大閘蟹放題 | 每年一到秋季，最期待嘅就係肥美爆膏嘅大閘蟹！金黃嘅蟹膏、鮮甜嘅蟹肉，配上一杯暖暖嘅薑茶，簡直係人間極品。但係，面對市面上五花八門嘅大閘蟹套餐同放題，到底邊間最抵食、邊間最有特色呢？今次，我哋為大家精選咗多間人氣大閘蟹宴推介，由超高CP值嘅任食放題、米芝蓮級嘅淮揚名菜，到創新嘅蒸氣鍋盛宴，總有一款可以滿足你對「蟹」嘅慾望！
圖片來源：12間餐廳官方圖片 | 撰文：Ginger
大閘蟹放題2025 | 1. 上海新大眾
講到食大閘蟹要夠抵、夠放縱，每年都人氣爆燈嘅上海新大眾大閘蟹專門店絕對係首選！佢哋推出嘅大閘蟹放題，分級按蟹重量計價，最平$268起就可以75分鐘無限任食約3-5両大閘蟹，簡直係蟹迷嘅福音！呢度唔單止大閘蟹任食，仲提供清蒸、鹽焗、避風塘、荷葉花雕蒸等多種食法任你揀，食多幾隻都唔會覺得悶！除咗原隻大閘蟹，放題仲包括蟹粉水餃、生滾大閘蟹粥、瀑布蟹黃撈麵等等，保證你由頭到尾都食到蟹嘅鮮味。套餐仲有汽水同啤酒任飲，非常貼心。
【INFO】
《上海新大眾大閘蟹專門店》
黃大仙鳳德店
地址: 黃大仙鳳德道13號地舖
營業時間: 星期一至日 12:00 - 02:00
黃大仙飛鳳街店
地址: 黃大仙飛鳳街46號地舖
營業時間: 星期一至日 12:00 - 02:00
大閘蟹放題2025 | 2. 原味小聚蒸汽鍋
想食大閘蟹之餘，又想連龍蝦、海鮮都一網打盡？旺角蒸氣鍋專門店原味小聚蒸汽鍋推出嘅「150分鐘大閘蟹龍蝦海鮮蒸氣鍋餐」就啱晒你！每位只需$268起，喺高質食材中絕對係性價比之選！呢個蒸氣鍋套餐嘅食材非常豐盛，包括每位爆膏大閘蟹三隻、半隻生猛厚肉龍蝦、鮮肥生蠔、韓國鮮鮑魚等，仲有海生蝦、爽甜貝殼類，以及澳洲M5和牛、西班牙黑毛豬等上乘肉類，真係非常豪華！由於採用蒸氣鍋烹調，可以最大限度保留海鮮嘅鮮味，而且店員仲會幫忙蒸海鮮同肉類，唔使擔心自己會蒸過火。
【INFO】
《原味小聚蒸汽鍋》
地址: 旺角彌敦道575號LADDER Dundas 9樓
營業時間: 星期一至日 12:00 - 00:00
大閘蟹放題2025 | 3. 羲和雅苑
如果你想食大閘蟹之餘，又想嘆埋頂級嘅北京片皮鴨，羲和雅苑嘅精品大閘蟹片皮鴨90分鐘放題（$368 起）就絕對可以滿足你嘅願望！呢個套餐將兩款頂級食材無限供應，性價比高到令人驚喜！喺90分鐘內，你可以無限享用清蒸大閘蟹同北京烤鴨，兩者都係無限任食！除咗主角之外，放題仲可以自選多款精品菜式，例如有磯煮鮑魚、清酒鵝肝、金沙大蝦球等等，令到個蟹宴更加豐富。套餐仲包括黃金蟹肉炒飯同蟹粉扒菜膽等升級美味，甜點則可以揀手工奶皮子酸奶或者薑茶湯丸。
【INFO】
《羲和雅苑》
尖沙咀店
地址: 尖沙咀廣東道3-27號海港城海運大廈2樓OTE203號舖
東涌店
地址: 東涌達東路20號東薈城名店倉4樓417號舖
營業時間: 星期一至日 12:00 - 22:00
大閘蟹放題2025 | 4. 九龍城等等Hea
九龍城人氣台式餐廳等等Hea，喺今個秋季都加入咗大閘蟹戰場，推出88分鐘大閘蟹任飲任食放題！佢哋選用咗由食神梁文韜先生全力推介、通過食安中心檢疫嘅大閘蟹教主品牌，質素同衛生都有保證！呢個放題套餐可以任食4両-6両大閘蟹，除咗無限供應嘅大閘蟹公同大閘蟹乸，任食菜單仲有好多誘人嘅蟹饌，例如有生滾大閘蟹粥、蟹粉水餃、瀑布蟹粉撈麵/飯等，保證食到你盡興！最特別嘅係，套餐仲包括多款台式小吃任食，好似蟹粉澎湖花枝丸、萬華街滷肉飯、士林鹽酥雞粒，同埋甜品手工芋圓等等。另外，套餐仲有超過20款台式飲品任飲，包括珍珠奶茶系列同果茶系列。
