一講起元朗，大家都會諗起各款惹味嘅元朗特色小食，其實鄰近嘅天水圍亦蘊藏唔少馳名街坊美食，例如嘉湖新北江商場同T Town頌富商場，都係天水圍比較出名嘅地道美食集中地，每逢食飯時間都係人流不斷。小編就為大家介紹其中6大天水圍美食，下次入天水圍玩就可以跟住去覓食啦！
圖片來源：Openrice @lichristine、@mandy-suen、@iceoolongtea、@Jayatlife、@新丁奇遇記foodie、@sinmtsui2、@Meaty_Monsters、@sleepyMZ、@KLABB、@louisfoodie404、@CrystalYiuYiu、@Ah Kabb、@Bylson、@eatwithyyy、Facebook @T Market – 頌富市場 | 撰文：Icy
天水圍美食｜1 – 津津有味
嘉湖新北江商場係天水圍區內歷史最悠久嘅商場之一，入面大部份商舖都係比較平民化同懷舊嘅街坊老店。而「津津有味」小食店開店已有二十多年，主打多元化新奇口味嘅雞蛋仔，多年來都吸引唔少學生哥幫襯。招牌「彩虹星星雞蛋仔」賣相繽紛鮮豔，有香芋味、芝麻味、草莓味、阿華田味、牛乳芝士味、伯爵茶味等等，味道選擇多達30款！
雖然雞蛋仔價錢唔算好平，大概$20至$48一份，視乎口味，但勝在即叫即整，夠晒熱辣辣。口感外脆內軟，咬開裏面係軟綿綿嘅雞蛋糕，充滿蛋香味，仲可以加入軟糯嘅麻糬粒，所以算係值回價錢！
【INFO】 津津有味 地址：天水圍天湖路1號嘉湖新北江商場一期地下A95號舖 營業時間：星期一至日 11:00-21:00
天水圍美食｜2 – 麗江雲南米線
「麗江雲南米線」同樣位於嘉湖新北江商場，開業十幾年，唔好睇佢店面細細無咩特別咁，其實佢嘅麻辣湯米線非常出色，多年來深受街坊歡迎。麻辣湯底充滿麻香，嗜辣嘅朋友一定會食得好過癮。米線軟硬度適中，好掛湯汁，而且唔會好油膩。
配料選擇有二十多款，例如肥牛、炸雞翼、腩肉、豬紅、肥腸、蘿蔔等等。其中招牌脆炸酥肉同蒜泥白肉最受歡迎，酥肉外層唔會好厚粉，咬落去係好juicy嘅肉丁。而蒜泥白肉嘅醬汁充滿蒜香味之餘，亦帶少少甜味，半肥瘦嘅腩肉索晒啲醬汁，食落好惹味！美中不足嘅係店舖位置較少，大家想品嚐麗江米線嘅話就要有心理準備排隊喇！
【INFO】 麗江雲南米線 地址：天水圍天湖路1號嘉湖新北江商場一期1樓C45A號舖 營業時間：星期一至日 10:30-21:30
天水圍美食 | 3 – 樂湖刀削麵
以下介紹嘅「樂湖刀削麵」亦都係位於嘉湖新北江商場入面，所以話新北江係美食集中地真係不足為奇！老闆會每日現場做刀削麵，充滿麥香，配上香濃嘅牛腩湯或麻辣湯底，麵條好掛湯汁，口感亦非常有嚼勁。
餸菜方面推薦大家試吓炆牛腩同滷水雞翼，半肥瘦嘅牛腩炆得好腍好入味，而滷水雞翼口感肥美多汁，帶有少少甜味幾開胃。呢間小店嘅食物份量都唔少，夠晒飽肚，性價比好高！
【INFO】 樂湖刀削麵 地址：天水圍天湖路1號嘉湖新北江商場1樓C41B號舖 營業時間：星期一至日 12:15-22:00
天水圍美食｜4 – 森堡美食
「森堡美食」同樣已開業多年，雖然店面細細，只有9張四人枱，但佢主打嘅港式焗飯就捉住唔少人嘅胃，好多街坊都係由細食到大！焗飯可以選擇白飯或者炒飯底，亦有米線、烏冬、長通粉、菠菜麵等等嘅選擇，份量非常多。而醬汁可選白汁、咖喱汁、黑椒汁、南瓜汁、菠菜汁、葡汁等等，任你自由配搭～
當中焗白汁海鮮飯有多款海鮮配料，一個焗飯就有幾件大大舊嘅香煎魚柳，啱晒各位食肉獸。另外小店亦提供素食餐點，例如素麥樂雞、素炒烏冬等等，烏冬彈牙有咬口，各位素食朋友就有口福啦！
【INFO】 森堡美食 地址：天水圍天湖路1號嘉湖新北江商場1樓C43A號舖 營業時間：星期一至日 11:30-22:00
天水圍美食｜5 – 大甲芋圓專賣店
相信好多人都有個甜品胃，同家人朋友食飽飯就緊係想散下步，再嘆番個甜品。由嘉湖新北江商場步行約15分鐘，就會到達天瑞商埸，呢度有間「大甲芋圓專賣店」，主打各款抵食傳統台式芋頭甜品，味道正宗天然。
呢度嘅芋圓甜品大部份約$30以內，學生都會負擔得起，而且份量十足。芋圓口感煙煙韌韌，好香芋頭味，搭配紅豆、蓮子、雪糕、仙草等等嘅配料，感覺滋潤又清涼消暑。
【INFO】 大甲芋圓專賣店 地址：天水圍天瑞路9號天瑞商場地下G2E號舖 營業時間：星期一至四、日 14:00-23:00 / 星期五至六 14:00-00:00
天水圍美食｜6 – Yogurt Girl
最後一間要介紹嘅天水圍甜品就係今年新開嘅Yogurt Girl，店舖位於天水圍T Town頌富商場，主打特色即炒磚塊乳酪雪糕，新開冇耐已經獲得好多街坊嘅好評。雪糕口味多達10多款，例如海鹽芝士、蜜瓜、士多啤梨、榴槤、提子、香蕉朱古力等等，賣相色彩繽紛！
大家可以自由配搭水果乳酪杯，酸奶以低脂奶製成，感覺比較健康。先選擇酸奶口味，然後再配上西瓜、哈密瓜、蘋果、火龍果等水果粒，味道好清新！
【INFO】 Yogurt Girl 地址：天水圍天華路30及33號T MARKET頌富市場地下 營業時間：星期一至日 11:30-22:30
