貓Cafe ｜ 寵物Cafe喺香港越嚟越受歡迎，好多人放假都會特登去chill返個下晝，既可以親親小動物，又可以嘆美食！今次編輯就幫大家揀咗香港6間人氣寵物Cafe，有啲可以喺「貓主子」寵愛下用餐，有啲就可以自己帶家中愛寵去食飯，有一間Cafe仲可以見到雪貂，實有一間啱你心水！即刻睇以下地址及詳細介紹啦。
圖片來源：Facebook@URBAN Cafe、Facebook@貓之茶房 Cats Tea Room、Openrice@SharonYau2008、Openrice@belindalee62、Openrice@Browncony、Openrice@eibmoz_00、Openrice@Gladys Gladys、Facebook@柴太郎咖啡店 Shiba Taro Cafe、Openrice@ccaqlw、Openrice@Grace Chan 食好野、Openrice@bbgube、Openrice@sally or、Openrice@foodie.myfoot、Facebook@Rabbitland Cafe、Openrice@Ffany Ti｜撰文：Tiffany
動物Cafe｜1. URBAN Cafe
URBAN Cafe 係全港最大嘅貓貓Cafe，現行一共有三間分店，分別位於荔枝角（約7000呎）、觀塘（約4000呎）、旺角（約3000呎），全部分店加埋總共有超過200隻貓咪，貓奴一定唔可以錯過！
URBAN Cafe 除咗環境夠晒寛趟之外，更免入場費、免按時收費。大家只需要點一份餐點，就可以同時享受同貓貓玩嘅時光！餐牌以西餐為主，選擇好多，而且食物一啲都唔隨便。質素高之餘仲色香味俱全，保證你食得滿足之餘，又同貓貓玩得開心！
【INFO】 《URBAN Cafe》 地址：荔枝角長沙灣道680號麗新商業中心1樓、觀塘開源道62號駱駝漆大廈第1座6樓、旺角西洋菜南街1號兆萬中心14樓 營業時間：星期一至日 12:00 - 22:00 電話：荔枝角 9049 9929／觀塘 5307 3636／旺角 5969 8549 官方Facebook：https://bit.ly/3ZfH7w9
動物Cafe｜2. 貓之茶房
貓之茶房一聽就知道係貓貓Cafe！佢喺香港都有幾間分店，分別位於尖沙咀、旺角、荃灣，其中荃灣分店更係之前ViuTV劇集《大叔的愛》嘅取景地，唔少人都因為咁而過嚟朝聖㗎！
去過貓之茶房嘅客人，好多都稱讚呢度嘅貓貓好和善，唔會出爪，就算帶小朋友去都唔使擔心會俾貓貓抓傷。 而且貓貓數量唔少，亦有唔同品種，貓奴一定會盡興。更特別嘅係，貓之茶房係一間好有善心嘅寵物Cafe，佢哋每個月都會捐款俾流浪貓機構，亦會收養、幫助貓貓搵新主人，盡心盡力幫助喵星人！
呢間Cafe主要提供輕食同飲品，亦有貓零食畀客人買嚟餵貓咪，喺到同貓貓嘆返幾個鐘都唔錯㗎！
【INFO】 《貓之茶房》 地址：尖沙咀海防道53號海防大廈3樓3室、旺角弼街60號1樓、荃灣大河道45號樹勳樓1樓 營業時間：星期一至五 13:30 - 22:30／星期六至日 11:30 - 22:30 電話：尖沙咀 3463 8853／旺角 3488 7750／荃灣 2149 6261 官方網站：https://bit.ly/3ZczwyF
動物Cafe｜3. 動物穴
動物穴推崇人寵共用空間，希望客人可以喺店內放鬆身心靈、自修、暝想、藝術創作等，啱晒忙碌嘅香港人嚟放鬆一下！動物穴更會為受傷、準備被領養嘅貓咪提供食物及各方面嘅支持，絕對係一間好有善心嘅寵物Cafe。
