燒味推介 | 12間燒味推介，紅木炭火燒鵝/米芝蓮必比登推介

燒味推介 | 燒味係香港地道美食嘅靈魂，無論係皮脆肉嫩嘅燒鵝，定係蜜汁濃郁嘅叉燒，總有一款可以勾起大家嘅食慾。香港燒味界既有傳承數十載嘅老字號，亦有米芝蓮星級名店。小編為大家搜羅咗12間必食燒味店，涵蓋咗由傳統炭燒到秘製陳皮風味嘅特色選擇，等大家輕鬆發掘最正宗嘅港式滋味。

圖片來源：Openrice@puishan__、@chifaichan3083、@Eric2888、@horatiol、@heaeatwalk、@爱吃的王木木、@achong13、@lucky姗姗、@janlyjudy、 @ClareW | 撰文：Ginger

燒味店推介 | 1. 大壹燒鵝

大壹燒鵝被唔少食客譽為「香港燒鵝界天花板」。佢地招牌嘅燒鵝堅持以傳統紅木炭火烤製，火候控制得宜，令鵝皮達到鬆化香脆嘅極致口感。除咗名物燒鵝，皇牌蜜汁叉燒亦係必點之選，選用優質梅頭豬肉烤製，肉味香濃且帶有迷人嘅蜜甜。

【INFO】
《大壹燒鵝》
地址：銅鑼灣登龍街36-48號登輝大廈地舖 
營業時間：星期一至日 11:00-20:30

燒味店推介 | 2. 天鴻燒鵝飯店

位於元朗嘅天鴻燒鵝飯店係區內嘅傳奇名店，曾連續兩年獲得《米芝蓮必比登》推介。店家對新鮮度嘅追求近乎執著，堅持燒鵝每日由養殖場送到店中即醃即燒。招牌燒鵝選用肉質嫩滑嘅黑鬃鵝，外皮烤得金黃香脆，肉質細嫩多汁。由於每日按時段限量發售，每逢出爐時間總係大排長龍，成為咗元朗街坊同埋遠道而嚟嘅食客心中不二嘅燒鵝首選！

【INFO】
《天鴻燒鵝飯店》
地址：元朗建業街88號仁義大廈地下D舖
營業時間：星期一至日 11:00-13:00、16:00-20:00

燒味店推介 | 3. 祥興燒臘飯店

祥興燒臘飯店係香港傳統燒臘飯店嘅代表之一，以親民嘅價格同埋高質素嘅燒味贏得大家喜愛。呢度嘅燒味種類繁多，由叉燒、燒肉到切雞、油雞應有盡有，係唔少深水埗街坊嘅午膳天堂。每一款燒味都保持住地道嘅港式風味。祥興燒臘透過穩定且高CP值嘅出品，展示咗香港街頭燒味最純粹且充滿人情味嘅一面。

【INFO】
《祥興燒臘飯店》
地址： 深水埗北河街45號地舖
營業時間：星期一至日 9:00-22:00

燒味店推介 | 4. 新桂香燒臘

位於柴灣嘅新桂香燒臘係一間星級名店，連明星陳奕迅、陳凱琳都係其擁躉。店內最聞名嘅係古法炭火烤製叉燒，選用新鮮豬肉確保肉質鮮嫩無雪藏味，呢度出名幾款叉燒包括「三粒叉」，「爽叉」，「一片天」同埋「柴皮叉」，微微燶邊嘅口感脆口鬆化，蜜汁香甜且肥而不膩。此外，呢度嘅乳豬同樣帶有誘人嘅炭香，皮脆肉嫩。

【INFO】
《新桂香燒臘》
地址：柴灣柴灣道345號金源洋樓C座地下17號舖
營業時間：星期一至日 8:00-19:00

燒味店推介 | 5. 再興燒臘飯店

位於灣仔嘅再興燒臘飯店歷史悠久，呢間曾獲米芝蓮車胎人美食推介嘅老字號，堅持自設工場，每日新鮮燒製。招牌叉燒選用脢頭肉製作，唔添加鬆肉粉，肉質自然嫩滑且蜜味香甜。另外，店內嘅「玻璃乳豬」亦係一絕，豬皮烤得如玻璃般香脆，油脂豐厚。

