好多人話頭髮就係女人第二塊面，柔順又烏黑嘅頭髮睇落去好有氣質，即刻加曬分。不過香港生活節奏快壓力又大，其實對髮質有好大影響，為咗令頭髮保持光澤，唔少女仔都會喺出面做頭髮護理，不過效果只可以維持到一段時間，花費又大！今年54歲嘅台灣女星伊能靜就分享佢私藏嘅 頭髮保養5大秘訣 ，令頭髮有光澤感之餘，仲可以防止白頭髮同脫髮嘅問題出現，簡單得嚟喺屋企都可以做到，只要堅持落去就可以擁有一把美麗嘅秀髮！
圖片來源：網絡圖片、Facebook@annieyi201234｜撰文：Claudia
頭髮保養秘訣1 – 用梳按摩頭皮
女仔們除咗皮膚嘅保養，唔好唔記得頭皮都係皮膚嘅一部分！伊能靜就分享佢每日朝早起身洗頭嘅時候，都會用按摩梳按摩頭皮，經常按摩頭皮可以幫助毛囊發育得更健康、促進頭皮血液循環同代謝，令生出嚟嘅頭髮更強韌更有光澤，最好選擇氣墊梳！
頭髮保養秘訣2 – 尖尾梳梳順髮尾
長頭髮嘅女仔就要留意啦！留長頭髮最麻煩就係髮尾容易打結，如果髮質稍微毛躁，髮尾簡直係重災區咁！長髮及腰嘅伊能靜就表示，頭髮打結千奇唔好格硬用手拉扯，因為會造成髮絲斷裂，佢自己會準備一把尖尾梳，針對髮尾地方梳理，可以令頭髮變得柔順唔毛躁，唔洗擔心產生拉扯導致髮絲斷裂。
頭髮保養秘訣3 – 護髮油保持髮絲光澤度
除咗皮膚要用護膚品，頭髮都要用護髮油㗎！伊能靜分享自己平時會喺洗完頭，頭髮微濕嘅狀態用護髮油，首先取適量髮油喺掌心，搓熱後由髮尾開始搽，之後再由上到髮中，最後先吹乾頭髮。佢通常會用兩次護髮油，第一次係濕髮用，可以增加滋潤度，吹頭時冇咁容易打結，等頭髮吹乾後，再用第二次，由上至下，令頭髮更柔順增加光澤感。
頭髮保養秘訣4 – 身心放鬆好重要
雖然伊能靜話自己都會有白頭髮，但佢認為年紀唔係主因，反而係壓力同生活習影響先最大，造成白髮提早生成嘅出現，所以要養成放鬆身心嘅習慣！平時佢就會浸浴、做運動減壓，盡量用平常心看待事情，控制情緒起伏！心情影響髮質都唔係空口無憑㗎，聽過唔少故事都話，當受到重大壓力或者打擊會一夜白髮，而的確有科學根據顯示壓力會刺激交感神經系統活動，導致白髮生長，可見情緒嘅影都好大㗎！
頭髮保養秘訣5 – 每日一杯黑芝麻黑豆粉
除咗外在嘅保養外，內在嘅飲食調理都重要㗎！伊能靜透露自己每日一杯黑芝麻黑豆粉，用黃耆、黨蔘、枸杞、紅棗煮成水，每日飲500 ml！佢話自己會選擇食對頭髮有益處嘅食物，例如菠菜、豬肝可以補鐵，女仔嘅特別時期前後都要飲紅糖煮雞蛋之類嘅糖水，內外調養補血氣，頭髮就可以生長得更加健康！
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