動物穴係一間貓貓Cafe，店內空間好大，總共有兩層，你無論行到邊都有貓咪喺附近。
最近仲有新嘅可愛小動物「雪貂」加入，夠晒特別！鍾意小動物嘅朋友仔一定要嚟朝聖。
呢到主要都係提供輕食，不過賣相一啲都唔失禮，影相打卡都唔輸蝕！除咗食嘢同陪貓玩之外，你仲可以餵貓食零食、上手作班，甚至可以自製棉花糖，超多嘢玩，最適合媽媽們帶小朋友嚟放電。
【INFO】 《動物穴》 地址：觀塘觀塘道436-484號觀塘工業中心第一期地庫F室 營業時間：星期一至日 11:00 - 21:00 電話：2383 3089 官方網站：https://bit.ly/3EB2ler
動物Cafe｜4. 柴太郎咖啡店
柴犬控一定唔可以錯過呢間位於西貢嘅Cafe，全店以柴犬為主題，仲有隻叫「太郎」嘅柴犬店長坐鎮！呢間Cafe亦係寵物友善餐廳嚟，所以好多狗主人都會帶埋佢哋嘅狗狗過嚟玩。
Cafe設有室內及室外空間，喺到同狗狗嘆返個下午真係夠晒寫意。店內仲有好多柴犬擺設、相片、壁畫等等，仲會售賣多款柴犬商品。呢間狗狗Cafe真係啱晒柴犬迷！
Cafe都係以西餐為主，編輯特別推介 All Day Breakfast！一份有齊豬肉腸、煙肉、香草焗小蕃茄、香蒜炒蘑菇、炒蛋、焗豆、沙律、自家製窩夫配果醬，夠晒豐富。一邊嘆，一邊望住個靚景，仲可以帶埋狗狗嚟陪食，真係一大享受。
【INFO】 《柴太郎咖啡店》 地址：西貢市場街11號地舖 營業時間：星期一至五 10:00 - 18:00／星期六至日 09:00 - 20:00 電話：9488 0623 官方Facebook：https://bit.ly/3PjJ4mT
動物Cafe｜5. Rabbitland Cafe
貓貓狗狗Cafe大家可能就去得多，兔仔Cafe又去過未呢？Rabbitland Cafe 係全港首間兔Cafe，俾大家可以近距離親親兔仔！店內有好多隻唔同種類嘅兔仔，例如長毛兔、垂耳兔等等，而且隻隻都好溫馴，帶埋小朋友去都唔使擔心。
餐廳有好多日式及西式嘅食物選擇，例如日式照燒雞扒、麻醬稻庭冷烏冬、卡邦尼意粉等等。客人喺同兔仔玩嘅同時，亦可以享用美食。店內更提供兔飼料俾客人購買，等大家可以餵吓可愛嘅兔兔們！
【INFO】 《Rabbitland Cafe》 地址：銅鑼灣謝斐道530號3樓 營業時間：星期一至日 13:00 - 21:30 電話：5281 0280 官方Facebook：https://bit.ly/45MDUH1
動物Cafe｜6. Hooman By The Sea
Hooman By The Sea 係一間寵物友善Cafe，超級歡迎寵物、特別係狗狗內進，而店內亦有兩隻貴婦狗店長為大家服務。Cafe位於西九文化區，設有室內及室外座位、可以望到無敵靚海景，所以假日好多狗主人會帶埋主子過嚟玩，既浪漫又寫意！
望住個無敵大海景食嘢飲嘢，真係特別開心。而且影相勁靚，絕對係IG-able嘅打卡勝地！
Cafe主打美式熱狗，款款都爆餡又好味，而熱狗更係以狗狗品種嚟命名。呢間Cafe最特別嘅係有提供狗狗都食得嘅零食同雪糕，等毛孩都可以同主人一齊望住靚景嘆美食。
【INFO】 《Hooman By The Sea》 地址：尖沙咀西九文化區藝術公園地下GF-07號舖 營業時間：星期一至五 11:00 - 20:00／星期六至日 09:00 - 20:00 電話：6749 0777 官方網站：https://bit.ly/3ZcJHTP
