長洲美食 | 逢節假日，不少人都會想遠離市區，去離島度假一下。長洲一直係最受歡迎嘅離島，有得打卡，有得掃街，又有得玩！講起長洲掃街，除咗大魚蛋、炸雪糕同芒果糯米糍，你仲會諗起啲咩呢？近年長洲多咗好多打卡特色小店，例如長洲角酷、長洲冰室、Haika Coffee及島中研坊等。涵蓋各種類型，性價比亦十分高！以下為大家介紹八大必食長洲掃街之選，一於Save定入島時去啦！
圖片來源： Openrice @Kimberr, @foxd.hk, @missyu88, @eatwithcherii, @mkbowfoodies, @Leonalhy, @fibee3b, @jacko526, @cherb.space, @foodxgoodwest_hk, @sleepbeauty, @k_b_y.foodairy, @mollusca0216, @chocolei, @p0yu, @fatfatballs, @chongchinghei, @soya1314, @sneakeraddict, @jennyfar, @princess637, @foodie_misse, Haika Coffee, 伴日官方圖片｜撰文：Ginger
長洲美食 | 1. 甘永泰魚蛋
講起長洲，又點少得大魚蛋呢！喺碼頭一落船直行就會見到呢間老字號店舖，係屹立多年嘅長期人龍小店，吸引唔少本地人及遊客。魚丸係以門鱔魚肉每日新鮮手打製作，除咗有招牌大魚蛋，仲有墨魚丸、龍蝦丸及豆卜釀魚肉等招牌小食！
INFO
《甘永泰魚蛋》
地址：長洲新興街106號地下
營業時間：星期一至日 11:00 -17:00
電話：2981 3050
長洲美食 | 2. 允升甜品
講起芒果糯米糍，又點少得呢間長洲特色名物代表允升甜品呢！作為芒果糯米糍嘅始祖，用料新鮮實在，糯米皮煙韌軟糯，芒果餡香甜多汁。
除咗芒果糯米糍，更有凍奶（$31）、西米露（$24）、芒果腸粉（$31）、榴槤糯米糍（$19）等其他選擇，行到攰就一於坐低嘆冷氣，食番碗糖水啦！
INFO
《允升甜品》
地址： 長洲新興街5號地舖
營業時間： 星期一、星期三至日 12:00 - 22:00，星期二 全日休息
電話： 29815032
長洲美食 | 3. 長洲角酷
相信一見到”長洲地鐵站”嘅藍白磚打卡牆，大家都會諗起呢間自家製乳酪飲品店！利用藍白紙皮石砌成港鐵站牆身，成為近年IG熱門打卡點！
佢哋有多款口味嘅港式乳酪，例如芒芒角酷（$40）、桃桃角酷（$40）、百香果角酷（$38）等。主打新鮮健康，低糖低卡，解渴無負擔！嚟到呢到必定會點佢地非常受歡迎嘅莓莓乳酪（$42），選用新鮮士多啤梨配紫米調製而成，以香港子母奶作原材料，加入新鮮水果蓉，連同乳酪一同攪拌而成，酸酸甜甜，十分清新！
INFO
《長洲角酪》
地址： 長洲新興街78號地舖
營業時間： 星期一至六 12:30 – 22:00，星期日 11:00 – 20:00
電話：84893140
長洲美食 | 4. Haika Coffee
近碼頭嘅呢間咖啡店，設有室內外座位，因為兩位店主都十分喜愛露營，因此餐廳整個設計、桌椅及餐具等用品都係以露營風為主題。店名「Haika」，以日語發音「Hiker」命名，有遠行者意思。店舖選址長洲，希望令大家遠離煩囂，投入大自然，更享受長洲帶來嘅悠閒愜意。
