夏日炎炎梗係要食返支雪糕啦！香港有眾多雪糕同好者，每次風靡關注組嘅雪糕都賣斷晒市，唔少網民表示要打電話叫老闆留貨先食到啊，話題度超高啊！今日小編就同大家睇吓有邊5款雪糕受到Facebook「香港雪糕關注組」力推啦，即刻去買返支先！
圖片來源：網絡圖片、Shopee Mall、Facebook@laveleehk、Facebook@香港雪糕關注組、Chateraise、7-Eleven｜撰文：Claudia
關注組力推1 – 菲律賓Gold Label香芋雪糕
最近呢款香芋雪糕真係不得了！目前本港幾乎賣斷市，網民仲話要靠菲傭姐姐做手信帶翻嚟，想原價買返嚟試吓真係冇可能！究竟呢款雪糕點解咁受歡迎？網民就表示雪糕奶香味同芋頭味都好濃，口感又軟滑綿密，仲夾雜住芋頭粒，認真好食！
Gold Label香芋雪糕 銷售地點：深水埗Tagpuan 售價：$190（價格不定）
關注組力推2 – 韓國lavelee乳酪雪糕
唔知道大家又鍾唔鍾意食乳酪雪糕嘅呢？小編就至愛啦！呢款乳酪雪糕係雪糕關注組好評不斷，因為夠晒大杯，酸甜又開胃，食成杯都唔怕膩，入面嘅乳酸菌係有助腸道健康，可以提升腸道免疫力，即刻覺得食雪糕冇咁大罪惡感！不過因為太受歡迎，有貨記得入手試下啦！
lavelee乳酪雪糕 銷售地點：百佳超級市場、Circle-K 售價：$25
關注組力推3 – Crefa 白桃生忌廉雪糕
雖然佢叫做生忌廉雪糕，但係佢食落係乳酪味，網民大讚雪糕入面有成堆桃肉，個底仲有餅碎，無論係味道定係口感都係世界級！
Crefa 白桃生忌廉雪糕 銷售地點：7-Eleven便利店 售價：$52/3
關注組力推4 – Chateraise薄荷碎朱古力
網友話呢支薄荷碎朱古力雪條嘅薄荷味夠出又唔假，食落有粒粒分明嘅朱古力碎，仲有少少奶味，重點係只要$15，呢個價錢呢個質素相當不錯，性價比高，唯一美中不足嘅係一支唔夠食要食兩支先夠！
Chateraise薄荷碎朱古力 銷售地點：Chateraise 售價：$15
關注組力推5 – Häagen-Dazs日式芝士撻迷你杯雪糕
芝士控要注意啦，如果你好鍾意食芝士嘅話就一定要試下呢款雪糕，雪糕加入咗金文畢芝士等多種芝士，仲有芝士軟心醬同烤芝士撻皮脆餅粒，三重豐富口感，令你好似食緊芝士撻咁啊！呢款日式芝士撻迷你杯雪糕係7-Eleven便利店獨家發售，想試嘅朋友仔快啲去試下啦！
Häagen-Dazs日式芝士撻迷你杯雪糕 銷售地點：7-Eleven便利店 售價 : $39
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
