葵廣一直被譽為「掃街天堂」，雲集過百間街頭小食店舖，有鹹食，有甜品，亦有唔同類型嘅飲品選擇。今次為大家介紹12間葵廣掃街必食之選，有近日人氣爆登「宇治初時」秘製宇治鯛魚濃湯粉絲、打卡必食芝士拉絲「10分麵包」及長期人龍「慧食貓爆餡手抓餅」等小店，相信嚟到葵廣一定食極唔厭！
圖片來源： Openrice @AngelLam0828、@ben_z、@foodmarker.hk、@racheltungtung0409、 @nte.eats、@no.824foodiary、@poorjjfoodie、@nikiman2514、@meffoodie、@cyrus1818、@wbunny、@hkfoodpage、@soya1314、@siumaigor、@wildchildcarol、@60kg火星人、@eatwithmoonly、 @why playing、@yannnnnv、@eatlife balanceeee、@littlemissfoodiehk、@foodietwy、@tszyeukbb、@bearbear.foodiary、@sammi_aries、@sammi_aries、@koishikikoi、@fishtailjai｜撰文：Ginger
葵廣掃街必食推介｜1. 慧食貓爆餡手抓餅
相信呢間店舖大家都唔陌生，喺葵涌廣場屹立咗好多年！每次到訪葵廣，都會俾佢即叫即製，熱辣辣嘅手抓餅吸引。店舖提供咗唔同款式嘅手抓餅，例如招牌火腿雞蛋肉鬆手抓餅、火腿雞蛋芝士豬柳手抓餅及鹹牛肉手抓餅等，每款都非常有特色，而且餡料非常豐富，每款必定夾有生菜及蕃茄，餅皮亦非常酥脆，難怪店舖門前永遠都企滿人排隊！
【INFO】
地址：葵芳葵富路7-11號葵涌廣場1樓B01C號舖
營業時間：星期一至日 13:00-19:30
葵廣掃街必食推介｜ 2. 屯の大阪章魚燒
呢間係由屯門開到嚟葵廣嘅人氣章魚燒小店，位於葵涌廣場3樓，人氣一直無減！除咗傳統口味，店舖亦提供多款創意口味，例如黑松露、牛乳流心玉子、明太子、蟹黃蟹膏及超爆多蟹籽等特色口味，揀唔到食邊款仲可以雙拼！每粒章魚小丸子大粒又足料，表面亦有大量木魚碎及醬汁，吸引咗唔少人嚟葵廣朝聖。
【INFO】
地址：葵芳葵富路7-11號葵涌廣場3樓摩登世界1號舖
營業時間：星期一至日 12:00-22:30
葵廣掃街必食推介｜ 3. 10分麵包
講到葵廣又點少得近日韓國同日本都好流行嘅芝士拉絲餅，連店員都係韓國人！即叫即整，出品非常快，拎上手熱辣辣，充滿濃濃蛋香味，中間包住一大嚿芝士，邊食邊拉絲，打卡一流！
【INFO】
地址：葵芳葵富路7-11號葵涌廣場2樓2009號舖
葵廣掃街必食推介 ｜ 4. 啖啖肉
標榜「零負擔食炸雞」，相信呢到嘅自製啤酒炸漿必定會吸引到一眾炸雞迷！店主曾經喺米芝蓮餐廳擔任廚師，創作出一系列炸雞口味，例如邪惡芝士肉醬、酸忌廉洋蔥、鹹蛋黃、蜂蜜脆脆及黑白松露等。醬料毫不吝嗇，每一件炸雞都沾滿醬汁，每份有四至五大件，炸雞粉薄皮脆，肉質亦非常嫩滑，嚟葵廣掃街可以選擇呢間新店舖！
【INFO】
地址：葵芳葵富路7-11號葵涌廣場潮流廊二期2樓2008A號舖
營業時間：星期一至日 12:30 - 21:00
葵廣掃街必食推介 ｜ 5. 宇治初時@自家創作料理
每次經過2樓美食區，你都會見到呢間人氣爆登嘅小店人龍不斷增加，每次都起碼要等20至40分鐘以上！店舖主打秘製宇治鯛魚濃湯，配料有鯛魚片、娃娃菜及木魚碎等。由於湯底特別，食落似椰奶混合喇沙醬嘅味道，而且有大量無骨魚片，粉絲亦非常索湯，即使要排長龍，都無減大家試新野嘅意欲！除咗有招牌鯛魚濃湯粉絲，更有極尚濃湯粉絲、櫻花蝦濃湯粉絲、涼拌魚皮、及宇治果子醬冷烏冬等選擇。
【INFO】
地址： 葵芳葵富路7-11號葵涌廣場2樓2020號舖
營業時間：星期一至二 12:00 - 22:00； 星期三 全日休息； 星期四至日 12:00 - 22:00
葵廣掃街必食推介 ｜ 6. 卷之屋
