細個最鍾意上嘅堂一定係電腦堂，因為可以偷偷地上網同玩遊戲。以前流行嘅flash小遊戲，為我哋嘅童年帶黎好多寶貴回憶，而家諗返都覺得好青春。小編整理咗15個童年時曾經玩過嘅小遊戲，唔知你哋又有冇玩過呢？
圖片來源：網上圖片、官方圖片| 撰文：Cynthia
童年回憶2026 | 1. 小蕃薯
當年風靡學生嘅育成小蕃薯遊戲，係希望小朋友都可以學識上網。最中意幫小蕃薯換衫、餵食同陪佢玩，感覺好似有隻小竉物，互動模式親密感爆棚。原來目前最老嘅蕃薯寶寶已經破千歲，一直默默陪住我地成長！
童年回憶2026 | 2. 尼奧寵物
1999 年成立嘅虛擬寵物網站Neopets 尼奧寵物，係好多90後嘅共同回憶。寵物種類有超過54隻，而個個都想要限量或稀有嘅顏色同品種。該稀有寵物生日前後，會釋出一定數量俾大家領養，令體驗增加更多樂趣。當年大家都瘋狂玩遊戲，賺點數將自己嘅寵物養到肥肥白白，如果唔係寵物就會變成「快要餓死了」。
童年回憶2026 | 3. 勁舞團
玩到手指都攰嘅仲有《勁舞團》，要準確咁撳上下左右鍵，先叫完成一個舞步組合，非常有挑戰性。而遊戲嘅舞曲都好有節奏感，每次聽到都知道要「手舞足蹈」！
童年回憶2026 | 4. 跑online
「原來跑都可以咁好玩！」唔同賽道有唔同嘅障礙設計，同其他人比拼DJ技術，睇吓邊個最快到達終點。特別係30人賽事更熱鬧，對手更加強勁，獎品都更豐富。你哋當年又有冇偷偷地練習賽道呢？
童年回憶2026 | 5. 阿sue化妝
阿sue化妝比賽就黎開始，要喺短時間內根據指示模特兒扮靚靚，最快嘅先會勝出。相信呢個遊戲係好多女仔第一次接觸化妝嘅經驗呢！
童年回憶2026 | 6. 彈珠台
細個會玩上癮嘅Windows內置遊戲「彈珠台」，為我哋帶黎滿滿回憶。遊戲設計主色為紫色，十分有科技感，好似去咗太空咁。彈珠碰撞嘅聲音清脆，聽到其實好治癒，令大家不停同人鬥高分。
童年回憶2026 | 7. 辦公室偷情
公司有位美女同事，老闆同你都好中意佢。但我哋啲小員工邊可以得罪老闆，唯有趁老闆傾電話嘅時間偷偷地同靚女同事親親。小編就未試過玩到超過2500分，有冇人可以話我知有咩結果？
童年回憶2026 | 8. 貓狗大戰
貓狗大戰畫風睇落好可愛，但其實好難玩！因為風速唔係固定，每次投摘力度都要控制得好準確，先可以成功掟中對方。另外如果對該回合有信心，可以揀重覆掟兩次或者變大武器，提高攻擊力！
童年回憶2026 | 9. 電眼美女
電眼美女要求一定手速，先至可以拎到高分。每次小編都會走上最頂樓，搵最靚仔嘅男同學。唔知你哋喺網吧玩呢個遊戲時，有冇試過比職員提點唔好撳爛個滑鼠呢？
童年回憶2026 | 10. 的骰孖妹打排球
的骰孖妹打排球係另一個非常受歡迎嘅Flash小遊戲。前面嘅關卡比較輕鬆，但去到後面真係會卡關。如果而家在挑戰，會唔會成功過關呢？
童年回憶2026 | 11. 挖金礦
相信挖金礦呢個遊戲，當年唔只小學生中意玩，連大人都會玩埋一份。錨會左右搖擺，而每次速度都唔同，會增加玩家下落同控制角度嘅難度。每次釣到石頭，都浪費好多時間，好唔甘心呢！
童年回憶2026 | 12. 無個性戰隊
無個性戰隊畫風雖然簡單，但遊戲體驗非常不錯。細個未必清楚攻擊技術，即使亂咁撳，都唔知點解過到關。但去到後面比較難嘅關卡，就未必過到啦。
童年回憶2026 | 13. 敲鞋跟
敲鞋跟呢個遊戲講求角度同力度控制，務求要將高跟鞋變成平底鞋。如果鞋跟未完全跌落，唔洗擔心，仍然可以有技巧地調整角度，非常過癮。
童年回憶2026 | 14. 愛里做蛋糕
愛里做蛋糕係好多女孩子沉迷嘅遊戲，因為要整蛋糕俾心儀嘅男仔，真係做功課都冇咁用心。當中攪拌、烘焗同唧花都十分講究，控制得唔好就會失敗，打亂求愛計劃。
童年回憶2026 | 15. 泡泡卡丁車
泡泡卡丁車係一款休閒類賽車競速遊戲，亦係《爆爆王》嘅衍生遊戲，採用類似角色，延續故事性同熟悉感。電腦上都可以感受到引擎加速、甩尾同刺激嘅速度感。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
