北角係一個新舊共融嘅社區，匯聚多種新店及老字號美食 ，無論附近嘅打工仔、街坊定區外人，都會被北角嘅美食所吸引。今次小編就為大家推介7大北角美食小店，全部都係$100以下就食到嘅平價美食，部份更獲得米芝蓮認證！想知北角有咩好食，就睇埋落去啦！
圖片來源：Facebook @Twist & Buckle、@福元湯圓、@古月、@初麥手作烘焙、Openrice @szechan0817、@mamikelly、@jessiekiukiu、@eatgoodwest_foodie、@a_m、@foodlocity、@joannecwtse｜撰文：Icy
北角美食推介1：Twist & Buckle西班牙油條
鐘意食Churros嘅朋友要注意！Twist & Buckle係香港第一間西班牙油條專門店，由兩位南美後生仔主理，每日人手製作新鮮西班牙油條，好食程度更獲得米芝蓮香港街頭小食推介！
Twist & Buckle出品嘅西班牙油條由人手扭成一個個圈圈，加入牛奶焦糖或奶黃餡料，再用來自澳洲嘅芥花籽油炸香，口感鬆化。糖衣選擇除咗有傳統肉桂砂糖口味，仲有朱古力、焦糖牛奶、海鹽、開心果脆脆、抹茶等等，任你自由搭配。
【INFO】
地址：北角電氣道180號百家利中心地舖
時間：星期一至日 12:00-22:30
價錢：$30、升級糖衣加$40
官方網站：Twist & Buckle
北角美食推介2：福元湯圓
福元湯圓係已開業30多年嘅老字號糖水舖，主打人手製作嘅馳名爆漿流心湯圓，大大粒而且皮薄餡靚，多年來受盡街坊及區外人歡迎，難怪係2021年打入米芝蓮嘅推薦名單啦！
湯圓口味分別為黑芝麻同花生，由自家廠房生磨餡料，再加入豬油炒香。飽滿嘅餡料帶有流心效果，而煙韌嘅外皮沾上香脆糖不甩，味道更為香口。大家仲可以單買生湯圓返屋企煮，慢慢回味！
【INFO】
地址：北角炮台山福元街7號利都樓地下I-1號舖
時間：星期一至日 16:00-00:00
價錢：黑芝麻/花生湯圓（配薑汁）$28
官方網站：福元湯圓
北角美食推介3：麥記美食
如果想食上海傳統小食，就可以試試麥記美食，好多北角街坊都推薦。小店開業40多年，主打多款上海點心，例如鍋貼、蒸餃子、小籠包、生煎包、酸辣湯等等，價錢平靚正而且食物質素高，所以店外經常大排長龍，更連續8年上榜米芝蓮！
麥記美食多年來堅持以人手揉麵糰，麵粉經天然發酵後更為鬆軟，再採用生煎嘅方式炮製包點，食落香口而不膩，充滿麵粉香。而鍋貼性價比亦好高，$12有3隻，皮厚餡靚，包住滿滿嘅肉餡，再煎至金黃香脆，咬落好juicy！
【INFO】
地址：北角堡壘街21-23號美嘉洋樓地舖
時間：星期二至六 11:00-22:00/星期日 11:00-20:00
價錢：生煎鍋貼/生煎包 $12/3隻、酸辣湯 $20
官方網站：麥記美食
北角美食推介4：全日雞實驗所
全日雞實驗所主打海南雞飯，由夫妻檔店主親力親為，鑽研海南雞嘅烹煮方法同最合適嘅溫度。海南雞講求嫩滑口感，而全日雞實驗出品嘅海南雞經過自家研發嘅機器浸泡，使用無味精雞湯，充滿油香。雞皮入味之餘，雞肉亦好鮮嫩juicy。
食雞時配上鮮製嘅辣椒汁、薑蓉以及焦糖甜豉油，份外惹味！油飯亦好出色，金黃色嘅米飯粒粒分明，淨係賣相已經令人流曬口水，難怪會被海南雞飯關注組Facebook專頁投選為香港最好食嘅海南雞！
【INFO】
地址：北角和富道21-53號和富薈地庫B50號美食廣場C1及C2號舖
時間：星期一至日 12:00-20:45
價錢：全日溫泉海南雞飯餐 $58起
官方網站：全日雞實驗所
北角美食推介5：古月
古月主打新加坡美食，由兩位80後老闆主理，佢哋曾經係吉隆坡學廚取經，鑽研菜式，將正宗地道嘅風味帶到香港，再加入本港特色烹調，所以古月連續幾年獲得米芝蓮認證嘅殊榮！
除咗經典星馬菜式，例如肉骨茶、椰香雞、娘惹咖哩、椰漿飯、蝦麵、辣椒板麵之外，小編最推介就係古滑雞飯，取名十分盞鬼，其實係無骨雞脾肉配上油飯同酸甜醬汁，食落好開胃。雞肉底下仲會隨機佐以唔同嘅配菜，例如豬耳、雞腎等等，令整個餐點更豐富！
【INFO】
地址：北角錦屏街後街29號地下A號舖
時間：星期一至六 12:00-21:30
價錢：古滑雞飯 $60
官方網站：古月
北角美食推介6：初麥手作烘焙
初麥手作烘焙係比較新開嘅手工麵包烘焙小店，除咗供應一般港式麵包外，仲會大搞新意思，推出特色新品。例如每日新鮮出爐嘅芋泥布丁包，表面印住大大隻「芋」字，充滿濃郁嘅芋頭香。布丁內有滿滿嘅芋泥餡料，帶有流心效果，食落綿滑而不膩。布丁包每日都會特定嘅出爐時間，吸引好多客人大排長龍！
除咗布丁包之外，其他糕點都一樣出色。例如牛油布丁葡撻，以鬆化嘅曲奇餅作外皮，包住滑溜嘅香甜布丁。小店另外仲會供應貝果、麻糬燒、開心果冰心包、千層吐司，想知小店近期有咩新推出嘅包點，就要多多留意佢哋嘅官方專頁喇！
【INFO】 地址：北角英皇道483-497號東寶大廈地舖 時間：星期一至日 08:00-20:00 價錢：芋泥布丁包 $19 官方網站：初麥手作烘焙
北角美食推介7：利強記北角雞蛋仔
最後一間要介紹嘅北角美食小店，同樣曾於米芝蓮上榜。利強記北角雞蛋仔於1991年係北角起家，一直以原味雞蛋仔而聞名，仲會供應魚蛋、格仔餅等經典街頭小食，深受街坊歡迎，仲吸引好多明星光顧㗎！
拌入麵粉、牛奶以及糖嘅雞蛋液，調製得非常香濃，外皮烘烤得金黃酥脆，熱辣辣香噴噴，裏面就係軟綿綿嘅雞蛋糕。半邊空心半邊餡料嘅雞蛋仔，食落外脆內軟，蛋味濃郁，味道充滿港式情懷啊！
【INFO】
地址：北角英皇道492號地舖
時間：星期一至日 07:00-23:00
價錢：雞蛋仔/格仔餅 $22
