雪糕店推介2024 | 大熱天時，想消暑梗係要食雪糕啦！今個夏天為大家介紹八間有特色嘅雪糕店，等你可以喺炎熱嘅日子裡面搵到清涼嘅慰藉！無論你鍾意傳統口味定係新奇搞怪嘅雪糕，呢度都有啲適合你嘅選擇，例如人氣大熱嘅觀塘Ganto Gelato，香港原創品牌小店提供各式新奇口味及希臘乳酪雪糕等。立即收藏以下8間雪糕店，齊齊趕走夏天嘅熱氣！
圖片來源：Snack Baby Facebook、Venchi官方網站、Instagram@gantohk官方專頁、Openrice@Eatlife balanceeee、@eridayeatig、@or#Tm65657024、@輕鬆豆*HappyMealFamily、@bobochow_、@jap.eat.all、@wiyilaw、@MR CHAN51、@nomnom_explore｜撰文：Ginger
雪糕店推介 | 1.Snack Baby Gelato — 乳糖不耐症都可以食得放心！
Snack Baby位於中環荷李活道，係一間有特色嘅gelato雪糕店同酒吧，走復古風格裝潢，其靈感來自60年代米蘭嘅現代主義咖啡室。餐廳主打意大利雪糕，供應14種口味，除咗經典味道，仲有不含乳糖或無動物成分嘅特別口味，等有乳糖不耐症嘅人都可以食得放心！特別口味有花生醬脆脆、開心果脆脆、煙燻雲呢拿及黑莓玉桂味BB Cinnamon等。雪糕分為小杯($58)及大杯($68)，加配雪糕筒只需$8。
【INFO】
Snack Baby Gelato
地址：中環荷李活道93-95號地下
營業時間：星期一 12:00 - 18:00；星期二至三 12:00 - 22:00；星期四至六 12:00 - 00:00；星期日 12:00 - 18:00
雪糕店推介 | 2. Venchi — gelato每日新鮮製作，多款口味任你揀
Venchi全港有16間分店，大部份位於商場內非常方便。Venchi選用最精緻嘅原材料，例如來自厄瓜多爾、委內瑞拉同秘魯嘅單一產地朱古力、皮埃蒙特嘅榛子同Bronte嘅開心果，令每一啖嘅gelato都充滿獨特風味！佢哋嘅雪糕不含人工色素、香料、增稠劑或棕櫚油，保證食到最天然嘅味道。佢地嘅Gelato每日新鮮製作，擁有超過90種食譜，由經典嘅焦糖榛子朱克力、Cremino同Cuor di Cacao黑巧克力，到Giandujotto、開心果同牛奶巧克力Nocciolato任你揀！價錢方面，Venchi提供多種選擇，迷你裝兩種口味$63，而家庭裝五種口味就係$398，仲可以加$15轉手工脆筒！
【INFO】
Venchi
地址：請參閱官方網站
雪糕店推介 | 3. 華 Hana Soft Cream — 主打日本進口特濃8.0牛乳軟雪糕
位於深水埗西九龍中心嘅「HANA Soft Cream」係一間主打日本進口特濃8.0牛乳軟雪糕嘅小店，開業近6年多，一直深受附近街坊歡迎，早前更受到雪糕關注組力推！店內提供多款自家製口味雪糕，如伯爵曲奇、泰國奶茶、金芝麻同波子汽水等。想打卡嘅話可以選擇8.0牛乳繡球花雪糕，定價$42。特濃8.0牛乳雪糕係由日本直送，乳脂含量達8%，味道濃郁，口感順滑，入口Creamy，牛奶控萬勿錯過！
【INFO】
華 Hana Soft Cream
地址：深水埗欽州街37K號西九龍中心6樓628A號舖
營業時間：星期一至日 13:00–21:30
雪糕店推介 | 4. Frozen Yogurt Drool — 自由配搭Froyo！
尖沙咀嘅「Frozen Yogurt Drool」係一間以Frozen Yogurt為主打嘅外賣店。佢哋嘅特色賣點係可以自選配搭froyo，可以選擇酥皮筒、麻糬、期間限定無花果等配料，再配上自家製抹茶牛乳醬，質感同味道都好高質！乳酪雪糕主要用北海道3.6牛乳同希臘低脂乳酪製作，口感綿密細滑並帶有奶香，酸度較輕而甜度適中！Regular Cup（$56）包括三款配料及一款醬汁，而自選Cup則可以揀一款醬汁同兩款配料，或加錢加選配料。