【INFO】
《九龍城等等Hea》
地址: 九龍城福佬村道41號地下
營業時間: 星期一至日 11:30 - 23:00
大閘蟹放題2025 | 5. 陶源酒家
老字號酒樓陶源酒家今季推出嘅兩小時任食大閘蟹放題，絕對係追求多樣化食法同高質點心嘅朋友嘅心水選擇！呢個放題除咗最基本嘅清蒸煮法，仲有太雕蒸同油鹽焗三種食法，就算食多幾隻都唔會覺得悶。
陶源酒家主打精緻粵菜，今次放題優惠更可以無限追加點心、小菜與甜品，絕對可以過足蟹癮！最吸引嘅係，每位仲會加送特盛三式，包括鮑汁扣原隻鮑魚伴椎茸、蟹粉瀑布搭配上海麵、窩巴、手抓餅，同埋蟹肉椰菜粉絲各一份，非常豪華。三種大閘蟹食法各有特色：清蒸可以歎到原汁原味；太雕蒸帶有淡淡酒香，最啱怕腥嘅朋友；而鹽焗則帶鹹香，帶出蟹膏嘅香滑同蟹肉嘅鮮甜。陶源酒家以其精緻粵菜嘅功架，為食客帶來一場結合傳統與新意嘅大閘蟹任食盛宴。
【INFO】
《陶源酒家》
灣仔店
地址: 灣仔菲林明道 8 號大同商場 1 至 2 樓
尖沙咀店
地址: 尖沙咀加連威老道 98 號東海商業中心地庫 1 樓
旺角店
地址: 旺角豉油街 118 號(仕德福酒店)
大閘蟹放題2025 | 6. 个園竹語
如果想追求米芝蓮級嘅精緻體驗，由淮揚菜非物質文化傳人王東師傅主理嘅个園竹語，絕對係品嚐大閘蟹嘅不二之選！呢間尖沙咀嘅精緻上海淮揚菜餐廳，以匠心呈獻嘅「六両大閘蟹．珍饈八味金秋宴」（$598/位）聞名。
王東師傅醉心鑽研淮揚菜系逾30年，將江蘇大閘蟹揉合淮揚及滬菜嘅經典風味，匠心呈獻八道菜式。套餐選用足六両重嘅江蘇公蟹，提供「足六両保證」，包換包新鮮，而且所有大閘蟹均通過檢驗，食得安心。餐廳仲特設貼心嘅「拆蟹」服務，專人幫你去除不可進食嘅部位，讓你優雅細味品嚐！菜式非常精彩，由四道精緻前菜揭開序幕，主角清蒸大閘蟹之後，仲有蟹粉燴魚翅、蟹乾粉翡翠牡丹蝦球，同埋澎湃湯汁嘅原隻蟹粉小籠包。
【INFO】 《个園竹語》 地址: 九龍尖沙咀廣東道25號海港城港威商場3樓3202號舖 電話: 2116 8328 營業時間: 星期一至日 11:30 - 16:30 ; 18:00 - 22:30
大閘蟹放題2025 | 7. 十里湘薈
精緻上海菜館十里湘薈推出「金秋大閘蟹饗宴」，呢個金秋蟹宴套餐由前菜三拼盤開始，有梁溪脆鱔、法國白鱘魚子醬煙燻溏心蛋、櫻桃鴨肝三款上乘開胃前菜。接著有湯羹「蝦籽蟹粉燉獅子頭」暖胃，然後就到三款大閘蟹菜式：六両清蒸江蘇大閘蟹、芙蓉蟹粉蝦球、特製蟹粉小籠包，讓鮮味盡情捲席味蕾。套餐仲有兩款廚師巧製嘅主菜——黑毛豬紅燒肉、黑蒜慢燉安格斯牛肉，最後以紫薯薑茶卵石湯圓作結，非常圓滿。
【INFO】 《十里湘薈》 地址: 尖沙咀柯士甸道西1號ELEMENTS圓方火區1樓1008號舖 營業時間: 星期一至五 11:30 - 22:00，星期六、星期日、公眾假期 11:00 - 22:00
大閘蟹放題2025 | 8. 喜記蟹將軍
喜記蟹將軍向來以炒辣蟹聞名，但喺大閘蟹季，佢哋推出嘅全新大閘蟹套餐同樣唔可以錯過！呢度提供二人餐同四至六人餐，有多達9道菜，主角有清蒸大閘蟹、牛油鹽燒大閘蟹兩種食法，仲有多款以蟹入饌嘅菜式，例如蟹粉拌饅頭、蟹粉扒西蘭花、蟹粉撈麵。除咗蟹，仲有杏汁白肺湯、招牌風沙雞、避風塘牛仔粒等人氣菜式，非常豐富。飯後仲會奉上薑茶湯圓驅寒解毒。
