元朗美食 | 元朗簡直就係美食集結嘅地方，除咗有眾多隱世餐廳之外，都有唔同傳統嘅美食以及糖水鋪等，仲有唔少人都特登入嚟食好西！小編幫大家集結咗13大元朗美食，即刻睇睇有咩好介紹啦！
圖片來源：Openrice@馬馬3304、foodiesorriso、Little Lamb16、mpiimp、biu1115、fatmousefoodie、2girls.hkk、yellowfoodfever、frank300、yoyo454、nam nam1111、_l.hei、thomasKwan、shampoolee、liwing.0018、sun522、eatingchingching、missyu88、Fanny_l、fibee3b、Beansphere、nikiman2514、kk_genki、T.LAU914、Facebook@十大碗麵家、食在元朗 | 撰文：Hedy
元朗美食推介 | 1. 兩姊妹涼皮
兩姊妹涼皮有限公司今年繼續獲得米芝蓮必比登推介，除咗有元朗店之外，就連喺旺角、荔枝角以及中環都有分店。餐廳主打唔同嘅川菜，當中最出名嘅絕對係招牌兩姐妹涼皮，喺天氣熱嘅時候食絕對係透心涼！再配搭青瓜、多款醬料以及花生碎等，大家更可以選擇辣度，口感相當豐富，難怪會連續2年獲米芝蓮必比登推介！
【INFO】
《兩姊妹涼皮》
營業時間：星期一至日 12:00至20:30
地址：元朗教育路68號兆豐樓地下21號舖
元朗美食推介 | 2. 合興車仔麵
入元朗絕對要試試合興車仔麵，呢度嘅選擇多多，包括豬腸、豬耳、牛肚以及牛柏葉等等，仲設有麻辣區例如麻辣雲耳以及麻辣鳳爪等等，啱晒每位鍾意食辣嘅朋友，再配合埋辣汁以及腩汁湯底，簡直係食得超過癮，再加上份量多一定可以食飽肚～
【INFO】 《合興車仔麵》 營業時間：星期一、三至日：10:30至19:00（星期二休息） 地址：元朗元朗安寧路59號裕豐大廈地下A1號舖
元朗美食推介 | 3. 肥姐蠔餅婆
一睇個名就知肥姐蠔餅婆係食蠔餅㗎啦～一件蠔餅$40，大大塊即叫即煎，所以多人嘅時候絕對要排隊等等。不過等待係值得嘅，蠔餅入面嘅蠔新鮮之餘又夠大粒，再加埋芫茜同辣椒汁，夠晒香脆又惹味！
【INFO】 《肥姐蠔餅婆》 營業時間：星期一、三、五至日 14:00至01:30（星期四休息） 地址：元朗教育路68號兆豐樓地舖
元朗美食推介 | 4. 十大碗麵家
十大碗麵家喺太子設有分店，最近亦都喺元朗開設新店。舖頭承傳爺爺當年嘅雲吞麵，至今已經喺第3代，都希望可以一直傳承落去。招牌雲吞麵即日包製，入面嘅蝦蜭爽口彈牙！小食方面大家絕對唔可以錯過即叫即炸嘅蜆蚧鯪魚球，食到新鮮鯪魚肉、檸檬葉、葱花及蝦米等等，外表炸得金黃。食完炸嘢更有酸蘿蔔畀大家解解油膩！
【INFO】
《十大碗》
營業時間：星期一至日12:00至20:00
地址：元朗教育路2-6號捷榮樓地舖
元朗美食推介 | 5. 蘇記流心燉蛋專門店
想食燉蛋嘅朋友就絕對要嚟朝聖，舖頭只賣原味牛奶燉蛋白，大家都可以揀凍食或者熱食。當時老闆創業2年半就已經獲得2次嘅米芝蓮街頭小食推介，呢款流心燉蛋食落有濃郁嘅牛奶味，只靠3.7牛乳以及蛋白製成，冇額外添加其他嘅糖分，香滑得嚟又健康！
【INFO】 《蘇記流心燉蛋專門店》 營業時間：星期一至日 14:00至21:00 地址：元朗鳳攸東街9號好順意大廈A座地下15號舖
