香港壽喜燒 | 天氣漸漸轉涼，最適合嘅就係食一鍋暖笠笠嘅壽喜燒！今次為大家介紹10間香港高質壽喜燒餐廳，無論係抵食之選，定係頂級和牛，都可以滿足到唔同需求，例如銅鑼灣「Suki Kansai 壽喜．關西」，以$168起就可以享用6道菜套餐，仲有北海道A4和牛選擇，非常抵食！而尖沙咀「廿三．壽喜燒」提供日本近江牛，加上師傅即席烹調，視覺同味覺雙重享受。如果鐘意創新，可以試「十侍」，佢哋用棉花糖製作壽喜燒，甜香滿滿，超級特別！
圖片來源：Openrice@cyrus1818、@ bewithyou、@ hk.eateateat、@ leetszhin、@ mikochan0108｜撰文：Ginger
壽喜燒推介 | 1. Suki Kansai 壽喜.關西
如果你想試吓關西風壽喜燒，可以去「Suki Kansai壽喜・關西」啦！呢間餐廳主打親民價，壽喜燒套餐最低只需要$168，仲可以加價升級和牛份量至180g。餐廳提供三款和牛壽喜燒套餐，包括赤身、肩胛同肉眼，價錢實惠，可以享用到北海道A4和牛，重點係佢哋有供應北海道十勝黑毛和牛，真係好抵食！套餐入面有六道菜，包含濃郁香甜嘅十勝和牛、味道超濃嘅蘭王蛋、每日新鮮直送嘅野菜、白飯或者烏冬，仲有甜品添！店員會即場用牛脂「起鑊」，再倒入自家製壽喜燒醬汁，將和牛煎香，整個過程充滿肉香同醬香，焦香味十足，絕對唔油膩！
【INFO】
《Suki Kansai 壽喜.關西》
地址：銅鑼灣耀華街16號地舖
營業時間：星期一至日 12:00-22:00
壽喜燒推介 | 2. 廿三 . 壽喜燒
尖沙咀「廿三 SUKIYAKI」主打席前烹煮嘅關西風糖烤壽喜燒，佢哋嘅糖烤壽喜燒係先將砂糖灑喺牛肉上，烤出香噴噴嘅焦糖味，然後再用特製嘅壽喜燒醬汁慢慢烹煮。師傅會用正宗嘅手法，即場為顧客烹調，確保牛肉達到最理想嘅食用狀態。佢哋選用嘅牛肉係擁有四百多年歷史嘅近江牛，同神戶牛、松阪牛一樣，都係日本三大和牛之一，肉質細緻，脂肪甘甜。主廚精選咗唔同部位嘅和牛，包括肉眼、西冷同牛肩，入口即化，配合淡淡嘅蛋汁風味，再加上使用淡路島熟成洋蔥同主廚秘製醬汁，令到整體口感豐富！
【INFO】
《廿三 . 壽喜燒》
地址：尖沙咀諾士佛臺10號騰龍閣23樓
營業時間：星期一全日休息，星期二至日12:00 - 15:00，17:30 - 21:45
壽喜燒推介 | 3. 壽喜燒‧中川
「壽喜燒·中川」！一次過品嚐到三款A5和牛，將關西傳統同現代滋味完美結合。主廚板垣和幸46歲就已經有超過25年嘅廚藝經驗，仲曾經去過荷蘭阿姆斯特丹大倉酒店磨練廚藝。餐廳提供3款午市壽喜燒菜單同4款晚市菜單，主打關西風格，先煎煮牛肉，再加入自家調製嘅靈魂醬汁，突顯肉味。呢款醬汁係用福岡縣嘅白水晶糖同和歌山手工醬油製成，香氣濃郁。另外，餐廳仲用兵庫縣嘅「日本一こだわり卵」打造兩款獨特嘅蛋汁，一款係輕輕蒸熟，蛋白邊帶淡淡晶透；另一款則係純蛋白製成嘅細膩忌廉狀雲朵，口感唔同。
【INFO】
《壽喜燒‧中川》
地址：銅鑼灣開平道1號Cubus 3樓B號舖
營業時間：星期一至日 12:00 - 14:30，18:00 - 23:00
壽喜燒推介 | 4. 八不·壽喜燒
太子「八不·壽喜燒」竟然可以以最平$128就食到壽喜燒套餐，真係性價比極高！如果你想試下佐賀A5黑毛和牛，都只需要$368。佢哋嘅壽喜燒套餐有五款選擇，最平嘅係「美國極黑豚」（$128），然後係「鹿兒島茶美豚」（$148），再上級就係「澳洲M8+和牛西冷」（$238），而最高級嘅就係「佐賀A5黑毛和牛西冷」（$368），真係好抵食！呢度嘅壽喜燒係關西風格，會用牛油脂開鍋，再加上醬料將肉半煎熟，食完肉之後仲可以加鰹魚湯煮熟蔬菜。咁樣嘅做法好處係菜同肉分開食，令到肉香更加突出，
【INFO】
《八不·壽喜燒》
地址：太子大南街52號地舖
營業時間：星期一 12:00 - 23:00，星期二 全日休息，星期三至日 12:00 - 23:00
壽喜燒推介 | 5. 肉屋
