澳門麵包店｜香港最近掀起一股牛角包熱潮，法式車輪牛角酥更係人氣大熱。如果香港嘅麵包已經滿足唔到身為麵包控嘅你，不妨去澳門呢3大人氣麵包店朝聖啦！3間 澳門麵包店 都各有特色，分別有方形牛角包、花形流心芝士酥皮杯，同埋骰仔形魔方麵包。味道突出之餘賣相一流，想知詳情就要睇埋落去啦！
圖片來源：官方圖片、IG@memofoodie、IG@pickyduo.macau、IG@macau_hunger_cover、IG@k3v_ippi、IG@eyeamfoodie、IG@ifoodie.mc｜撰文：Athena
澳門麵包店 1. Goat Baker
次次去澳門都食葡撻？今次一於去吓呢間烘焙店，試吓佢哋嘅花杯子啦！花杯子賣相睇落同葡撻好相似，但相比起一般嘅葡撻更加靚。因為佢外層嘅酥皮呈花朵嘅形狀，內裏填滿唔同口味嘅奶酪，而且仲會流心，超吸引！除咗花杯子，佢哋亦有售賣多種烘焙產品，多數以酥皮為主，例如唔同口味嘅羊角包、開心果沙翁羊角、岩燒芝士條等。
奶酪花杯子 (MOP$38)／抹茶花杯子 (MOP$40)／玫瑰花杯子 (MOP$40)：花形嘅外表好吸睛，面頭仲有焦糖效果。一咬落去外層酥皮鬆化酥脆，層次分明，唔會太油膩。內餡嘅奶酪非常流心，咬開後不停流出嚟，夠晒足料！奶酪芝士味濃郁，微酸就更加開胃。抹茶花杯子以小山園「若竹」抺茶粉製成，抹茶味濃郁甘香；玫瑰味則有淡淡嘅玫瑰花香，味道更清新。
彩虹羊角 (MOP$42) 嘅酥皮層層分明，傳統牛角包造型配上彩虹色交疊，賣相好特出新穎！彩虹羊角咬落有淡淡嘅牛油香，內裡係爆漿吉士醬。吉士醬口感順滑，甜度啱啱好，但吉士味稍為蓋過牛油香味。羊角包內有標準蜂巢狀組織，手法正宗，好啱打卡！
沙翁羊角 (MOP$45)有開心果味、焦糖餅乾味，同埋玫瑰味。沙翁嘅酥皮同樣鬆化，外層灑滿砂糖，一撕開內裏爆漿，好震撼！
店舖嘅麵包每人限買兩件，會喺每日12:00新鮮出爐，售完即止。麵包很快就售罄，而且每日款式唔同，想試嘅話就要早啲去排隊啦！
【INFO】 Goat Bakers 地址：澳門永聯台52號永聯大廈地舖 營業時間：星期一至日 12:00出爐至售完即止
澳門麵包店 2. Neibur Macau
Neibur Macau嘅招牌之作，就係佢哋自家出品嘅方形牛角包。佢結合咗法式車輪牛角酥同埋千層吐司嘅外表，成為四四方方嘅牛角包，好似骰仔咁，好可愛！呢度嘅可頌有甜味同鹹味可以選擇，甜味主要為水果口味，清爽唔甜膩；鹹味有芝士火腿呢個不敗嘅組合，無論幾時食都咁適合！方形可頌由MOP$18-$38不等，餐廳嘅烘焙產品會因應時節而改變，大家去之前可以先留意Neibur Macau嘅Instagram。
除咗方形牛角包之外，仲有方形酸種蛋撻，同樣都係咁得意！酸種蛋撻食落外酥內嫩，每日新鮮出爐。店內亦有供應多款輕食，例如多款甜味及鹹味酸種吐司、卡邦尼烏冬、明太子煙三文魚烏冬、和牛咖喱烏冬、全日早餐、煎雞排沙律及精品咖啡等。去開澳門不妨趁有時間嚟chill返個下午啦！
【INFO】 Neibur Macau 地址：澳門筷子基東方海岸一座地下M鋪125號 營業時間：星期二至日 11:30 - 19:30（18:00起只售賣已製產品）
澳門麵包店 3. 日初四時麵包館
呢間小店售賣多款唔同種類嘅麵包，包括法國布里歐修（Brioche）、牛角包、貓貓吐司、鹼水包、酸種麵包、純素麵包及麻糬泡芙等，每款嘅賣相都好吸引！店舖最受歡迎嘅係迷你版布里歐修——魔方麵包。麵包店只選用日本及法國麵粉，而且唔會加防腐劑、人造色素及多餘添加劑，保證天然又健康！
雙重朱古力麻糬魔方 (MOP$20)／芒果乳酪抹茶魔方 (MOP$20)／芝麻合桃魔方 (MOP$20)／草莓克姆林魔方 (MOP$22)：魔方，係迷你版嘅法國布里歐修，特點係口感鬆軟並帶有牛油香氣，製作過程一滴水都冇加。雙重朱古力麻糬味有香濃可可味，配埋煙煙韌韌嘅麻糬增添口感；芒果乳酪抹茶味內有芒果乳酪，酸酸甜甜好開胃！另外仲有抹茶牛角魔方，十足千層吐司～
小山園抹茶／比利時朱古力／阿華田／伯爵茶／焙茶脆皮麻糬泡芙 (MOP$32)：泡芙面頭鋪上菠蘿皮，食落酥脆，每款泡芙入面都有煙韌麻糬，再配上幼滑嘅抹茶奶油球同埋堅果碎，口感好豐富～而且外表好靚，打卡一流，鍾意食泡芙嘅你一定要試吓！
開心果醬／蒜香芝士腸/芝麻合桃鹼水包 (MOP$26)：呢度嘅德國鹼水包（Pretzel）亦係佢哋嘅得意之作，睇落有少少似花生，明顯見到入面有一層一層嘅餡料，外貌好吸引！傳統鹼水包口感硬脆有韌度，但呢度嘅鹼水包外層脆脆的，內裏就相對鬆軟，令大眾更容易入口。
【INFO】
日初四時麵包館
地址：澳門賈伯樂提督街群威大廈地面層FOOD DELI內（來來超市旁）
營業時間：星期二至日 11:00 - 20:30
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