元朗美食推介 | 6. 元朗花甲粉
元朗名物「元朗花甲粉」，無論係堂食定外賣都相當多人排隊！入去之後就可以自選花甲粉或者百搭粉，再加唔同嘅配料。花甲粉大碗之餘又足料，湯底更係以大量蜆熬製而成，再加上自選嘅辣度同麻度，夠晒濃郁惹味！
【INFO】 《元朗花甲粉》 營業時間：星期一至日 12:00至00:00 地址：元朗泰利街11號大興大廈地下6-7號舖
元朗美食推介 | 7. 朗屏壽司阿姨
夜晚想宵夜嘅時候，就可以去試試朗屏壽司阿姨嘅炸壽司，絕對係元朗學生讀書時期嘅回憶！炸壽司入面包住飯、肉鬆以及蟹柳，食之前再加埋辣粉，令人搵返細個食開嘅味道！
【INFO】 《朗屏壽司阿姨》 營業時間：17:00至01:00 地址：元朗文業樓地下
元朗美食推介 | 8. 嚐湯雞
嚐湯雞堅持每日新鮮製作，更強調絕無味精！大家除咗可以食招牌砂鍋雞之外，亦可以選擇醉雞。如果天氣凍，小編就絕對推介大家嚟食，上枱熱辣辣之餘，再飲一啖濃郁嘅雞湯，簡直係暖入心。肉質又夠嫩滑，真係令人好滿足！
【INFO】 《嚐湯雞》 營業時間：星期一至日 11:45至21:30 地址：元朗鳳攸南街3號好順景大廈地下5號舖
元朗美食推介 | 9. 滔滔甜品
試完唔同嘅元朗美食後，絕對要去食糖水啦。滔滔甜品提供多款中式糖水，選擇繁多，包括椰香西米紫米露、薑茶湯丸以及鮮製椰子糊等，價錢夠親民，絕對係飯後甜品嘅好地方！
【INFO】 《滔滔甜品》 營業時間：星期一、三至日 16:30至00:00 地址：元朗康樂路8號康樂廣場地下9號舖
元朗美食推介 | 10. 驊記糕點屋
元朗呢間爆餡糯米糍相當受歡迎，想要食到皮薄又多餡嘅糯米糍，就要努力啲排隊等候喇！一盒共有6粒糯米糍，每粒都只係$6。一咬落去嘅時候，入面嘅花生都多到跌晒出嚟，同時花生同糖嘅比例啱啱好，唔會太過甜！
【INFO】
《驊記糕點屋》
營業時間：星期二至六 10:30-17:00（星期一及日休息）
地址：元朗元朗安寧路20-24號利群樓地舖
元朗美食推介 | 11. 龍眼樹小食店
唔知大家又鍾唔鍾意食老婆餅呢？龍眼樹就有手工製老婆餅，每日更係新鮮出爐，酥皮夠晒鬆脆，同時亦食到冬瓜茸饀料！肚餓嘅時候亦都可以係度買啲小食例如腸粉以及燒賣等醫肚～
【INFO】 《龍眼樹小食店》 營業時間：星期二至日 09:00至20:00 (星期一休息） 地址：元朗鳳攸東街17號地舖
元朗美食推介 | 12. ACCRO CAFE
同朋友食完飯想搵間Cafe飲杯咖啡傾下計，小編就推介Accro Coffee畀大家，一間獲獎無數嘅咖啡店。當中嘅咖啡師亦曾奪得世界虹吸咖啡大賽獲得冠軍，大家都可以去嘆番杯咖啡放鬆下！
【INFO】 《ACCRO CAFE》 營業時間：星期一至日 11:00至18:00 地址：元朗元朗安寧路162號金城樓地下D號舖
元朗美食推介 | 13. 賀苗記
熱辣辣既叫即整又多汁嘅生煎包可以喺賀苗記食到，$20就食到3個！外皮脆之餘，一咬開啲汁亦都會跟住流出嚟，絕對值得一試！
【INFO】
《賀苗記》
營業時間：星期一至五、日 11:00至20:00（星期六休息）
地址：元朗大陂頭徑14-24號福星樓地下2B號舖
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