嚟葵廣掃街又點少得手卷？呢間係位於葵涌廣場3樓TOP世界嘅日式卷物店，屹立多年，提供數十款日式卷物。不得不提及最受歡迎嘅火炙芝士卷物、三文魚手卷系列及芝士厚燒玉子等，定價只係$10-40不等。每款大份又足料，性價比非常高！
【INFO】
地址： 葵芳葵富路7-11號葵涌廣場3樓Top世界T21-22號舖
營業時間：星期一至六11:30 - 21:00； 星期日 全日休息
葵廣掃街必食推介 ｜ 7. 絆 1/2 Sweet
2樓電梯一上，直行就會見到呢間牛角包窩夫小店，經過佢嘅時候每次都會聞到一陣焗窩夫嘅味道。店舖主打麻糬牛角包窩夫，將日本麻糬同牛角包窩夫結合，外脆內煙韌。店舖提供10多款特色口味，有鹹有甜，例如烤芝士布甸、鹹蛋肉鬆、士多啤梨及花生奶醬等。此外，店舖亦提供爆炸糖芭菲、泡芙小丸子及酥皮鯛魚燒等系列甜品，口味創新又特別，鍾意食甜品嘅你千祈唔好錯過啦！
【INFO】
地址： 葵芳葵富路7-11號葵涌廣場2樓C97A號舖
營業時間：星期一至日 13:00 - 22:00
葵廣掃街必食推介 ｜ 8. 蕉積妹
講到泰國香蕉煎餅，葵廣都有新選擇！店舖提供五款香蕉煎餅選擇，例如有阿華田、花生醬、榛子、朱古力香蕉及煉奶香蕉等選擇，定價由$38起。除咗以上選擇，更有法式焦糖香蕉煎餅，泰式特飲及串串雞蛋仔等甜品。想感受泰國風味，唔好錯過呢間新開嘅泰式煎餅小店啦！
【INFO】
地址： 葵芳葵富路7-11號葵涌廣場3樓301E號舖
營業時間：星期一至日 12:00 - 21:30
葵廣掃街必食推介 ｜ 9. 芋圓控
芋圓控注意啦，呢間小店提供多款特色芋圓選擇，可以選擇「自選DIY」，根據個人喜好加入自己喜歡嘅配料，例如焙茶圓、蜜芋頭、包心芋圓、海底椰及芋泥球等，選擇五款只需$36，其後每款加$4，性價比非常高。
【INFO】
地址： 葵富路7-11號葵涌廣場1樓B60B號舖
營業時間：星期一至四 13:00 - 21:00；星期五至日 13:00 - 21:30
葵廣掃街必食推介 ｜ 10. Bunny Churros
想食西班牙甜品，不妨嚟到葵廣2樓試呢間即叫即炸油條churros小店，連雪糕都係自家製！店主曾到西班牙當地取經，回流香港改良製作，創作出各款更適合本地人口味嘅甜品。甜品取名特別，例如「王家衛朱古力廠」、「白皇后夢想世界」及「小米狂想曲」等，每款西班牙油條都有指定蘸粉、醬汁、雪糕及配料，定價$55起。每款都係人手手工製作，配料豐富，非常適合打卡。
【INFO】
地址： 葵芳葵富路7-11號葵涌廣場2樓2023號舖
營業時間：星期一至日 13:00 - 21:00
葵廣掃街必食推介 ｜ 11. What’s Yogurt and Drink
Froyo熱潮無減退，乳酪雪糕愛好者要留意啦！位於葵廣新開嘅呢間乳酪雪糕店，$48起自選兩款配料，加$10就可以選擇四款配料，各送一款醬汁。配料選擇有蝴蝶酥、阿華田脆脆餅碎、朱古力脆豬、各款水果、綠茶糯米糍、以及芒果醬汁、朱古力及熱情果汁等。拼砌出色彩繽紛嘅乳酪雪糕，打卡一流！
太多選擇，唔知食咩好？更可以選擇店舖預設「抹茶控配希臘式乳酪雪糕」，有抹茶粉、抹茶糯米糍、蓮花焦糖餅及卜卜米，一早預設好，就唔怕諗唔到食咩啦！
【INFO】
地址： 葵芳葵富路7-11號葵涌廣場3樓303C號舖
營業時間：星期一至日 12:00 - 22:15
葵廣掃街必食推介 ｜ 12. Athena
除咗選擇台式飲品，如果想有啲新意思，不妨試吓呢間以無酒精雞尾酒為主題嘅手搖飲品店。店員即場調配，製作出酒吧雞尾酒般嘅飲品，每杯大概$40左右，大人小朋友都非常啱飲！取名亦有趣，例如「吔瓜啦你」、「熱情啫，犯法啊！？」、「做人冇夢想，同粒椰子有咩分別」，玩味十足。食完重口味嘅食物，想飲返啲清涼嘅飲品，不妨試吓呢間啦！
【INFO】
地址： 葵芳葵富路7-11號葵涌廣場1樓88B號舖
營業時間：星期一至日 12:00 - 22:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
