啟德全新大型購物兼藝術空間AIRSIDE，將於9月28日正式開幕喇！AIRSIDE係位於啟德發展區嘅多用途商業及購物空間，佔地達190萬平方呎，鄰近交通配套方便。商場除咗引入多間矚目商店及多達40間餐廳，仲設有大型綠化休閒空間同藝術展覽，以後大家又多一個假日消遣嘅啟德好去處！想知AIRSIDE有咩特別？等小編話你知。
圖片來源：AIRSIDE、白紙生活概念館、B’IN Select、Pinkoi、Nana‘s Green Tea、魚がし日本一｜撰文：Icy
| （廣告時間） |
近年啟德附近興建咗多項文娛設施，而全新大型購物兼藝術空間AIRSIDE將會係9月28日開幕，連接啟德港鐵站及往新蒲崗區嘅行人天橋，並設有全港首個智能泊單車系統，提供48個單車泊位；另外亦有850個停車場車位，交通配套四通八達。
綜合大樓共有47層高，結合甲級寫字樓及購物商場，並連接地下購物街。當中商場佔地面積約70萬平方呎，設有寵物友善區域，並匯聚多個消閒娛樂、零售及餐飲商戶，適合一家大小娛樂消遣！
（圖片來源：AIRSIDE）
AIRSIDE開幕：賣點1 – 18,000平方呎綠化空間
AIRSIDE以「和而為一」嘅生活概念為主題，令每個客人都可以與自然環境聯繫，所以商場有三分之一面積被劃分為綠化空間，包括空中花園、露天劇場及都市農莊，合共接近18,000平方呎。當中都市農莊AIR FARM會根據時令而種植唔同嘅農作物，亦會定期舉辦種植工作坊，將部份收成分享俾商場內嘅餐飲店以及社福機構，為客人提供Farm-to-table嘅餐飲體驗。
而空中花園分為四部份，分別為The Wetland、The Mountain、The Lake及The Forest，栽種多種植物同花卉，並設有佈滿綠意嘅蔭涼區域，大家可以係恬靜嘅樹蔭下相聚交流，好寫意啊！
AIRSIDE開幕：賣點2 – 過萬平方呎藝文空間及「想飛」大型展覽
AIRSIDE另設過平萬方呎藝文空間，由AIRSIDE專業藝術團隊主理。為慶祝商場開張，將會舉辦重頭戲開幕活動「想飛」大型展覽，為遊客介紹啟德機場嘅歷史故事，包括機師嘅飛行日誌、舊機場照片、旅遊海報、飛行地圖、舊機票等等。展覽更首次於香港商場展出曾於1971年，由香港航空傳奇人物「錢氏兄弟」駕駛嘅單引擎小型飛機「小獵犬100型」！同場仲有沉浸式模擬飛行體驗活動，等大家一嚐做飛行員嘅滋味。
AIRSIDE開幕：矚目商店1 – 逾33,000平方呎全新MCL AIRSIDE戲院
作為商場中最大租戶嘅全新MCL AIRSIDE戲院，佔地超過33,000平方呎，共有7間影院，提供近900個座位。戲院更特設LUXE: A RealD Experience巨幕影院，內置RealD終極銀幕，無論2D或3D電影嘅影像都會加倍傳真，配合杜比全景聲音響系統，務求令客人得到升級版嘅享受！
AIRSIDE開幕：矚目商店2 – 多個手作品牌Pop up store
近年香港手作市集越來越盛行，而講求融合藝術生活嘅AIRSIDE亦不例外，引入手作品牌白紙生活概念館、B’IN Select以及Pinkoi選物Pop up store，集合多個本地插畫文創以及原創設計手作！
（圖片來源：白紙生活概念館、B’IN Select、Pinkoi）
AIRSIDE開幕：矚目商店3 – 日本過江龍抹茶品牌Nana‘s Green Tea香港首店
各位抹茶控注意喇，來自日本嘅人氣抹茶品牌Nana‘s Green Tea將會進駐AIRSIDE，開設香港首間分店！店內主打各款宇治抹茶甜點及飲品，由專業茶師現沏，呈現京都正宗茶農「山政小山園」嘅風味，賣相精緻又好味。另外亦提供焙茶及玄米茶料理，以及和風主食，例如丼飯、烏冬同沙律等，無論甜品定主食都咁出色。
（圖片來源：Nana‘s Green Tea）
AIRSIDE開幕：矚目商店4 – 日本立食壽司店「魚がし日本一」香港首店
日本立食壽司店「魚がし日本一」首次進軍香港，店舖佔地近700平方呎，可同時容納15位食客。店內除咗提供單點壽司，仲有廚師發辦料理，由東京築地市場產地直送時令食材，當中新鮮海產有北寄貝、牡丹蝦、日本生蠔、喜之次、秋刀魚等等。客人仲可以品嚐到小批量手工釀造嘅流動山水清酒，咁多位日本迷有口福喇！
（圖片來源：魚がし日本一）
AIRSIDE開幕：矚目商店5 – 全港首設於購物商場內嘅室內大型衝浪場
AIRSIDE另一大亮點，就係設有全港首個於購物商場內嘅室內大型衝浪場，佔地超過10,000呎，就算冬天都可以盡情衝浪，啱晒咁多位水上活動愛好者！而且衝浪場內設餐廳，玩到攰就可以即刻醫肚～
AIRSIDE開幕：其他美食餐廳
（圖片來源：AIRSIDE）
【INFO】 地址：香港九龍啟德協調道2號 前往方法：由啟德港鐵站出發，從車站廣場步行至AIRSIDE，需時2分鐘 官方網站：https://bit.ly/3RmT9SD
