最近譚仔三哥推出麻辣燙，再次掀起食麻辣燙嘅熱潮。麻辣燙源於中國四川地區，湯底味道麻辣鮮香，可自行配搭多元化嘅食材及醬料，豐儉由人，所以一直以來都非常受歡迎。小編整合12大香港抵食麻辣燙粉麵，最平$39就食到，即睇以下推介啦！
圖片來源：譚仔三哥、Openrice @Kasen Zee、Openrice @wtf._.99on、小紅書 @菜菜今天吃了嗎、Openrice @美食字典、Openrice @or#ta67144230、Openrice @mayloveeating、Openrice @Foodiescouples、Openrice @yantung117、Openrice @amerio、Openrice @ERHAN ZHENG、Openrice @eat tmr、Openrice @kakiku.bae、Openrice @zebra1223、Openrice @Am-NgEting | 撰文：Icy
香港抵食麻辣燙粉麵 | 1. 三哥燙
譚仔三哥推出麻辣燙，除咗有8款「香、麻、辛、辣」嘅招牌原創湯底，仲提供逾60款食材及麵底選擇及配搭，按重量收費，例如風琴豆腐串、珍寶蟹柳、鴨血、蝦、魷魚、蜆、寬薯粉、公仔麵等。大家可將食材交由譚仔姐姐處理，或者以打邊爐模式自行「燙」，配上蔥花、芫茜、酸菜及秘製醬汁，夠晒惹味！
【INFO】 三哥燙 地址：元朗鳳翔路2-6號YOHO PLUS加點1樓C110號舖 營業時間：11:00-21:30 價錢：每100克$16.8 / 精選食材每碟$18
香港抵食麻辣燙粉麵 | 2. 串噹噹
一講起紅磡人必食宵夜，串噹噹一定榜上有名。串噹噹提供逾30款食材及麵底選擇及配搭，例如冬菇、蘿蔔、牛柏葉、土魷鬚、肥牛、雞肉、刀削面、粉條等等，5個餸加粉麵價錢只係大概$50，配上惹味麻辣汁，大大兜好足料抵食！
【INFO】 串噹噹 地址：紅磡蕪湖街78號地下A號舖 營業時間：星期一至四 11:30-14:30、17:30-00:00 / 星期五11:30-14:30、17:30-01:00 / 星期六 17:30-01:00 / 星期日 17:30-00:00 價錢：5個餸加粉麵$50
香港抵食麻辣燙粉麵 | 3. OK辣
至於另一間紅磡人必食宵夜就係OK辣，營業到凌晨，啱晒各位貓頭鷹。食物性價比超高，三餸一麵只需大概$49。唔好睇佢店舖細細間，食材及麵底選擇都頗多，例如海帶、韮菜、雞翼、滷味雞腎、豬腩肉、豬大腸等等，而川味湯底辣度及麻度都好足！
【INFO】 OK辣 地址：紅磡蕪湖街58號金達閣地下2號舖 營業時間：星期一至六 18:00-04:00 價錢：三餸一麵$49
香港抵食麻辣燙粉麵 | 4. 麻辣小兵
位於旺角鬧市嘅麻辣小兵，主打抵食麻辣燙及麻辣拌，3個餸加粉麵只需大概$39，提供逾60款食材及麵底選擇及配搭，例如嫩牛肉、黑毛肚、滷水大腸、蝦膠卷、鵝腸、爆汁牛丸等等，自選湯底辣度麻度。至於麻辣拌味道更濃郁，加上麻醬及醋，充滿正宗東北風味，啱晒鍾意重口味嘅朋友！
【INFO】 麻辣小兵 地址：旺角通菜街1M-1T號華發大廈地下E號舖 營業時間：星期一至日 12:00-22:00 價錢：3個餸加粉麵$39 / 7個餸加粉麵$59
香港抵食麻辣燙粉麵 | 5. 有間麻辣燙
位於九龍灣嘅有間麻辣燙，主打屬於香港人嘅麻辣燙，湯底每日熬足5小時，再融入本港特色食品，例如陳皮魚蛋、滷味、餃子、珍寶蟹柳等等。小編推薦大家選擇菇菇湯底或牛骨湯底，熬得非常香濃，加上辣汁及芫荽後，味道更添層次感！
【INFO】 有間麻辣燙 地址：九龍灣常悅道21號Eastmark 1樓2號舖 營業時間：星期一至日 11:00-20:30 價錢：每100克$16.8
香港抵食麻辣燙粉麵 | 6. 麻辣串串香
