行李箱推薦 | 放假大家都鍾意去旅行，但每次旅行都最怕行李篋被人掟爆，隨時唔見個人物品。資深空姐分享揀篋貼士，原來呢款冇咁容易爛又耐用！如果你成日搭飛機，就一定要知道呢5大執行李攻略，幫你慳時間！
圖片來源：Freepik | 撰文：Hedy
相信大家去旅行嘅時候，都會對執篋感到煩惱，法國航空一位擁有16年經驗嘅空姐Emilie Cooke-Martageix，分享自己揀篋同執篋嘅貼士，更建議大家一定要用呢款行李篋！咁去旅行嘅時候就自然可以避免行李篋被掟爆嘅情況！
空姐分享揀行李篋3大準則！
行李箱推薦 | 1. 硬篋定係軟篋好？
唔知大家揀行李篋嘅時候又會有啲咩準則呢？究竟硬篋定係軟篋好？做咗16年空姐嘅Emilie就表示乘客往往會以為硬篋更加硬淨襟撞啲，咁就絕對唔會爛，但事實係相反！因為喺飛機貨艙入面，當行李被堆疊嘅時候，硬篋更容易被其他行李箱壓壞，所以建議大家選擇軟身物料例如布面以及聚酯等有彈性嘅行李篋，較為耐用。
行李箱推薦 | 2. 2輪 vs 4輪行李篋
身為空姐，Emilie長時間都會用到行李篋，市面上有2輪以及4輪選擇，邊一款會係佢推薦㗎呢？好多人都鍾意用四輪行李篋，但其實呢款最易出事！因為如果前轆突然出現問題，就會影響行李篋嘅移動，所以2輪行李篋穩定性較高，絕對會係比較好嘅選擇～
行李箱推薦 | 3. 顏色選擇
相信揀行李篋嘅時候大家都會避免用白色，因為真係超容易整污糟！Emilie亦都建議大家可以買鮮豔顏色，只要行李一到達，就最容易認出自己嘅行李篋，咁就唔需要再多花時間去搵！
執篋5大貼士：
1. 旅行必備品放入隨身袋
揀完一個適合自己嘅行李篋之後，相信大部分人都會對執篋相當頭痛，如果大家因工作需要或者經常去旅行，Emilie就建議一定要將呢5樣旅行必備品，放喺自己常用嘅隨身袋入面。當中包括旅行轉插、洗漱用品、叉電線、藥品以及防曬等等。咁下次旅行嘅時候就唔需要再搵嚟搵去，同埋都唔會唔記得帶！
2. 善用毛巾包起液體
女士們去旅行都會帶備唔同嘅化妝品以及護膚品，不過由於機艙內嘅壓力以及氣壓變化，會容易導致液體洩漏，就算本身已經冚好都有機會發生。Emilie建議如果一定要帶液體，就可以善用毛巾包好，減少滲漏嘅情況！如果可以都應該減少帶液體，可以用化妝棉或者固體等取代。
3. 善用透明袋放護照
液體容易滲漏，所以大家都要記得將護照放喺透明嘅密封袋入面，咁就唔怕會整濕或者整污糟。同時放入透明袋入面，可以一看睇清自己有冇帶，一定要記得將最重要嘅護照隨身帶！
4. 快閃旅行建議帶背囊
去旅行未必每次都去好長時間，有時想快閃去幾日旅行，唔一定每次都要帶行李篋。Emilie就建議大家可以帶隨身行李或者背囊就已經好足夠，咁就唔怕等行李等得耐，不過記得要確保符合行李標準！每件行李都有重量限制，大家都唔好用到咁盡，因為如果當你自己都攞唔起嘅時候，空姐或者空少都未必可以幫手！
5. 避免攜帶新鮮食物
去旅行難免會帶當地食物返香港，不過唔係樣樣嘢都帶得！凍肉、芝士以及新鮮食物等等都係喺國際旅行入面禁止帶，同樣都要避免帶有強烈氣味嘅食物，因為咁會引起海關搜查犬嘅注意！
延伸閱讀：【旅遊平台教3招買平機票！出發前呢日買慳足21%！】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
