香港甜品2023｜夏天除咗去沙灘玩水消暑，仲可以去食吓 刨冰 ，真係透心涼㗎！今次就為大家搵嚟4間最近人氣高企嘅打卡 刨冰店 ，刨冰外貌好睇得嚟又好食。有多款唔同嘅茶味及水果刨冰，當中仲有超抵食嘅刨冰，每碗$52就有交易，平過一般刨冰一半啊～想知喺邊度同埋有咩口味，就要睇埋落去啦！
圖片來源：官方圖片、IG@flogwithme、IG@cin_eateat、IG@bill_mok_food｜撰文：Athena
必食打卡刨冰店推介 1. SoSoSo Kakigori
呢間日式刨冰店今年4月新開張，位於上環同西營盤中間，店舖附近都比教清靜，適合大家夏天同朋友一齊去chill吓，嘆返個清涼刨冰。店舖主打各款以日本天然水製成嘅刨冰，大部分口味都以水果為主，夠晒清爽！而且每一款刨冰嘅頂層都會鋪上沖繩海鹽芝士奶蓋，味道更有層次～
小店供應8款份量十足嘅刨冰，每款價錢均為$95。當中有經典人氣必試款式宇治綠茶白玉，仲有夏日最啱食嘅西瓜、芒果、白桃、士多啤梨及藍莓口味，味道酸酸甜甜好開胃！另外仲有比較少見嘅沖繩金檸刨冰同奇異果刨冰，夠晒新穎～
另外，佢哋嘅蕨餅同樣咁出色！分別有黃豆粉味及抹茶味，兩款售價為$38。
SoSoSo Kakigori 除咗供應刨冰同小食之外，仲有幾款水果梳打特飲、沖繩香檸生薑熱飲及冷萃咖啡，好啱消暑！
【INFO】 SoSoSo Kakigori 地址：上環荷李活道224-226號地舖 營業時間：星期二至日 12:00 - 19:00（星期一休息）
必食打卡刨冰店推介 2. Shari Shari Kakigori House 氷屋
呢間超人氣嘅日式刨冰店，相信鍾意食甜品嘅你一定聽過。店舖由日籍北海道老闆主理，並主打各款以純淨日本水製成嘅刨冰。刨冰款式種類繁多，而且口感綿密幼滑，所以店舖長期滿座並大排長龍。佢哋嘅menu亦會定期更換，保證各位食客每次去都會有新驚喜！各位想品嚐嘅話，就記得早啲去排隊啦！
多款刨冰口味都係Shari Shari 受歡迎嘅款式，包括抹茶忌廉焦糖配白玉($110)、伯爵奶茶刨冰($100)、士多啤梨配北海道牛乳奶凍($110)等。另外仲有多款常規款式及期間限定口味，店舖曾經推出過「櫻花香草刨冰」、「日本甘酒味配若桃」、「士多啤梨Tiramisu味配佐賀士多啤梨」、「開心果味配佐賀士多啤梨」等，款款都好有創意同特色。每款刨冰都可因應個人喜好，另外選配唔同嘅配料。
排咁耐隊，除咗食日式刨冰之外，仲可以優惠價配搭唔同嘅小食。包括：抹茶蕨餅(+$48)、焙茶芝士蛋糕(+$45)及日本柚子芝士蛋糕(+$45)。每款刨冰都可因應個人喜好，另外選配唔同嘅配料。
【INFO】 Shari Shari Kakigori House 氷屋 銅鑼灣分店 地址：銅鑼灣加路連山道13號地舖 營業時間：星期一至日 13:00 - 21:00 中環分店 地址：中環奧卑利街11號地舖 營業時間：星期一至四及日 13:00 - 22:30；星期五至六 13:00 - 23:00
必食打卡 刨冰店 推介 3. 甜點 Heart Dessert
荃灣呢間刨冰超抵食！餐廳提供多款甜品及鹹食，可以一次過食晒晚餐同甜品直落，唔便周圍走，好方便啊～店內有多款刨冰口味可供選擇，例如黑糖豆粉味、Oreo碎碎味刨冰、士多啤梨味、鮮芒果味；榴槤控必試嘅「玄米榴槤刨冰」，仲有煙韌口感嘅黑糖芋圓味。最平$53就有交易，CP值超高！
【INFO】 甜點 Heart Dessert 地址：荃灣荃華街44號富麗花園B商場地下62號舖 營業時間：星期一至日 12:00 - 00:00
必食打卡 刨冰店 推介 4. After You Dessert Cafe Hong Kong
除咗日式刨冰之外，仲有泰國人氣過江龍刨冰「After You Dessert Cafe」。冇時間去泰國嘅話，不妨去試吓佢哋嘅招牌芒果糯米飯刨冰($148)！口味獨特得嚟打卡一流～另外仲有泰式奶茶刨冰 ($138)、士多啤梨芝士蛋糕刨冰 ($138)，同埋美祿火山刨冰 ($138)，款款都好睇又好食。
【INFO】 After You Dessert Cafe 地址：銅鑼灣登龍街52號景隆商業大廈地舖 營業時間：星期一至四及日 12:00 - 22:00；星期五至六 12:00 - 23:00
————————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