尖沙咀「壽喜燒·肉屋」專注於原頭和牛，主打多款A5薩摩牛靚部位！午市套餐最低只需$199，就可以試到關東風嘅壽喜燒，套餐入面有赤身A5薩摩牛切片110g、前菜、漬物、野菜盛合、蘭王蛋同白飯，真係性價比超高！A5薩摩牛肉眼真係超級大塊，直接蓋滿鍋面，見到大理石紋嘅油花分佈已經好邪惡，入口即溶，配上蘭王蛋嘅蛋汁更加嫩滑，非常滿足！
【INFO】
《肉屋》
地址：尖沙咀海防道38-40中達大廈3樓
營業時間：星期一至五 12:00-15:15，18:00-22:00，星期六及日 : 12:00-22:00
壽喜燒推介 | 6. 壽喜燒樹
「壽喜燒樹」由日籍主廚主理，特別選用京都姬牛、松阪牛同熊本縣和王牛，等你可以食到唔同部位嘅牛肉。店內所用嘅食材全部都係來自日本，包括九州大分縣嘅蘭王雞蛋、北海道夢美人米，仲有只用日本出產嘅和牛同新鮮蔬菜，品質有保證！呢度嘅關西風壽喜燒由專業廚師主理，會先用砂糖將牛肉煎得焦香，再用特調醬汁煮至入味，確保每片牛肉同蔬菜都能夠煮到最佳狀態。
【INFO】 《壽喜燒樹》 地址：尖沙咀漆咸圍10-12號意酒店式公寓1樓 營業時間：星期一至二 12:00 - 15:00，18:00 - 22:00，星期三 全日休息 ，星期四至日 12:00 - 15:00 18:00 - 22:00
壽喜燒推介 | 7. 壽兵衛 – 壽喜燒專門店
「壽兵衛」嘅壽喜燒按照日本關西地區嘅傳統做法，由店員即場為你烹調，先用牛油起鍋，再將牛肉同野菜一齊煎煮，然後加上醬汁煮至半熟。如果你想試日本和牛，可以選擇「日本和牛壽喜燒」（午市$368），套餐入面有時令野菜、漬物、日本和牛、茶碗蒸等。如果你想食得更豐盛，可以選擇和牛壽喜燒套餐（晚市$680/$980），可以食到多達9品美食！另外，餐廳仲有美國牛肉壽喜燒（午市$268）可供選擇。如果你唔食牛肉，亦可以試下日本黑豚或者雞肉壽喜燒（午市$228；晚市$480），呢啲選擇喺坊間唔算常見，最平只需$228就可以享受到足足7品，真係超抵食！
【INFO】 《壽兵衛 - 壽喜燒專門店》 地址： 銅鑼灣銅鑼灣駱克道487-489號駱克駅12樓 營業時間：星期一至日 12:00 - 15:30，17:30 - 23:00
壽喜燒推介 | 8. 壽喜燒 伊勢熊
尖沙咀「壽喜燒 伊勢熊」，由資深日籍主廚久家弘一先生主理，專注於席前黑毛和牛壽喜燒。用上日本頂級食材，A4姬牛同近江和牛油脂分佈均勻，口感軟嫩而且唔油膩。如果你預算多啲，仲可以考慮雅套餐，入面會有額外兩塊和牛牛舌，牛舌芯部位爽滑軟腍，肉味香濃，絕對值得一試！
【INFO】 《壽喜燒 伊勢熊》 地址：尖沙咀棉登徑8號凱譽地下13號舖 營業時間：星期一至日 12:00 - 14:30，18:00 - 22:30
壽喜燒推介 | 9. 十侍 – 棉花糖A5和牛壽喜燒專門店
「十侍 Juji」嘅裝潢用上武侍圖案同日式燈籠，整體環境好有日本風情，無論食物定環境都超適合打卡。佢地以高質嘅鹿兒島A5和牛為招牌，肉片搭上蘭王蛋蛋漿，味道更加出色。而且，佢哋製作壽喜燒時會加入一大球棉花糖，用棉花糖取代砂糖，為A5和牛增添咗焦糖嘅甜味，真係好特別！
【INFO】 《十侍 - 棉花糖A5和牛壽喜燒專門店》 地址：旺角豉油街21C號Station 21 1樓 營業時間：星期一 全日休息，星期二至四 16:00 - 00:00，星期五至日 12:00 - 00:00
壽喜燒推介 | 10. 本延鍋物
「本延鍋物」主打日式涮涮鍋及壽喜燒，餐廳以白色同啡色為主調，配上暖黃色燈光同木質裝潢，舒適悠閒。湯底提供多款選擇，如關東風壽喜燒同日式昆布上湯。壽喜燒湯底甜香濃郁，各有特色。牛肉套餐仲包含前菜、蔬菜拼盤、蝦滑、飯、烏冬面，最後仲有雪糕作結。
【INFO】 《本延鍋物》 地址：銅鑼灣謝斐道379-389號特麗樓地下6-7號舖 營業時間：星期一至日 11:30 - 15:15，17:15 - 22:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