除咗主打精品咖啡及手工麵包外，最為人知一定係佢哋必食嘅招牌甜品，朱古力流心髒髒撻(朱古力雞蛋布甸撻) ($48)。人手製作，每日限量供應。選用鬆化牛油撻皮，以法國無鹽發酵奶油及Valrhona 法國頂級100% 可可粉焗製而成。表面灑滿可可粉，切開有黑朱古力流心，底層係雞蛋布甸，非常滑溜，層層分明，朱古力味香濃而不過甜，外表亦非常吸引，難怪會成為長洲人氣熱店！
此外，餐廳的檸檬汽啡LEMON BLACK ($44)亦係主打之一，莓果味重嘅MT. BLACK 中淺烘焙拼配豆濃縮咖啡配上新鮮切片檸檬梳打水，令口腔充斥着層次豐富嘅水果香及濃郁咖啡香。怕甜的更有無糖選擇！
INFO
《Haika Coffee》
地址： 長洲新興海傍街57號地舖
營業時間： 星期一至日 12:00 - 18:00
長洲美食 | 5. 伴日
位於長洲嘅呢間日式和風食堂，走平民路線，性價比十分高，價錢由$40-$80不等。除咗有多款外賣限定便當，堂食只需$60就有五品精緻料理，有主食、湯、主菜、漬物和飲品。每日更有限定飯團和主菜選擇，天天不同，款式種類十分多！擺盤賣相亦落足心思，絕對係去長洲前必收藏嘅打卡文青小店！
INFO
《伴日》
地址： 長洲大新街68號
營業時間：星期一、星期三至日 11:30 - 20:00 ; 星期二 全日休息
電話：29813323
長洲美食 | 6. 島中研坊
週末去離島，當然想輕鬆度假一下！呢間日系甜品咖啡店提供室內外座位，戶外座位寬敞舒適，望著店內植物擺設及户外風景，令你有一種寫意休閒嘅感覺！
店舖提供甜品，All Day Breakfast，便當等選擇，而最受歡迎係自選甜品拼盤，有提拉米蘇或咖啡凍；焦糖吉士布丁、布丁燒或伯爵茶焦糖燉蛋；雪糕及是日精選蛋糕，一次過滿足享用4款甜品嘅願望！
此外，自家製比利時列日窩夫（$50）亦非常受歡迎，每星期新鮮製造，自己研發食譜，只供原味及朱古力味，配上香蕉，雪糕和自家製忌廉，令你一試難忘！
INFO
《島中研坊》
地址： 長洲中學路16號地舖
營業時間： 星期一、三至五 11:30 - 18:00 ； 星期二 全日休息；星期六至日 10:30 - 18:00
電話：57224252
長洲美食 | 7. 長洲冰室
唔好以為呢間係一間普通嘅茶餐廳，雖然名為冰室，但佢係一間以手作芋圓為主打嘅文青風甜品店。其中泰式奶茶三色圓剉冰（$75）最受歡迎，泰奶味十分香濃，仲可以免費任添奶茶醬！有齊芋圓、地瓜圓及紫薯圓，食得出原材料味道，亦煙韌有咬口。配上雲呢拿雪糕，整體顏色豐富，成為近年打卡必去甜品舖！
除咗招牌綜合三色圓剉冰，更有桂花酒釀三色圓（$40）、抹茶/黑糖蕨餅（$28）、木瓜雪耳三色圓燉桃膠（$50）及各款椰皇三色圓燉奶（$68）等選擇，消暑解渴一流！
INFO
《長洲冰室》
地址： 長洲北社海旁19C號地舖
營業時間： 星期一至四 12:00-19:00，星期五至日 12:00-22:00
電話：29812982
長洲美食 | 8.長洲鐵漢
長洲除咗有打卡咖啡店，仲有港式懷舊特色串燒店，有60款以上嘅串燒炸物選擇。傳統得嚟又創新，當中最受歡迎有炸平安流沙包、椒鹽酥菇、冰鎮黃金咖喱魷魚、雞軟骨串等佐酒小食都非常惹味！適合配上佢地嘅特色手工啤酒，例如普洱手工啤、Asahi烏龍茶等。
款款都想試嘅話，就要揀富貴Set！($128) 有鹽酥菇、雞軟骨、炸燒賣、薯格及墨魚咀等，應有盡有，適合選擇困難者！
INFO
《長洲鐵漢》
地址： 長洲新興街65號地舖
營業時間：星期一至日 11:00 - 20:00
電話: 84893143
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
