秋日美甲2023 | 秋意漸濃，除咗衣櫃要換季之外，指甲都要換季！未諗好今個秋季換啲咩新甲色？不如睇吓編輯精選嘅10款美甲提案啦！有最百搭易襯衫嘅裸色系混搭，亦有氣質感滿滿嘅暈染款，仲有玩味十足嘅節日主題設計、動物造型等等。即刻睇吓邊款最適合你！
秋日美甲2023推薦｜1. 裸色混搭
裸色絕對係經典不敗嘅選擇，百搭好襯，簡約但不失氣質感。不過全單純裸色可能比較單調，呢個時候就可以喺幾隻指甲上着手。以金色邊框作分界線，加入啡棕色系嘅混搭顏色，適合秋日嘅氛圍，而且有亮點之餘又唔會太搶眼。
秋日美甲2023推薦｜2. 摩卡咖啡色格紋
格紋指甲一向係大熱，而唔同款式嘅格紋，所呈現出嚟嘅感覺都唔同。編輯就推薦呢款英倫學院風嘅格紋，特別得嚟又有女人味！金色、黑色相間嘅格線，配合摩卡咖啡色調嘅深棕做底色，秋日感覺出晒嚟。
秋日美甲2023推薦｜3. 血色感暈染
氣質女生們，今個秋天可以考慮吓暈染款式嘅美甲。滿滿秋冬感嘅血色暈染配上金邊，既有高級感，亦充滿個性。血色暈染美甲，配上淺色或棕色系嘅毛衣穿搭，秋冬感馬上UP！
秋日美甲2023推薦｜4. 琥珀果凍
近年來越嚟越流行嘅果凍感美甲，適合想試新嘢但又唔想過於浮誇嘅你。果凍感美甲著重透光感，好似果凍一樣、半透明嘅Gel甲，令甲面望起嚟帶水嫩感，而且微微透光。顏色選以暖色系嘅漸層暈染，再加入少少金屬邊框元素，超唯美！
秋日美甲2023推薦｜5. 秋日雛菊
將秋意濃濃嘅小雛菊圖案，以立體嘅形式呈現喺美甲上，高貴得嚟帶點可愛。以秋日必備嘅大地色為主調，配搭大拇指以米白色為主嘅秋日雛菊，意想不到地好睇！
【延伸閱讀】保濕化妝水推介 | 秋天必入手8款化妝水 解決乾燥、泛紅！最平$98濕敷必選
秋日美甲2023推薦｜6. 尖形棕色漸變
想搞搞新意思，不妨喺甲形上着手，尖形美甲或者會係你嘅秋季之選！如果你希望美甲較突出，呢款就啱晒。棕色調富有秋日感，而選用漸變色就冇單一顏色咁寡。使用尖形美甲仲可以令手指喺視覺效果上變得纖長。
秋日美甲2023推薦｜7. 漫畫式法式
法式指甲係一款經典嘅美甲造型—喺指甲邊緣用另一款顏色畫上弧線，典雅得嚟又有小細節。而漫畫式法式就用上繪畫漫畫嘅黑線，將邊框勾勒出嚟。而且選用飽和度高嘅復古綠色，今個秋天不再低調！
秋日美甲2023推薦｜8. 金箔雲石
雲石美甲都係一個熱門選擇，但其實雲石紋唔一定要黑白灰色。選擇秋日感較重嘅米白色、棕色系，雖然同樣係雲石紋，但呈現出嚟嘅效果就有另一番感覺。更可以加入少少金箔元素，簡約而優雅，帶華麗嘅高貴感但亦毫不誇張。
秋日美甲2023推薦｜9. 玩味節日主題
著重玩味感嘅女仔，可以選擇一啲帶節日主題嘅美甲圖案，靚得嚟又可以應節。將萬聖節嘅代表元素，例如南瓜、幽靈等等，以卡通形式畫喺指甲上，唔會覺得詭異之餘更不失可愛感，而且夠晒吸睛，仲節慶感滿滿，去萬聖節party都好適合！
秋日美甲2023推薦｜10. 可愛動物造型
可愛型女生亦可以選擇動物造型嘅美甲，而秋日嘅代表一定非松鼠莫屬。將松鼠圖案畫喺指甲上，配搭埋橙色、卡其色等暖色系嘅純色美甲，超萌超可愛！甚至可以同美甲師溝通，用軟gel將動物整成立體形狀，咁就更加特別喇。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