位於荃灣嘅麻辣串串香，食物質素及價錢都好有水準，食材及麵底選擇頗多，例如水魷魚、鮮魚腩、豬潤、肥牛、湯餃子、豬紅等等。有選擇困難症嘅朋友，可直接選$55套餐，有8個餸，包括魚蛋、魚皮餃、牛腩、墨魚丸等等，自選酸辣程度，大大份好滿足！
【INFO】 麻辣串串香 地址：荃灣河背街84號地下A1號舖 營業時間：星期二至日 12:00-00:30 價錢：8個餸套餐$55
香港抵食麻辣燙粉麵 | 7. 川婆婆
川婆婆嘅招牌重口味麻辣湯底，用上多種香料，經過大火熬煮而成，非常真材實料～4個餸加粉麵價錢只係大概$48，配料可選手打魚蛋、醬爆豬肉丸、年糕、鮮牛肉、羊肉、鴨血、嚮鈴卷、芋絲等等，配上紅薯粉同蒜蓉，好掛汁惹味！
【INFO】 川婆婆 地址：觀塘東廣場1樓109號鋪 / 觀塘廣場地下G24-G25 / 金馬倫道19號地下 / 旺角中心2樓SB04號 營業時間：觀塘東廣場 - 星期一至日 11:00-21:30 / 觀塘廣場 - 星期一至日 11:30-22:00 / 金馬倫道 - 星期一至日 11:30-23:00 / 旺角中心 - 星期一至日 12:00-22:00 價錢：4個餸加粉麵$48
香港抵食麻辣燙粉麵 | 8. 冒喜
位於紅磡嘅冒喜主打川味粉麵，6個餸加粉麵價錢大概$66，配料選擇包括潮汕蒜香墨魚丸、蟹籽蟹粉丸、五花腩、竹輪卷、鵪鶉蛋、豆腐串、貴州丁家脆哨、煙靭土豆粉等等，款式比較特別。建議大家記得點秘製醬汁，充滿香濃嘅蒜味！
【INFO】 冒喜 地址：紅磡蕪湖街83號Y83地下G05A號舖 營業時間：星期一至日 12:00-22:00 價錢：6個餸加粉麵$66
香港抵食麻辣燙粉麵 | 9. 馬姐重慶麻辣燙
位於牛頭角嘅馬姐重慶麻辣燙主打四川粉麵，雖然店舖環境比較細，但佢嘅麻辣湯底值得一試。湯底香濃充滿蒜味，就算BB辣都比起市面上嘅辣，好適合重口味朋友。$30粉麵底再加錢自選配料，選擇包括豆腐串、牛柏葉、冬瓜、萵筍、薯粉等等。
【INFO】 馬姐重慶麻辣燙 地址：觀塘通明街7號地舖 營業時間：星期一至日 11:30-01:00 價錢：$30粉麵底再加錢自選配料
香港抵食麻辣燙粉麵 | 10. 成都冒菜
位於元朗嘅成都冒菜主打平民化價錢嘅冒都菜，招牌成都麻辣湯底可配上多款配料，例如魚腐、豬大腸、牛柏葉、新鮮魚片、手打鯪魚滑、黑豚肉、仲有比較少見嘅海膽丸等等，6個餸加粉麵價錢大概$52，湯底好足麻辣香味！
【INFO】 成都冒菜 地址：元朗屏昌徑14-48號聯發樓地舖 營業時間：星期一至日 11:00-22:00 價錢：6個餸加粉麵$52
香港抵食麻辣燙粉麵 | 11. 忘不了麻辣燙
位於深水埗西九龍中心美食廣場嘅忘不了麻辣燙，湯底香濃，辣度亦十足，而且價錢合理。湯底可選招牌麻辣湯、椒麻湯、藤椒湯等等，配料包括魷魚、魔芋、薯仔片、木耳、豆腐串、鹵水牛腱等等，6個餸加粉麵價錢大概$88，深受附近街坊歡迎。
【INFO】 忘不了麻辣燙 地址：深水埗欽州街37K號西九龍中心6樓美食廣場6FC08號舖 營業時間：星期一至三、五至日 11:30-21:00 價錢：6個餸加粉麵$88
香港抵食麻辣燙粉麵 | 12. 串爆
位於旺角嘅串爆主打麻辣燙串串香，用竹簽串起配料，放入火鍋煮熟，味道比起一般麻辣粉麵更醇厚。配料可選成都小香腸、魷魚、雞軟骨、鴨胸肉、魔芋、麻辣牛肉等等，款式超過40款，自選麻辣程度，最高辣度為魔鬼辣，鍾意食辣嘅朋友不妨去挑戰一下！
【INFO】 串爆 地址：旺角廣華街2-20號翠園大樓地下2號舖 營業時間：星期一至日 13:00-00:00 價錢：120分鐘放題$300一位（連服務費）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
