九龍城糖水 | 講到飯後甜品，九龍城係香港其中之一個好去處，隱藏住一大堆值得專程去到訪嘅甜品店，從老字號到新派創意，選擇多到令人眼花繚亂。無論你係鐘情於傳統中式糖水，定係西式甜品，喺呢區都一定搵到啱你嘅一碗甜品。如果你鍾意懷舊味道，潮州合成甜品同地茂館甜品就係必試之選。如果你想試啲新派啲嘅甜品，就唔可以錯過開心果雪燕西米露，開心果控必愛！以下就為你精選咗八間唔同風格嘅糖水店，等你一次過食盡九龍城嘅各款特色糖水！

圖片來源：Openrice @nabi.foodies、@CCMeg、@apf5pqcsw8f6、@AyumiPeggyHo、@j_hoo、@yantung117、@CarinaB | 撰文：Ginger

九龍城糖水2025 | 1. 地茂館甜品

地茂館主打自家製中式糖水，呢度嘅糖水款式多，如芝麻糊幼滑得嚟超香濃，入口綿密，滿滿芝麻香氣；合桃露同樣出色，堅果香氣濃郁，飲完都唔會覺得膩。鍾意養生嘅朋友一定會鍾情佢哋嘅原盅燉製糖水，例如杏仁蓮子百合，或者花旗蔘燉雪梨，款款都好啱轉季滋潤。如果想試啲特別啲嘅，仲有美人桃膠杏仁茶、腐竹蛋糖水同桑寄生蛋茶，全部都係少見又有特色嘅滋補糖水。

合桃露香醇又充滿堅果香氣。（圖片來源：Openrice @nabi.foodies)
九龍城老字號，傳統中式糖水。（圖片來源：Openrice @nabi.foodies)
 【INFO】
《地茂館甜品》
地址: 九龍城福佬村道47號地舖
營業時間: 星期一至日 12:00 - 00:00

九龍城糖水2025 | 2. 陳茶館芋圓甜品專門店

陳茶館係一間以芋圓為主題嘅甜品專門店，呢度嘅甜品配料全部自家製，除咗芋圓，仲有三款以高質桃膠為主角嘅養生甜品，桃膠經人手精挑後配埋木瓜、雪耳、鮮奶或者招牌芋圓，滋潤又健康，啱晒養生一族。最近開心果甜品喺香港大熱，陳茶館亦緊貼潮流，推出咗兩款開心果甜品。其中嘅開心果雪燕西米露，西米露上面鋪滿濃香開心果醬，仲撒上開心果碎，食落層次豐富。

必點開心果雪燕芋圓西米露。（圖片來源：Openrice @CCMeg）
一間足料芋圓專賣店。（圖片來源：Openrice @apf5pqcsw8f6)
 【INFO】
《陳茶館芋圓甜品專門店》
地址: 土瓜灣馬頭圍道101號地舖
營業時間: 星期一至日 13:30 - 23:00

九龍城糖水2025 | 3. ⁠椰籽

九龍城嘅椰青特飲專門店「椰籽」，主打用泰國直送嘅原個椰青製作飲品。佢哋嘅招牌椰青特飲，將椰青水、果肉同椰乳混合，再加冰粒打碎，飲落口感介乎冰沙同奶昔之間，冰涼滑溜。除咗飲品，「椰籽」仲有超過20款甜品選擇，如芒果椰青凍，配料豐富，有香甜芒果粒、少見嘅斑斕凍、椰果同芒果爆珠，每一啖都充滿層次感。

必試芒果椰青凍。（圖片來源：Openrice @AyumiPeggyHo)
開心果控必愛真材實料開心果椰椰雲頂，（圖片來源：Openrice @j_hoo）
 【INFO】
《椰籽》
地址: 九龍城衙前圍道21號地下A3號舖
營業時間: 星期一至日 12:30 - 23:00

