石門美食 | 平時搭屯馬綫都會經過嘅石門站，原來臥虎藏龍，有好多又平又高質嘅美食！喺石門站A出口一出就到嘅京瑞廣場一期及二期，分別有好多特色美食，包括西日Fusion菜、石燒牛、台灣菜、點心、甜品等等，應有盡有！編輯今次帶大家去石門搵食，快啲Bookmark定你嘅心水餐廳啦！
圖片來源：Openrice@Cathyyu、Openrice@hayman1、Openrice@Keresawong.L.S、Openrice@沈默的雙魚、Openrice@happy sharing 0924、Openrice@xkxblog、Openrice@vegefoxx、Openrice@Elainecyk、Openrice@chow928、Openrice@Nothing at all、Openrice@nam1019、Openrice@3btann、Openrice@歡歡增肥之旅、Openrice@nkikidailylife、Openrice@say_eatfatfat、Openrice@lltxn｜撰文：Tiffany
石門美食｜1. 緣味烤肉店
近年好流行嘅一人前石板燒肉，喺石門嘅京瑞廣場都搵到，而且仲平靚正添！每份石燒肉價錢由$68起，已經包咗一碗飯、一個沙津、一碟牛肉，真係夠晒抵食。一人有一個熱石鍋，咁就可以因應自己個人喜好，控制牛肉嘅生熟度啦！
鍾意食靚少少嘅牛的話，可以揀板燒牛板腱，牛肉嘅雪花好靚，油脂比例、分佈平均，而且肉味夠香濃，燒完之後肉汁依然keep到，唔會又乾又柴。而且一碟有超過10塊牛肉，CP值真心高！
【INFO】 《緣味烤肉店》 地址：沙田石門安群街3號京瑞廣場1期2樓230號舖 營業時間：星期二至日 12:00 - 15:00／18:00 - 22:00 電話：6807 9871
石門美食｜2. 入麵
入麵呢間餐廳，睇個名就知道主打麵食！呢到嘅午市及晚市套餐，都係一款主食，配一款麵食、一杯飲品。主食嘅選擇好豐富，有齊台式、川式、日式等不同料理，例如鹽酥雞、薑母鴨、清酒豬手、日式叉燒等等。而編輯最推介嘅主食係佢哋嘅回味醬骨架！
一份有三大嚿醬骨架，仲有一隻溏心蛋。以為醬骨架冇咩肉食？其實啖啖都係肉，而且啲肉入味得嚟夠淋身，食落唔會嚡口。醬汁好惹味，每啖肉都嗦晒啲汁㗎！
每份主食都會配一個麵，可以揀撈麵或者湯麵，仲有好多唔同口味！編輯就推薦大家試吓薑蔥蒜撈麵，啱晒鍾意惹味嘅朋友仔。麵底嘅份量好多，夠味得嚟又唔乾身，而且麵條有彈性，唔會糊口。
【INFO】 《入麵》 地址：沙田石門安群街3號京瑞廣場1期1樓151號舖 營業時間：星期一至日 11:30 - 17:30／18:00 - 21:00 電話：3612 4516
石門美食｜3. Ciao
呢間小店可以話係高CP值西餐首選，大部份主菜$100內已經有交易。雖然價錢實惠，但食物質素好高，好多人食過翻尋味㗎！最多人推薦嘅係安格斯牛肉漢堡，完全係水準之作。
安格斯牛肉夠厚身，食落肉味香濃之餘，肉質keep到juicy，配埋澎湃嘅芝士，真係好出色！而Burger用嘅麵包都唔hea，麵包用牛油微微烘過，外層香脆、內裡鬆軟。
黑松露迷就一定要試呢個黑松露野菌意大利飯。上枱已經聞到好香嘅黑松露味，食落當然唔簡單。黑松露香味突出，加埋淡淡creamy嘅醬汁底，配合得幾好。意大利飯煮得啱啱好，口感適中、粒粒飽滿，仲有超多菇菌，抵食呀！
【INFO】 《Ciao》 地址：沙田石門安群街3號京瑞廣場1期2樓210號舖 營業時間：星期一至日 12:00 - 21:30 電話：9545 7292
石門美食｜4. 搞餃鎮
