成日係IG Shop見到啲Bagel同Scone，想買嚟試但又唔知邊間好食？小編有介紹喎！作為一個鍾意食甜食同打卡嘅女仔，點可以自私食又唔介紹畀大家呢！今次小編就揀咗幾間有質素、又親身品嘗過嘅小店，想知邊啲好食同邊到有得買就記得碌落去喇！
圖片來源：官方圖片｜撰文：Debbie
IG-Shop超邪惡小甜點推薦（1）: koeykoeyt
第一間想推薦畀大家嘅IG小店係-koeykoeyt，由IG-shop起家到依家有兩間pop-up門市，可以話係小編幫襯得最多次嘅小店！佢哋除咗有Bagel（貝果）同Canelé（可麗露）之外，仲有賣軟包同Dacquoise（達克瓦茲），節日期間仲可能會有月餅賣㗎！小編就專買Bagel（貝果）同Canelé（可麗露）！同其他地方食到最大分別嘅就係呢間嘅bagel非常足料又好飽肚，而且每個口味都好夾！佢哋定時定候都會轉一轉menu，咁就唔怕好快食厭啦！佢哋仲有個貼心位好抵贊，佢哋會將食用方法放入袋入面，等大家可以品嘗到最佳嘅食物狀態。想試記得去幫襯啊！
小編推薦 ★★★★★：咖啡Lotus焦糖餅貝果
小編推薦 ★★★★★：伯爵茶味可麗露
Instagram: koeykoeyt
Popup期間限定店（現貨供應）
📍尖沙咀k11 Art Mall B1/F
📍元朗Yoho1 1/F
圖片來源：官方圖片
IG-Shop超邪惡小甜點推薦（2）: Cookieism 曲奇阿嬸
第二間想推薦畀大家嘅IG小店係 – Cookieism 曲奇阿嬸。話說有一日小編做完gym之後就去中環街市行個圈，點知就見到有賣軟曲奇嘅店，好奇心驅使下就試咗我第一塊喺呢度買榛子牛奶朱古力曲奇～一試真係不得了！點解可以咁好食㗎！餅乾唔會有過多嘅甜味、加上餅乾内餡入面真係好豐富嘅nuts同朱古力,重點係唔會食到成手油！價錢都唔算好貴㗎。同上一間一樣，佢哋都係會定期轉menu,仲可以買Set裝試吓唔同口味嘅曲奇添！
小編推薦 ★★★★★：抹茶白朱古力曲奇
小編推薦 ★★★★★：榛子牛奶朱古力曲奇
Instagram: cookieism
中環街市 Shop 106 1/F
沙田新城市廣場三期 Pop-up store (到2022年1月14日)
新世紀廣場Moko Pop-up store (到2022年3月31日)
圖片來源：官方圖片
IG-Shop超邪惡小甜點推薦（3）: baki.eee
第三間想推薦畀大家嘅IG小店係 – baki.eee。之前嘅糖街聖誕市集見到呢間小店有擺booth，小編又點會放過有得食Scone嘅機會呀！去到嘅時候原本想試食開心果味嘅scone已經sold out咗，剩返一盒四款口味嘅scones！咁就可以一次過試晒原味、抹茶、伯爵茶同朱古力味！低糖低脂嘅Scone食落真係一啲負擔感都冇仲好夠味！佢仲有分有麻糬同冇麻糬嘅版本，不過兩個口感分別唔大。
小編推薦 ★★★★★：Twinings伯爵茶司康 配麻糬
小編推薦 ★★★★★：小山園抹茶麻糬司康
Instagram: baki.eee
Popup期間限定店
📍 銅鑼灣希慎廣場B1/F
圖片來源：官方圖片
IG-Shop超邪惡小甜點推薦（4）: ly_bakery 享樂烘焙
第四間想推薦畀大家嘅店係 – 享樂烘焙。咁多間入面，享樂烘焙嘅知名度應該係5間入面最高！除咗新蒲崗之外九龍灣同元朗都有分店，最具人氣嘅產品除咗有冰心包（小編長期買唔到）之外，仲有相比起小店更加平嘅Scone同bagel！$28就可以揀2款口味，見到記得要買呀，因為好早就會賣晒㗎啦！Bagel即買即食就最正，鬆軟濕潤，咬落又非常煙韌，難怪開咗三間分店依然人氣高企～講起又想食喇！
小編推薦 ★★★★★：小山園抹茶司康
小編推薦 ★★★★★：黑芝麻司康
Instagram: ly_bakery
店家地址：
九龍灣店：九龍灣常悅道21號The Eastmark地下3號舖
新䈬崗店：新蒲崗大有街3號萬迪廣埸地下E舖
元朗店： 元朗元龍街9號形點I1樓1097號舖
圖片來源：官方圖片
IG-Shop超邪惡小甜點推薦（5）: Cookie Elephant
最後想推薦畀大家嘅店係 – Cookie Elephant! 傳說中會光速賣哂嘅好味曲奇你哋又試過未呢？價錢方面貴絕5間，但依然超受歡迎啊！佢哋整體感覺唔油膩同唔會太甜，質感鬆軟但又未到好易散開，屬於perfect level嘅曲奇。不過Pop-up store仲有好多其他item係未有，小編期待佢地之後有更多嘅pop up或者實體店啊！
小編推薦 ★★★★★：Walnut Chocolate Chip
小編推薦 ★★★★★：Dirty Elephant
Pop-up Store: 金鐘道93號Lab Concept 金鐘廊1樓
圖片來源：官方圖片
【相關文章】：小編精選！深水埗5大打卡Cafe合集 有機健康/寵物友善/日系文青風
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