【INFO】
《再興燒臘飯店》
地址：灣仔軒尼詩道265-267號地下C座
營業時間：星期一至六 10:30-21:00

燒味店推介 | 6. 新蘇記燒豬大王

深水埗嘅新蘇記燒豬大王屹立區內逾50年，係深受街坊愛戴嘅老字號。店名既然稱為「燒豬大王」，其乳豬自然係靈魂所在，皮脆肉嫩，金黃酥脆嘅豬皮下包裹住鮮嫩多汁嘅肉質。除咗招牌乳豬飯，店面嘅燒味雙拼亦相當受歡迎，部分菜式更會配以獨特嘅黑椒醬調味，風味與別不同。

【INFO】
《新蘇記燒豬大王》
地址：深水埗欽州街72號地舖
營業時間：星期一至日 9:00-21:00

燒味店推介 | 7. 榕哥陳皮燒鵝

榕哥陳皮燒鵝係近年社交平台「小紅書」上嘅大熱名店，全因其創意嘅陳皮風味燒鵝。老闆榕哥精選黑棕雌鵝，以十多種藥材配合新會陳年老陳皮醃製，燒製出嚟嘅鵝肉既具濃厚肉香，又帶有陣陣清幽嘅陳皮香氣。網民亦大讚其叉燒入味、燒肉肥瘦適中且皮脆。

【INFO】
《榕哥陳皮燒鵝》
地址：旺角砵蘭街50-52號地舖
營業時間：星期一至日 7:00-00:00

燒味店推介 | 8. 鏞記酒家

提及香港燒鵝，鏞記酒家絕對係殿堂級嘅存在。由燒味大牌檔開始做起，擁有數十年歷史嘅鏞記，以其家傳秘製燒鵝聞名國際，甚至曾有「飛天燒鵝」嘅美譽。雖然近年燒味界競爭激烈，但鏞記依然保持住高級酒家嘅氣派同埋專業。其燒鵝皮薄如紙且色澤金黃，鵝油香氣撲鼻，肉質結實而有鵝味。

【INFO】
《鏞記酒家》
地址：中環威靈頓街32-40號地舖
營業時間：星期一至日 7:00-00:00

燒味店推介 | 9. 龍邦燒味小廚茶餐廳

位於上環嘅龍邦燒味小廚茶餐廳，其叉燒曾被明星陳凱琳譽為「全香港最好食」。招牌厚切叉燒做到肥瘦均勻，肉質鬆軟豐厚，配上香脆嘅燶邊同埋完美滲透嘅蜜汁，鹹甜適中。除咗名物叉燒，呢度每日新鮮出爐嘅乳豬亦相當出色，豬皮酥脆且油脂香濃。

【INFO】
《龍邦燒味小廚茶餐廳》
地址：上環文咸東街38號地下B號舖
營業時間：星期一至日  7:00-23:00

燒味店推介 | 10. 波記燒臘粉麵店

喺西環屹立50年嘅波記燒臘粉麵店，連續多年獲米芝蓮必比登推介，以脆皮燒鵝馳名街坊。店家選用約6至7斤嘅黑鬃鵝，經過一夜醃製同埋8小時風乾後才烤製，令燒鵝皮達到色澤均勻且油脂豐盈嘅效果。招牌鵝瀨粉更是每桌必點，瀨粉吸滿鵝油精華，配上啖啖油香濃郁嘅鵝肉，滋味無窮。

【INFO】
《波記燒臘粉麵店》
地址：西環石塘咀皇后大道西425號地下P號舖
營業時間：星期一至六 11:30-20:00

燒味店推介 | 11. 新合成燒臘飯店

佐敦老字號新合成燒臘飯店已有40多年歷史，主打傳統手作燒味。其招牌乳豬每日限量供應且即叫即燒，確保皮層達到一斬即碎嘅鬆脆效果。此外，店家嘅兩重燒烤燒腩仔亦係得意之作，嚴選荷蘭豬腩肉配合秘方腩仔鹽，皮鬆肉鹹香。古法叉燒則以大火鎖緊肉汁，面層帶有迷人嘅焦香感。

【INFO】
《新合成燒臘飯店》
地址：佐敦廣東道589號B1-B2號舖
營業時間：星期一至日 10:00-20:00

燒味店推介 | 12. 甘牌燒鵝

由鏞記酒家第三代自立門戶嘅甘牌燒鵝，自開業以嚟連續10年蟬聯米芝蓮一星殊榮。店家承襲咗家傳秘方，並喺醃製同埋風乾過程精益求精。燒鵝皮油亮且入口充滿厚實油脂感，肉質軟嫩至極，配上秘製醬汁令人回味無窮。唔少明星如周潤發亦係常客，甚至有遊客專程打包回國。

【INFO】
《甘牌燒鵝》
地址：灣仔軒尼詩道226號寶華商業中心地舖
營業時間：星期一至日 11:30-21:30