呢間餃子店新開張冇幾耐，就已經有人讚話係石門之光，到底有咩咁巴閉？餐廳專賣餃子，有好多款特式口味選擇，例如芫茜馬蹄豬肉餃、黑松露蟹籽鮮蝦餃、咖哩淮山羊肉餃等等，仲可以揀湯餃或煎餃，啱晒鍾意搞搞震嘅你。編輯最鍾意就係帆立貝蒿荀鮮蝦餃，餃子入面真係有原隻帆立貝，用料絕對唔手軟，而且食到蒜香味！
餃子超級大粒，而且粒粒爆餡，淨係食餃子都好飽肚。而更加值得讚嘅係佢哋嘅湯底，竟然用到花膠淮山鮮雞湯，大驚豔呀！湯底清甜、香濃但又唔膩，仲要食到粟米、紅蘿蔔、花膠同雞絲等湯料，加錢仲可以要埋上海麵，吸晒啲湯一齊食真係正到爆。
【INFO】 《搞餃鎮》 地址：沙田石門安群街1號京瑞廣場2期地下G19A號舖 營業時間：星期一至日 10:00 - 22:00 電話：5506 9005
石門美食｜5. Charcoal time
鍾意食千層蛋糕的話，就一定要買呢間嘅手工千層蛋糕試吓。價錢唔算好貴，但超級好味！而且有接近20款口味，總有一款啱你心水！編輯就最推介佢哋嘅主打：椰子千層蛋糕，食落絕對有驚喜。千層蛋糕軟綿綿，夾層嘅忌廉整得好幼滑、有濃濃嘅椰香味，而且仲夾住大量真椰子肉。滿足到口感之餘，味道上亦超級濃厚。一句講晒：必試！
而芋泥控一定唔可以錯過呢款：台灣芋泥千層蛋糕！坊間比較少食到芋泥口味，而且要做到咁好食真係唔簡單。芋頭味忌廉濃郁但唔會太甜，芋泥仲多到爆晒出嚟，好滿足呀！順帶一提，呢到嘅所有千層蛋糕都係採用日本蛋、韓國麵粉、法國牛油及忌廉、德國牛奶整成，絕對係誠意之作。
【INFO】 《Charcoal time》 地址：沙田石門安群街1號京瑞廣場2期1樓101A12號舖 電話：9486 4414
石門美食｜6. 豆腐巴克
鍾意食豆乳甜品或者芋圓的話，嚟呢到食飯後甜品就啱晒喇。小店主打養生豆乳、豆腐花、芋圓，而編輯最鍾意就係佢哋嘅招牌芋圓5號！一碗有齊豆腐花、三色芋圓、桃膠、仙草、花奶，適合咩都想試嘅朋友仔！豆腐花超香豆味，而且整得好香滑，果然係招牌。芋圓煙煙靭靭，加埋仙草、桃膠，口感勁豐富。
最特別嘅係，呢到竟然搵到炸芋圓！一份炸芋圓只係$25，又特別又抵食，絕對值得大家嗌嚟試吓。粒粒芋圓都係一口size，外表炸到又脆又香口、咬落煙韌，真係好容易一啖又一啖就清晒。芋圓、地瓜圓有淡淡嘅香味，配埋煉奶一齊食出奇地夾！
【INFO】 《豆腐巴克》 地址：沙田石門安群街3號京瑞廣場1期2樓209號舖 營業時間：星期一至日 11:00 - 22:00 電話：9755 9922
石門美食｜7. Explorer Fusion Restaurant
同朋友仔/另一半出街食飯，一個想据扒、食西餐，另一個想食刺身、壽司？咁 Explorer Fusion Restaurant 就可以滿足晒你哋所有願望喇。呢間餐廳主打西日fusion菜，除咗有招牌菜：慢煮澳洲和牛、和牛漢堡、卡邦尼意粉之外，仲有超高質嘅手握壽司、日本直送刺身俾你選擇，睇見都流口水呀！
其中一款編輯心水菜式係卡邦尼意粉！Carbonara聽落雖然普通，但要整得好食其實唔簡單。呢到嘅卡邦尼意粉夠Creamy，除咗忌廉香之外，仲食得出煙肉、洋蔥味。而且面頭舖滿巴馬臣芝士碎，點會唔好味？下午茶仲要$58咋，抵到爛！
刺身、意粉、扒都唔啱你的話，特選壽司盛合又點睇？佢有齊多款新鮮嘅手握壽司，包括日本直送拖羅，仲有海膽、厚切帆立貝、赤蝦、三文魚腩等等… 全部都勁高質，絕對可以滿足到你！
【INFO】 《Explorer Fusion Restaurant》 地址：沙田石門安群街3號京瑞廣場第1期地下G10號舖 營業時間：星期一至日 12:00 - 00:00 電話：2665 6781
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