九龍城糖水2025 | 4. ⁠金滿堂甜品

金滿堂甜品係一間新派甜品店，賣點係「甜得健康」，連水都講究，用咗日本還原水機嘅還原水，再用香葉熬製冰糖取代砂糖，減低甜度之餘，仲帶有天然甘香，食落清甜又滋潤。推薦幾款必試甜品，首先係寶島，有芋圓、西米、小丸子、咖啡啫喱、芋泥同鮮草，配上黑糖水底，啱晒鍾意試多款配料嘅朋友。如果鐘意熱甜品，可以試雪中送炭，有芝麻湯圓、燉蛋白同清心丸，椰汁底更添香甜濃郁。燉蛋白特別香滑，配埋椰汁真係一流，暖笠笠又滿足。

桃園燕有雪燕、桃膠、芋圓同清心丸配上椰汁底，最底仲有椰皇燉蛋白，嫩滑甜美，口感豐富。 （圖片來源：Openrice @Foodie.therapyyy)
另一熱門選擇 – 台北車站。（圖片來源：Openrice @ernestsiu）
 【INFO】
《金滿堂甜品》
地址: 九龍城城南道9號地舖
營業時間: 星期一至日 15:00 - 02:00

九龍城糖水2025 | 5. ⁠潮州合成甜品

潮州合成甜品創立於1955年，係九龍城街坊心目中嘅糖水老字號。佢哋主打傳統潮州糖水，超過90款甜品任你揀，無論係經典款定自選配料，都可以滿足唔同糖水控嘅喜好。如招牌甜品蓮子清心丸綠豆爽、椰汁黑糯米或馬蹄沙，全部都係老顧客嘅最愛。

除咗經典糖水，仲可以自由搭配配料。（圖片來源：Openrice @yantung117）
簡單而用心嘅味道吸引唔少街坊同遊客。（圖片來源：Openrice @yantung117）
 【INFO】
《潮州合成甜品》
地址: 九龍城龍崗道9號地舖
營業時間: 星期一 全日休息， 星期二至日 15:00 - 00:00

九龍城糖水2025 | 6. ⁠嚐樂

嚐樂糖水店主打多款滋味甜品，有27款以上糖水選擇。當中最適合冬天暖身嘅，絕對係招牌薑湯番薯糖水。相比一般薑湯，呢度嘅三色薑湯可謂暗藏玄機，將辣、辛、香三種薑味完美融合，飲落層次分明，暖胃之餘仲有陣陣香氣，令人愈飲愈順口，絕對係冬日好選擇！

芒果達人。（圖片來源：Openrice @Eric19790708）
多款甜品選擇！（圖片來源：Openrice @Monkey Sum）
 【INFO】
《嚐樂》
地址: 九龍城打鼓嶺道86號地下A-B號舖  
營業時間: 星期一至四 16:00 - 00:00，星期五至六 16:00 - 00:30，星期日 16:00 - 00:00

九龍城糖水2025 | 7. ⁠皇室甜品

皇室甜品地方寬敞，除咗傳統糖水同燉品，仲有好多自家製甜品，選擇多到令人眼花繚亂。例如有綠茶涼粉、腰果糊等經典款，清新又有口感。其中招牌甜品宇治金時就係必試之作，紅豆煮得特別香滑，配埋日式小丸子同抹茶冰，清甜又唔膩，仲可以兩個人一齊分享，邊食邊傾計，啱晒情侶或者朋友聚會。

性價比高糖水店。（圖片來源：Openrice @Apple725）
配料選擇多，非常有層次感。（圖片來源：Openrice @foodaroundijais）
 【INFO】
《皇室甜品》
地址: 九龍城城南道15號地舖
營業時間: 星期一至日 14:00 - 02:00

九龍城糖水2025 | 8. ⁠德朗甜品

位於九龍城嘅德朗甜品係一間以糖水為主嘅地道甜品店，店舖最出名嘅係蛋白杏仁茶同腐竹雞蛋白果薏米，腐竹糖水嘅料夠足，每一啖都食到滑溜嘅腐竹、煙韌嘅白果同香甜嘅薏米，味道層次豐富，係港式糖水經典代表。

芋茸西米焗布甸。（圖片來源：Openrice @CarinaB）
招牌綜合芋圓。（圖片來源：Openrice @CarinaB） 
 【INFO】
《德朗甜品》
地址: 九龍城沐翠街晴朗商場地下B005號舖
營業時間: 星期一至日 15:00 - 00:00

——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk