尖沙咀掃街 | 相信好多香港人都鍾意掃街，同一班朋友一齊share，每樣美食都可以試下～今次小編就為大家介紹下尖沙咀6大抵食掃街小店，有齊各款港式地道同fusion小食，價錢仲好相宜，最啱夜晚放工之後同朋友一路行街一路嘆美食！想知尖沙咀有咩抵食掃街小店，就要睇埋落去同bookmark定啦！
圖片來源：Openrice @Karying_karen、@huiyantung、@foodxgoodwest_hk、@cherb.space、@victorngai168、@小豚子、@cwho2688、@LinkFu、@Venuswing、@abitoffood、@wlwlwendy、@車媽媽｜撰文：Icy
尖沙咀掃街 | 抵食小店1 – 餓媽家姐
厚福街一向都係美食集中地，而位於厚福街嘅餓媽家姐開業冇耐，除咗個店名夠盞鬼，主打嘅食物都係港式地道小食，或者fusion創新小食，由來自唔同領域嘅專業廚師主理。店舖面積唔大，但都會提供枱仔俾客人立食。
當中香港人最喜愛嘅燒賣，$20有14粒，可以同魚蛋雙拼，口感煙韌彈牙夠晒正宗，仲可以加辣汁，份外惹味～而特色小食就推介香辣XO醬腸粉，炒得非常有鑊氣，軟滑腸粉好掛汁，仲會配上牛肉同雞蛋，$44一份夠晒2至3個人一齊開心share，鍾意鹹香野食嘅朋友唔可以錯過！
【INFO】 餓媽家姐 地址：尖沙咀加拿芬道45-47號宏生大廈地下D2號舖 時間：星期一至四 13:00-23:30/星期五至六 13:00-00:00/星期日 13:00-23:30 店舖專頁：餓媽家姐
尖沙咀掃街 | 抵食小店2 – 嘉寶漢堡
如果想食平靚正嘅港式漢堡，就要試下嘉寶漢堡。當中$68嘅黑松露芝士牛堡套餐，除咗有大大個漢堡，仲配埋飲品同即炸厚切薯條，性價比超高～黑松露醬好香濃，而牛肉好厚身，充滿牛肉鮮味。另外芝士大啡菇漢堡亦值得一試，芝士鹹香開胃，而啡菇亦好多水份，一咬落去就爆晒汁！
另外仲有各款啱晒掃街嘅港式小食，例如即叫即炸嘅炸燒賣，$15有8粒，外脆內軟，加上椒鹽之後更加滋味。而蕃薯條香脆清甜，加上番茄醬味道超搭配！
【INFO】 嘉寶漢堡 地址：尖沙咀寶勒巷9-11號和益中心地舖 時間：星期一至日 07:30-22:00 店舖專頁：嘉寶漢堡
尖沙咀掃街 | 抵食小店3 – 金饃坊
金饃坊係一間手做肉夾饃專門店，除咗供應平時比較少見嘅肉夾饃，仲有各款手製陝西麵食同平價早餐，所以經常吸引附近打工仔光顧。所有肉夾饃都係即叫即整，大大份都只係大約$20一份，以烤過嘅麵包夾住臘豬肉，肉餡鹹香多汁，咬落去超juicy！
如果想買外賣返屋企慢慢食，其他手製陝西麵食亦只係大約三十幾蚊一碗連飲品，飽肚又抵食。特別推薦秘製豬扒米粉，豬扒口感嫩滑，米粉索晒湯底精華，仲可以加辣汁，非常入味！
【INFO】 金饃坊 地址：尖沙咀加連威老道98號東海商業中心地下18B號舖 時間：星期一至六 07:30-19:30
尖沙咀掃街 | 抵食小店4 – 豐記雞蛋仔美食
講起港式街頭小食，又點少得雞蛋仔呢？豐記雞蛋仔美食主打雞蛋仔同各款經典街頭小食，例如魚蛋燒賣、格仔餅等等。
雞蛋仔有幾款口味選擇，有原味、香芋味、朱古力味同埋芝麻椰絲味。啱啱整起嘅雞蛋仔外脆內軟，充滿蛋香味，而且粒粒飽滿，咬開裏面係實心嘅雞蛋糕，口感煙煙韌韌～
【INFO】 豐記雞蛋仔 地址：尖沙咀加連威老道41C-D號嘉威大廈地舖 時間：星期一至日 11:00-23:45
尖沙咀掃街 | 抵食小店5 – 蓮姐小食
位於厚福街一條巷仔入面嘅蓮姐小食，雖然望落冇咩特別，但鍾意食魚蛋燒賣嘅朋友就一定要試下蓮姐小食嘅秘製辣汁，辣度分為小辣、中辣同大辣，$20都有成10粒，係尖沙咀嚟講認真抵食。
另外仲有格仔餅、雞蛋仔、碗仔翅、糯米飯同腸粉之類嘅小食，中午好多附近嘅打工仔都會買個熱辣辣嘅糯米飯做午餐，大約$30一個，份量仲好飽肚添！
【INFO】 蓮姐小食 地址：尖沙咀厚福街9號地下C號舖 時間：星期一至日 11:00-00:00
尖沙咀掃街 | 抵食小店6 – 第三代肥仔小食店
第三代肥仔小食店曾經入榜米芝蓮街頭小食推薦名單，所以一直以來都好受歡迎。店舖主打各款港式冰鎮滷味，例如大生腸、紅腸、豬耳、墨魚、火雞腎等等。每款滷味都啖啖肉好新鮮，仲會配上甜醬芥辣等醬料，增添味道層次感。
店員會每日新鮮熬製滷水，再仔細清理所有生腸同內臟，確保衛生，所以食落口感爽脆彈牙，唔會有腥味。有選擇困難症嘅朋友，可以選擇$35皇牌套餐，有齊墨魚、細生腸同火雞腎，咁就每樣都可以試啲喇～
【INFO】 第三代肥仔小食店 地址：尖沙咀厚福街3號華博商業大廈地下G1號舖 時間：星期一至日 13:00-00:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
