時間：星期一至四早上11:30至晚上22:00；星期五至六早上11:45至晚上22:30；星期日早上11:30至22:00 地址：灣仔星街5號地舖
香港Pizza | 12. Alice Pizza
想一個人自己食Pizza嘅時候就可以去Alice Pizza，每款方形薄餅都係按重量收費，啱晒平時食得唔多嘅朋友！薄餅更有分為5大類，包括意式經典、創意風味、純素（Vegan）、素食（Vegetarian）及甜食薄餅，當中最熱賣嘅係Margherita以及Italiana！
【INFO】 《Alice Pizza》 營業時間：星期一至四、五、公眾假期、公眾假期前夕：中午12:00至晚上22:00；星期五至六：中午12:00至晚上22:00 地址：灣仔皇后大道東92號地舖
香港Pizza | 13. Amalfitana
位於淺水灣The Pulse入面嘅Amalfitana，絕對係大家放空到時嘆美食嘅地方，環境清幽可以令人放鬆。同時餐廳內設有披薩窯爐，主打正宗意大利披薩，每款食材例如莫札瑞拉奶酪等，都係選用嚟自意大利食材！
【INFO】 《Amalfitana》 營業時間：星期一至日早上11:00至晚上21:00 地址：淺水灣海灘道28號The Pulse L1樓105號舖
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