【INFO】 《喜記蟹將軍》 地址: 尖沙咀彌敦道118-130號美麗華商場2期2樓268-270號舖 營業時間: 星期一至日 12:00 - 23:00
大閘蟹放題2025 | 9. 富臨皇宮
富臨皇宮嘅「2小時大閘蟹放題」無限任食大閘蟹同片皮鴨！呢個套餐不單止大閘蟹同片皮鴨任食，仲包括多款蟹粉美食，性價比非常高。大閘蟹隻隻蟹膏飽滿，肉厚鮮甜，而且可以食到滿足為止！套餐仲包括蟹粉三重奏撈、任食蟹粉湯小籠包，同埋任飲指定啤酒或汽水。每位仲會送上珍味定食：黑魚子、和味鮑魚、蜜汁叉燒、溏心蛋、話梅紅茄，非常豪華。
【INFO】 《富臨皇宮》 沙田分店 地址: 新界沙田瀝源街7號沙田娛樂城4樓 建榮分店 地址: 新界屯門建榮街24-30號建榮商業大廈1樓 中央廣場分店 地址: 新界屯門海榮路22號中央廣場地下及1樓 和宜合道分店 地址: 新界葵涌和宜合道26-30號地下A舖 天盛分店 地址: 天水圍天盛苑天盛商場1樓L116號舖
大閘蟹放題2025 | 10. 瀛豐放題料理
位於銅鑼灣嘅瀛豐放題料理專門店，推出嘅3小時大閘蟹放題，只需$499起，就可以任食即叫即蒸嘅4両重爆膏江蘇大閘蟹，蟹膏金黃飽滿。瀛豐放題可以同時無限追加逾200款料理，包括刺身、壽司、燒物、泰式海鮮小食及甜品雪糕，選擇極度豐富！如果你想食得更豪，仲可以加錢升級，任食生蠔同海膽帆立貝。
【INFO】 《瀛豐放題料理專門店》 地址: 銅鑼灣駱克道491-499號京都廣場3樓 營業時間: 星期一至日 12:00 - 15:00，16:00 - 00:00
大閘蟹放題2025 | 11. 星聚軒
星聚軒推出嘅大閘蟹放題，每位$498起就可以喺兩小時內無限任食爆膏江蘇大閘蟹，鮮甜嘅蟹膏滋味一流，深受食客好評！佢哋喺佐敦、葵涌同啟德都有分店，非常受歡迎。除咗任食大閘蟹之外，套餐仲包括片皮鴨、生炒糯米飯同自助甜品等菜式。部分套餐仲會附送小米燴遼參同鮑魚等高級海味。
【INFO】 《星聚軒》 葵涌店 地址: 葵涌葵昌路72-76號Life@KCC 9樓 營業時間: 星期一至日 08:00 - 22:00 啟德店 地址: 九龍城啟德沐寧街10號Oasis Place 1樓G號舖 營業時間: 星期一至日 08:00 - 23:00 佐敦店 地址: 佐敦彌敦道219號莊士倫敦廣場8樓 營業時間: 星期一至日 08:00 - 16:00 及 17:30 - 23:30
大閘蟹放題2025 | 12. Crabtastic
Crabtastic 絕對係香港最強嘅大閘蟹專門店！由網店起家，而家喺尖沙咀開設實體店，憑藉自家太湖養殖場嘅正貨認證同對品質嘅堅持，深受一眾蟹迷追捧。
Crabtastic 嘅大閘蟹全部有產地來源證、衛生證，並有防偽標籤，確保正貨。佢哋喺自家養殖場用小魚、小蝦等天然飼料飼養足夠300天，絕無添加激素，食得更安心。除咗原隻大閘蟹，Crabtastic 最厲害嘅係佢哋將蟹粉玩出新花樣！佢哋有大閘蟹海膽丼等豪華菜式，仲有蟹粉小龍蝦肉拌麵、蟹粉雲吞、蟹粉小籠包等包裝食品，讓蟹迷不受季節所限，隨時喺屋企都可以享用蟹宴。想喺屋企開餐？Crabtastic 仲有代蒸服務、鹽焗/油鹽焗/冰醉花雕蒸等外賣選擇，連食蟹工具、薑茶、蟹醋都幫你準備好，一條龍服務讓你在家也能輕鬆享受高品質的蟹宴。
【INFO】 《Crabtastic》 地址: 尖沙咀金巴利道48B號地下 營業時間: 星期一至日 12:00 – 21:00 電話 / Whatsapp: 9587 4992
