葵廣掃街攻略 | 葵廣係好多8、90後以前放學後會到訪嘅地方，享受與同學共處嘅時間。近年多間新餐廳進駐葵廣，但有幾間經典小店仍然係必食。每一啖都係回憶，好青春呀！小編精選10間你同我都一定識嘅葵廣小店，陪你由地下「食」到三樓，一齊細味當年。
圖片來源：Openrice｜撰文：Cynthia
葵廣掃街攻略 | 1. 問卷手卷專門店
地下已經有好野！食物唔只係好味與否咁簡單，更多時關於絲絲回憶，問卷手卷專門店就滿載住我哋著校服行街嘅青春！店鋪有好多不同味道嘅手卷，由普通嘅三文魚至海膽都有，而且價錢親民。最特別係仲可以自己落唔同醬汁，調配你喜歡嘅味道。
【INFO】
《問卷手卷專門店》
地址：葵芳葵富路7號葵涌廣場地下A48B號舖
時間：星期一至日 13:00 - 22:30
官方網站：問卷手卷專門店
葵廣掃街攻略 | 2. 慧食貓
上一層樓嚟到慧食貓，以為自己去咗台灣！呢度嘅手抓餅冇得輸，最受歡迎嘅係火腿雞蛋肉鬆手抓餅，餅皮烘得恰到好處，唔會太乾燥。外層酥脆，內層軟嫩。加上味道層次豐富，餡料好足料，食嘅時候仲不停跌出嚟。
【INFO】
《慧食貓》
地址：葵芳葵富路7號葵涌廣場1樓B01C號舖
時間：星期一至日 13:00 - 19:30
官方網站：慧食貓
葵廣掃街攻略 | 3. 蕉積妹
蕉積妹係葵廣隱世小店，最出名係佢嘅香蕉朱古力味煎餅，人人食過都話掂。好多味都想試，但又選擇唔到？唔緊要！佢哋有廚師發辦，而且同一般煎餅價錢一樣，絕對值得一試！
【INFO】
《蕉積妹》
地址：葵芳葵富路7號葵涌廣場1樓1092號舖
時間：星期一至四 12:00 - 21:00 星期五至日 12:00 - 21:30
官方網站：蕉積妹
葵廣掃街攻略 | 4. 真‧章魚無雙
二樓小店數量更多，真。章魚無雙燒就係掃街必吃小食。章魚燒口味千變萬化，大阪風、日式咖喱、蜜糖芥末，甚至黑松露味都有。每盒章魚燒都係即叫即整，新鮮滾熱辣。章魚燒圓碌碌、大大粒好似乒乓波，加上滋味醬汁，放學同朋友一人一粒嘅回憶返晒黎。
【INFO】
《真‧章魚無雙》
地址：葵芳葵富路7號葵涌廣場2樓C07B號舖
時間：星期一至日 12:30 - 21:30
官方網站：真‧章魚無雙
葵廣掃街攻略 | 5. 回味無窮
上到二樓，識食一定食回味無窮嘅咖哩魚蛋。佢嘅秘制辣醬汁係賣點之一，非常特別，係其他地方食唔到。魚蛋彈牙之餘仲好索汁，微辣微甜，好正宗嘅港式小食。
【INFO】
《回味無窮》
地址：葵芳葵富路7號葵涌廣場2樓C83號舖
葵廣掃街攻略 | 6. 鮮果園
掃街食左咁多野，口渴想飲嘢？三樓嘅鮮果園就幫到你。即使物價高企，鮮果園仍然有多款超抵飲果汁，仲好足料 。天氣咁熱，飲返杯健康凍飲都幾爽。
【INFO】
《鮮果園》
地址：葵芳葵富路7號葵涌廣場3樓摩登世界29號舖
葵廣掃街攻略 | 7. 冰冰果汁
介紹位於三樓鮮果園，原來同層仲有一間強勁對手，就係冰冰果汁。價錢同樣親民，杯杯都有淡淡果香，新鮮好飲同時冇罪惡感。究竟飲邊間？唔好揀喇，兩間都飲啦，因為大家都一樣咁高質。
【INFO】 《冰冰果汁》 地址：葵芳葵富路7號葵涌廣場3樓3056號舖
葵廣掃街攻略 | 8. 烤焗工房
烤焗工房位於3樓電梯旁，一上電梯就見到。小編由學生年代一直幫襯烤焗工房到而家，充滿回憶。每次放學有少許肚餓，都會過嚟買小食。其中最鍾意食安格斯牛柳粒，肉質鮮嫩，分量不少，CP值好高。
【INFO】
《烤焗工房》
地址：葵芳葵富路7號葵涌廣場3樓33-36號舖
時間：星期一至日 11:30 - 21:30
官方網站：烤焗工房
葵廣掃街攻略 | 9. 迷日食堂
日本美食控注意！迷日食堂由日本店長開設，售賣日式小食，最適合過口癮。店面貼滿食物圖畫，可愛字體好有學生時代做功課嘅感覺，青春到不得了！
【INFO】
《迷日食堂》
地址：葵芳葵富路7號葵涌廣場Top世界3069號3樓T7號舖
時間：星期一至日 14:00 - 21:00
官方網站：迷日食堂
葵廣掃街攻略 | 10. 阿佳拌麵
細個冇錢去旅行，又想喺香港都嘆到台灣夜市嘅味道？阿佳拌麵嘅「烤雞捲」就幫到我哋呢啲窮學生。呢度嘅烤雞捲外皮烤至脆卜卜，焦香風味濃厚，皮脆肉厚，彈牙雞肉勁juicy，百吃不厭。
【INFO】
《阿佳拌麵》
地址：葵芳葵富路7號葵涌廣場3樓303F號舖
時間：星期一至日 11:00 - 23:00
官方網站：阿佳拌麵
葵廣掃街攻略 | 11. 屯の大阪章魚燒
仲有另一間鍾意左好多年既章魚燒小店。大推元祖大板章魚燒，木魚飛飛下，可作一個小小下午茶，好味又飽肚。
【INFO】
《屯の大阪章魚燒》
地址：葵芳葵富路7號葵涌廣場3樓摩登世界1號舖
時間：星期一至日 12:00 - 22:30
官方網站：屯の大阪章魚燒
葵廣掃街攻略 | 12. 又一戟
又一戟歷史悠久，每次經過都一定排長龍，人氣高企，可以話係元老級嘅掃街必食！當中法式焦糖燉蛋雪糕班戟最受歡迎皮十分薄脆，餡料豐富，脆卜卜嘅焦糖同軟綿綿嘅燉蛋絕配，唔太甜仲非常有滿足感。
【INFO】
《又一戟》
地址：葵芳葵富路7號葵涌廣場3樓85B號舖
時間：星期一至日 13:00 - 22:30
官方網站：又一戟
葵廣掃街攻略 | 13. 呦呦鹿鳴布丁燒
美食之旅於三樓完結，當然要食個甜品作完美句號。呦呦鹿鳴布丁燒嘅店主專程去台灣學藝，所以味道非常有特色。食用時記得反轉食，令整件布丁都沾上糖漿。布丁層十分香滑，入口即化，底層輕芝士蛋糕口感豐富，一次三重體驗。
【INFO】
《呦呦鹿鳴布丁燒》
地址：葵芳葵富路7號葵涌廣場3樓TOP世界3069-T5-T6號舖
時間：星期一至日 13:00 - 22:00
官方網站：呦呦鹿鳴布丁燒
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
