西多士係港式茶餐廳嘅名物，更加係下午茶必食之選～金黃色嘅西多士再加牛油同蜜糖嘅組合，份外滋味！近年西多士越嚟越多唔同新口味，款式變得多元化同創新，小編為大家搜羅全港7大必食 西多士推薦 ，作為西多士控嘅你哋一定唔可以錯過，快啲Mark定邊間好食再去試啦！
圖片來源：openrice@Fia”、openrice@EricaPoon8240、openrice@Smart eating、openrice@IVY、openrice@CocoChan9642、openrice@Kan Lee、openrice@Jenny_Cyy、openrice@big_stomach、openrice@hk.eateateat、openrice@foodie_bunny、openrice@wong.ap.7、openrice@Foodcaptain.hk、openrice@g189、openrice@rick chui、openrice@小詩…、openrice@CocoChan9642、openrice@Kan Lee、openrice@soya1314、openrice@furronika、openrice@xmelissalamx、openrice@Carrollc｜撰文：Sharon
1. 陳新記
陳新記嘅一口招牌西多士，同平時食開嘅西多士唔同，係炸方包再配搭花生醬、煉奶、牛油同糖漿，非常邪惡嘅組合！仲要即叫即炸，炸到脆卜卜勁有口感，大家唔需要切開，只要用叉吉嚟食就得，非常方便！另外，除咗傳統口味，陳新記仲有「紅豆一口西多士」，有食客表示係隱藏餐牌，要主動下單先至有機會食到！鍾意食紅豆嘅朋友有多一個選擇啦！
【INFO】 陳新記 地址：鴨脷洲鴨利洲大街鴨利洲市政大廈1樓 營業時間：08:00 - 17:00（星期三休息） 電話：2555 1862
2. 漢發麵家
位於深水埗大南街嘅漢發麵家最出名係豬膶麵，唔少明星都慕名而來！但呢度嘅圓形西多士同樣都係招牌菜式，外型同平時食開嘅西多士唔同，圓形造型再加上一大片牛油同煉奶，蛋白味十足，夾層內有花生醬，感覺超邪惡！除咗深水埗店，最近仲喺灣仔開設新分店，唔使去深水埗咁遠，港島區嘅朋友有福啦！
【INFO】
漢發麵家 - 深水埗店
地址：深水埗大南街192號
營業時間：07:30 - 17:15（星期日及公眾假期休息）
電話：2380 7068
3. 維記咖啡粉麵
深水埗地道馳名豬膶麵，呢度嘅咖央西多士都係餐廳嘅招牌之一～咖央醬由自家打製造，甜味十足，有濃厚嘅蛋香味！西多士用咗兩塊白麵包，厚度適中，啱晒唔鍾意食太厚西多士嘅你哋，如果想更滋味，仲可以倒埋糖漿一併嚟食！大家鍾意食傳統夾花生醬嘅西多士，定係加新式嘅咖央醬呢？
【INFO】
維記咖啡粉麵
地址：深水埗福榮街62號及66號地下/ 北河街165-167號地下D號
營業時間：06:30 - 20:30（ 星期一至五）、
06:30 - 19:15（星期六日及公眾假期）
電話：2387 6515
4. 興記咖啡室
位於上環嘅懷舊小店興記咖啡室，西多士係即叫即整，同平時製作西多士嘅方法唔同，並唔係炸到金黃色，而係直接用蛋去煎香，表面加入好多煉奶同牛油。雖然加入大量煉奶同牛油，但西多士依然外脆內軟，麵包冇淋，夠晒濕潤之餘又可以食到濃濃嘅蛋香味！
【INFO】 興記咖啡室 地址：上環蘇豪荷李活道182號地下 營業時間：06:00 - 18:00（星期日休息） 電話：2549 3419
5. 周記點心+茶餐廳
傳統西多士食到厭？周記點心+茶餐廳主打懷舊點心，呢度有全港獨家嘅爆漿西多士，一定可以刺激大家嘅味蕾！爆漿西多士有多款口味可以選擇，包括芝麻、紫薯同朱古力等，最多人會揀爆漿流沙西多，切開金黃色嘅西多士，奶黃流沙流就會不停湧出嚟！不過西多士嘅份量有啲大，建議可以同朋友一齊開心Share食！
【INFO】 周記點心+茶餐廳 地址：西環西營盤水街東利大厦地下H1號舖 營業時間：10:00 - 20:00（星期一休息） 電話：2559 2389
6. 泗益
嚟到赤柱梗係要去試泗益嘅咖央西多士，泗益呢個老字號有50多年歷史，當中嘅西多士咁多年都受旅客同香港人歡迎，每逢假日都會大排長隊！人氣咖央西多士稱以人手發打蛋白，至挺身後再加入蛋漿，最後再用麵包蘸漿即炸，仲要即叫即整㗎！西多士質感超鬆軟，濃郁嘅蛋味，內層搽咗香甜嘅咖央醬。而且麵包超濕潤，就算唔加糖漿都完全無問題！不過每日排隊人數眾多，經常提前閂門，所以想食到西多士嘅朋友記得要早啲去啦！
【INFO】 泗益 地址：赤柱市場道2號 營業時間：06:00 - 16:00（星期二休息） 電話：N/A
7. 聚來車仔麵
要講到最與別不同嘅西多士，非呢間餐廳莫屬！呢款「爆漿阿華田西多士」上層舖滿超多阿華田粉，再加上流心煉奶，切開後好似溶岩爆發一樣，畫面超震撼！阿華田加煉奶嘅組合，居然冇想像中咁甜，作為甜品都唔會太heavy！雖然同傳統西多士好唔同，但如果鍾意食甜食嘅你哋就值得一試！
【INFO】 聚來車仔麵 地址：深水埗基隆街172號地舖 營業時間：11:00 - 21:00（星期一休息） 電話：2391 8033
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
