米線推介2025 | 米線都可以話係各位香港人三餐嘅熱門選擇，除咗譚仔三哥之外，香港四周圍都有好食嘅米線，遍佈港九新界，即刻睇睇各區有咩必食米線推薦啦！
圖片來源：Openrice@comfort.foodhk、WanYinNg、hyperbec、kokofoodxx、RheaChim、anthony.savour、pauline.is.hungry、RiceComeOpenMouth、阿雪、MissCarolying、bunnypancake、TsangV、GWlovefood、KiMchiLchi、lazysloth_foodie、laiyiqi1991、littlefoodie00、JosephineLui | 撰文：Hedy
米線2025 | 1. 雲川（屯門）
雖然雲川位於屯門，但都有唔少九龍人特登搭一粒鐘入嚟食，食完之後超滿足，就知呢度嘅米線有幾咁吸引啦！去雲川就必定要點最出名嘅豬頸肉，一條條嘅豬頸肉帶點焦香，賣相吸引之餘，咬落去又好彈牙，份量又夠多。如果食得辣嘅朋友，就相當推薦大家試埋麻辣湯底，簡直係令人一試難忘，難怪被譽為係「屯門名物」！就算唔食得辣，都有多款湯底選擇，包括豬骨湯以及鮮魚湯等等。
【INFO】 《雲川》 營業時間：星期一至日10:30至21:30 地址：屯門良德街9號盈豐商場地下A27號舖
米線2025 | 2. 雲貴風正宗雲南米線（屯門）
雲貴風正宗雲南米線最啱鍾意食辣嘅朋友仔，湯底濃郁之餘，又有齊酸菜、芽菜、韭菜同肉碎，相當入味！腩肉酸辣米線，食落辣辣地之餘，又相當開胃。
【INFO】 《雲貴風正宗雲南米線》 營業時間：星期一至日13:30至00:30 地址：屯門井財街15號金銘大廈地舖
米線2025 | 3. 雲南小鍋米線 (華都商場)（屯門）
呢間隱世米線舖位於華都商場一樓嘅角落，雖然睇落平平無奇，但相當抵食，簡直就係平、靚、正之選，湯底濃郁之餘又唔會太重口味！推薦大家可以試下豬軟骨、豬頸肉以及腩肉！
【INFO】 《雲南小鍋米線 (華都商場)》 營業時間：星期一至日12:00至21:30 地址：屯門屯利街1號華都商場1樓38號舖
米線2025 | 4. 老闆娘雲南米線（荃灣）
相信有食開老闆娘雲南米線都知，鋪頭出面經常都要排隊，唔少人都特登嚟幫襯，想試下都要畀啲耐性！店舖位於舊式街市入面，以自家熬製嘅麻辣湯底同炸物馳名，當中嘅招牌酥炸雞球以及招牌麻酸辣湯都必點！
【INFO】
《老闆娘雲南米線》
營業時間：星期一、二、四至日：17:00至21:00（星期三休息）
地址：荃灣曹公街8號香車街熟食中心3樓28-29號舖
米線2025 | 5. 貴香園（旺角）
平時如果想喺旺角食米線嘅，就一定要嚟「香港米線關注組」推薦嘅貴香園！湯底足料之餘又夠大碗，有唔少嘅網民都推薦沙嗲同酸辣湯底，夠晒惹味！配料亦都有好多選擇包括腩肉、響鈴、豬潤及紅腸等！
【INFO】
《貴香園》
營業時間：星期一至日 11:30至22:30
地址：旺角西洋菜南街216號地舖
米線2025 | 6. 天星雲南米線（旺角）
無論任何時段，天星雲南米線都有好多人排隊，同時亦係「香港米線關注組」力推嘅鋪頭。當中入面主打酸麻辣湯底，同時亦有酸辣、麻辣、胡椒豬肚及清湯等等嘅選擇，配料就以酥香豬頸肉、煙韌鴨血以及軟嫩豬軟骨最為受歡迎，索晒湯底嘅汁，夠晒惹味！
【INFO】 《天星雲南米線》 營業時間：星期一至日 12:00至22:00 地址：旺角砵蘭街136號地舖
米線2025 | 7. 曾三仙米線（太子）
曾三仙米線喺2020年開業，創立2年半喺中國已經有超過500間分店，更喺太子設有香港首間分店！店舖有多款口味選擇，包括三仙米線、四仙米線以及泡椒米線等等，仲設有自助區畀你任添芫荽、蔥同白醋等等，體驗不一樣嘅米線！
【INFO】 《曾三仙米線》 營業時間：星期一至日11:00至22:00 地址：旺角砵蘭街136號地舖
米線2025 | 8. 星林居酸辣米線餐廳（尖沙咀）
平時如果比較晏收工，又想食米線嘅朋友，就可以嚟星林居酸辣米線餐廳，營業到夜晚11點，唔怕冇嘢食～小鍋米線夠足料之餘又大份，湯底更可以選擇辣度同酸度，有特別要求都可以再填寫！必試酸辣湯底，令人食過返尋味！
【INFO】
《星林居酸辣米線餐廳》
營業時間：星期一至日 11:00至23:00
地址：尖沙咀金馬倫道14號金輝大樓3樓
米線2025 | 9. 阿一豬扒酸辣米綫（筲箕灣）
筲箕灣東大街出名多嘢食，嚟到阿一豬扒酸辣米綫固然就要試試出名嘅豬扒酸辣米線，酸辣湯底再配埋夠爽口香脆嘅豬扒好開胃，再加埋蔥、花生以及酸辣菜，將口感再昇華！
【INFO】
《阿一豬扒酸辣米綫》
營業時間：星期一至日 11:00至23:00
地址：筲箕灣筲箕灣東大街30號地舖
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
