中環打卡Cafe ｜想去靚靚Cafe打卡？唔一定要去深水埗嘅～中環有唔少打卡咖啡小店，今次就為大家搵嚟4間最值得去嘅 中環打卡Cafe ，每間嘅環境同食物都各有特色，有日系木色簡約風、工業風、少女花園風，仲可以喺露天用餐區嘆返一日。食物方面有賣相超靚嘅日式梳乎厘Pancake、手工bagel、精品咖啡同澳洲風美食。保證有一間會啱你心水，想知有咩特別就要睇埋落去啦！
圖片來源：官方圖片、IG@vivianeat.hk、@2girls.hk、@chiyan716、@goodeatmeal、@missclarajenni、@dinosaurs_foodie、@eatardwithus、@pandayukizz、@my.foodsthetic、@foooodrabbit、@eatalltime.hk、@thechubbypalate、@soyogaphy、@yellow_wyc｜撰文：Athena
中環打卡Cafe 1. PHI Coffee & Pancake
PHI Coffee & Pancake主打空氣感十足嘅日式梳乎厘pancake，同時亦提供多款輕食。店內嘅日式梳乎厘pancake有多款口味可供食客選擇，例如有經典原味、經典英式伯爵茶味、士多啤梨味、Lotus海鹽焦糖味、宇治抹茶紅豆味等。梳乎厘pancake選用日本直送雞蛋以及韓國低筋麵粉，蛋香味濃郁，而且口感鬆軟柔滑，入口即化，空氣感十足！
餐廳提供多款輕食，包括意粉、吐司、熱香餅、牛角包、咖啡等，款款都好吸引！除咗鹹食，仲有日式梳乎厘以外嘅甜點，包括Tiramisu、法式多士、乳酪等。
餐廳裝修雅致，主要用上大地色調及木傢俱，並以橘色調及乾花作隔格，營造花園嘅清新氛圍。餐廳中央仲有一棵仿製大樹，帶出木系日本風，非常適合打卡！順帶一提，餐廳為寵物友善，大家可以趁假日帶埋主子一齊嚟chill返吓！
【INFO】 PHI Coffee & Pancake 地址：中環士丹利街19號卡佛大廈2樓1號舖 營業時間：星期一至日 08:00 - 21:00
中環打卡咖啡店 2. Between
呢間位於大館嘅日系打卡Cafe，主打手工即沖咖啡、招牌水果三文治、有漸層效果嘅芝麻椰子奶，同埋各款輕食。餐廳分別設有室內同室外露台嘅用餐區域，室內環境有過千呎，環境舒適開揚。想打卡嘅話必定要選擇餐廳嘅露台位置，藤椅配上大館嘅景色，打卡一流！
餐廳室內環境寬敞，裝修以純白色及木系作為主要風格。室內設有落地大玻璃窗，上面貼咗唔同顏色，日光引入餐廳時更夢幻。
餐廳亦設有室外用餐區域，客人可以一邊欣賞大館及附近街道嘅景色，一邊享受休閑嘅下午。室外有白色及木色嘅藤椅及木櫈，好適合打卡！
【INFO】 Between 地址：中環荷李活道10號大館賽馬會藝方2樓 營業時間： 星期二至日 11:00 - 20:00
中環澳洲風打卡Cafe 3. Cosha
Cosha由前空姐打理，對比上面兩間主打輕食嘅餐廳更有份量，主打澳洲風嘅Brunch及輕食。食物方面有賣相一流嘅Crispy Gee、牛角包窩夫、奶昔，同埋份量十足嘅牛扒配薯條。無論係小鳥胃定係食量大嘅朋友都可以滿足到！餐廳由食物擺盤，至到店內店外嘅裝潢都十分用心。食物擺盤色彩繽紛，店舖裝潢以簡約奶油風為主，俾人一種好舒服嘅感覺。
UFO ($135) 作為餐廳嘅招牌菜，睇落有好多材料好豐富。最頂層有半個牛油果釀咗粒半熟蛋黃喺入面，下面有煙肉同酸種麵包，最後係火箭菜沙律、芝士、蕃茄同醃製蕃茄墊底。有咁多層嘅材料，口感十足！
Crispy Gee ($128) 面頭有炸雞及水波蛋，下層有切片牛油果及酸種麵包。水波蛋一切落去流出蛋黃，同大大份嘅炸雞一齊品嘗，好美味！炸雞外脆內嫩滑多汁，配埋下面半個切片牛油果同酸種麵包，超滿足！
Croissant French ($98) 啱晒甜食控，牛角包窩夫口感酥脆，比一般牛角包更煙韌！配埋酸酸甜甜嘅水果及藍莓醬，好開胃啊～
Aussie Premium Angus Rib Eye ($288)；Aussie M6 Wagyu Striploin/Rib Eye ($388) 嚟到最有份量嘅主菜，分別有澳洲安格斯肉眼扒同埋澳洲M6和牛。澳洲安格斯肉眼扒油花比例平均，肉質軟嫩，牛脂味突出，亦充滿肉汁。澳洲M6和牛可以選擇西冷或肉眼，西冷肉質比較有嚼勁，牛肉味香濃。牛扒可以自選生熟度，上碟嘅時候啱啱好，唔會過熟或過生，而且亦擺得好靚，最啱打卡！薯條係無限任添，灑上自家製調味粉，隔離仲配埋自家製嘅蜜糖芥末醬，好香脆惹味！伴碟嘅蔬菜仲有烤焗過嘅蒜頭、南瓜及車厘茄。
餐廳裝潢以奶油色為主，店內設計簡約柔和，有唔少白色拱門，增添歐陸色彩。店內擺放不少綠色植物作點綴，而且環境闊落，十分舒適休閑。暖色調配上簡約設計，令餐廳成為網紅打卡cafe。
【INFO】 Cosha 地址：中環伊利近街61號地舖 營業時間： 星期一至三及日 11:00 - 18:00 星期四至六 11:00 - 18:00；18:30-22:00（僅提供牛扒及薯條）
中環工業風Cafe 4. MONO Lab
呢間打卡Cafe同上面幾間比較少女嘅cafe唔同，佢哋位於一幢唐樓，位置較為隱蔽，走日系型格工業風。店舖主打手工貝果、蛋糕及咖啡，咖啡更可以選擇來自唔同產地嘅咖啡豆，喜歡咖啡嘅你就可以有更多選擇啦！MONO Lab不時會推出期間限定口味嘅bagel同蛋糕，Tiramisu bagel更係佢哋嘅招牌之作。Bagel口感偏紮實有嚼勁，切開仲有流心效果，賣相相當澎湃！唔少bagel控都特登去品嘗㗎～
吧枱為水泥牆風格，再配上木造檯櫈，更顯風格。店舖更設有户外座位，方便於城市中找到一點喘息空間，而且夜晚仲會搖身一變成為shisha bar，可以同朋友一齊chill返吓！
【INFO】
MONO Lab
地址：中環荷里活道31-33號7樓
營業時間：星期一至日 10:00 - 02:00
————————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
