相信好多香港女仔都會有噴香水嘅習慣，除咗甜美花香同果香之外，亦可以試試越來越受到歡迎嘅木質調香水。以下推薦嘅5款人氣木質調香水，畀人一種温暖、乾爽、神秘有活力嘅感覺，不論男女都好適合用，而且仲唔容易同人撞香！想知道有咩木質調香水值得收藏就記得繼續碌落內文睇更多啦！

圖片來源：官方圖片 ｜撰文：Hedy

香水推薦 1.Diptyque 希臘無花果淡香水 100ML

Diptyque呢一款經典希臘無花果淡香水，採用新鮮嘅無花果葉、果實到無花果樹。一開始先感受到無花果嘅清甜，然後再有椰子同綠葉香氣嘅加入，味道唔會太奶或太濃。從頭到尾都係非常清雅無重量，鍾意木質調又鍾意椰奶味嘅朋友仔會好適合！

香水推薦2.Aesop 艾底希思香水 50ML

艾底希思係一款極為迷人、打破常規嘅特色香水，特別適合偏愛木質、辛香和琥珀香型嘅人。前調用咗黑胡椒嘅辛香作為開場，營造清新又充滿活力嘅氛圍；中調就以「乳香」為中心，散發出乳香味；最後，以豐富嘅檀香、雪松同岩蘭草嘅氣味作結尾，令人一聞就愛上～

香水推薦3.Nonfiction Gentle Night 100ML

Gentle Night係最熱賣嘅一款香調，亦都係韓國最多人買嘅一款中性木香調！沉穩嘅雪松木質調，添加咗微甜嘅無花果味，最後以溫暖嘅麝香收尾，絕對係男女都會鍾意嘅一款香水！

香水推薦 4.TAMBURINS CHAMO 50ML

Chamo係一款花香型木質麝香調嘅中性香水。呢款香水融合咗洋甘菊同苦鼠尾草，散發出淡雅草本香，同時又有木頭同麝香嘅氣息！一開始噴出嚟嘅花香味偏重，但慢慢就會開始聞到木質感，高级感十足！仲要係Jennie同款香，當然要入手一支啦～

香水推薦5.Penhaligon’s The Coveted Duchess Rose 75ML

獸頭系列一直都係潘海利根最暢銷嘅系列，而其中「The Coveted Duchess Rose 狐狸」可以話係最熱賣嘅一款。呢款木質調冇咁強烈，帶有舒適嘅玫瑰香。如果係初嘗試但又怕木質感香氛太濃厚嘅朋友仔不妨試試呢一款嘅香水！