天氣又凍又乾燥，無論係男士定女士都要好好護膚，咁先可以有靚靚肌膚。而面膜就係急救缺水肌膚嘅好幫手，不過日日敷面膜究竟係唔係真係Work？原來敷面膜都有技巧㗎，一齊入內文睇下有咩要注意啦！
圖片來源：網絡圖片、IG@geewonii、IG@sulwhasoo.hongkong、IG@ahc.official｜撰文：Sharon
一．面膜日日敷？
好多人覺得日日敷面膜就唔怕皮膚乾燥，但無論保濕面膜定美白面膜，都唔應該日日敷㗎！面膜內含豐富嘅精華成分，每日敷面膜會令皮膚變得十分水潤，太過補水保濕反而會造成肌膚嘅負擔，使肌膚自我調整機制失衡。當面對乾燥嘅天氣時，難以分泌油脂，令健康嘅膚質變成敏感肌。
所以最好嘅方法要按照自己嘅皮膚膚質去決定敷面膜嘅次數，一般情況下，建議一周内敷1至3次面膜即可，如果敏感肌嘅朋友建議一星期敷一次就可以啦！
二．化妝前應該要敷面膜？
習慣化妝前敷面膜相信大家一定有，因為可以達到快速補水嘅效果，令底妝更加服貼！但原來呢個做法係錯㗎，面上會殘留好多精華液，未完全吸收嘅時候就上妝會更易脫妝。
加上，喺啱啱敷完面膜嘅狀態下化妝，化妝品嘅刺激成分會進入皮膚，對肌膚造成嘅傷害好大！如果想化妝前補補水，大家可以試下用化妝水濕敷呢個方法暫時急救下~
三．敷面膜要敷幾耐先最好？
面膜係唔係要越敷越耐先最好，好多人以為敷耐啲就可以令面上吸收更加精華，但其實面膜敷一段時間已經令肌膚吸收足夠水分，敷太耐反而會變得變得越乾，甚至會出現皮膚泛紅或過敏嘅情況，因此建議大家每次敷面膜都唔好超過20分鐘，10至15分鐘就可以了！
四．敷完面膜要洗面？
有皮膚科醫生建議，大家敷完面膜後係要洗面！因為面膜當中有防腐劑同添加物，如果唔洗面容易造成毛孔阻塞，所以敷完要以清水洗面，之後再繼續保養嘅步驟。
五．撕面膜方向點先正確？
原來敷完面膜要撕出嚟都有技巧㗎！相信好多人同小編一樣，敷完面膜會習慣由上至下，或者左至右咁除出嚟。不過呢啲方法並唔啱，正確做法係由下至上咁慢慢撕，咁先唔會堵塞毛孔，同可以減少對皮膚嘅刺激~
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