【INFO】
Frozen Yogurt Drool
地址：尖沙咀柯士甸道144號地下D號舖
營業時間：星期一至日 13:00 - 22:00
雪糕店推介 | 5. GANTO GELATO — 人氣爆燈gelato排隊店！
人氣爆燈嘅觀塘工廈手工雪糕店Ganto Gelato由兩位90後店主主理，早前更搬入地舖，新地舖位置更大、空間更舒適，更新增立食區。Ganto每月會根據時令季節更換主題，例如今個月係「茶」嘅主題。而固定嘅5款恆常口味有皮埃蒙特榛子、提拉米蘇、西西里開心果、法式焦糖燉蛋及豆腐紅糖，當中最受歡迎嘅係開心果。Ganto選用意大利機器製作，質地綿密濃郁，帶陣陣奶香。
【INFO】
GANTO GELATO
地址：觀塘偉業街180號Two Harbour Square地下2號舖
營業時間：星期一 全日休息；星期二至日 12:00 - 21:00
雪糕店推介 | 6. Hello Molly Gelato — 多款新奇口味如腐竹糖水、芫荽等
Hello Molly Gelato係香港本地品牌雪糕店，主打新鮮香港製造，所有gelato都係手工製作，無防腐劑、人工色素同調味劑，健康無負擔。Hello Molly Gelato進駐中環街市，除咗提供常見嘅抹茶、曲奇、Tiramisu、開心果等經典口味，仲有好多特色口味，如腐竹糖水、芫荽、蝶豆花海鹽、Wasabi、豆腐黑芝麻鴛鴦等，每款都充滿驚喜。
【INFO】
Hello Molly Gelato
地址：中環皇后大道中93號中環街市2樓241號舖
營業時間：星期一至四 12:30 - 22:00；星期五至日 12:00 - 22:00
雪糕店推介 | 7. 小滿定律 — 價錢親民希臘乳酪專門店
小滿定律最初喺西貢係一間人氣爆燈嘅希臘乳酪專門店，最近更喺西營盤開設新分店。小滿定律以純正希臘乳酪製作乳酪雪糕，口感香軟順滑，清甜不膩。提供多達26種配料，包括自家製海鹽焦糖脆脆、綠茶糯米糍、咖啡蒟蒻等，仲與多間小店合作，提供蛋糕、曲奇、果仁等作配料，令乳酪雪糕口味更加豐富。小滿定律提供杯裝乳酪雪糕，可選三種配料加一款醬汁，及可選擇一種配料嘅筒裝雪糕，價錢相當親民！新店仲有限定配料，如煙韌紫米、可可粉糯米糍同抹茶威化卷。夏天特別推薦水果配搭，如芒果、士多啤梨同藍莓，加上蜜糖、美祿粉、熱情果汁或紅桑莓汁等醬汁，絕對係消暑嘅好選擇。
【INFO】
小滿定律
《西環分店》
地址：西環西營盤第二街1號東祥大廈地下D號舖
營業時間：星期一至日 12:30 - 20:00
《西貢分店》
西貢福民路58號高富樓地下3號舖
營業時間：星期一至五 13:00 - 20:00；星期六 13:00 - 22:00；星期日 13:00 - 20:00
雪糕店推介 | 8. Cone S — 雪糕加上棉花糖打卡一流！
Cone S係來自澳洲嘅人氣手工軟雪糕品牌，用上意大利頂級雪糕機製作，原材料包括歐洲奶源及意大利訂製雪糕粉。裝潢充滿打卡元素，有霓虹燈同特色牆，非常適合打卡。佢地招牌海鹽味雪糕一向大受歡迎，帶奶香同微鹹，味道層次豐富，甜而不膩。配料選擇亦多樣化，包括棉花糖、爆谷、爆炸糖、麻糬及柯華田脆脆等。棉花糖烘到微焦，入口即溶！價錢亦相當親民，甜筒$50，杯裝細杯$45、大杯$50，加配料每款$8，兩款$15，三款$21，四款$25。
【INFO】
Cone S
地址：銅鑼灣堅拿道東1號地舖
營業時間：星期一至四 13:30-22:30；星期五/公眾假期前夕 13:30 - 23:00；星期六及日/公眾假期 12:00 - 23:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
